«Թույլ չեն տալիս վերադառնալ Հայաստան». Լիլիթ Բասյանը՝ Մոսկվայում փակված մնալու և որդու հետ շատ ժամանակ անցկացնելու մասին

Սննդաբան Լիլիթ Բասյանը որդու՝ Ալեքսանդրի հետ այս օրերին Մոսկվայում է։ Tert.am Life-ի հետ զրույցում Լիլիթն ասաց, որ ՀՀ և ՌԴ միջև քաղաքացիների տեղաշարժի ժամանակավոր դադարեցման հետևանքով չի կարողանում վերադառնալ Հայաստան, քանի որ հայկական անձնագիր չունի։

«Մարտի սկզբին գործնական նպատակով մեկնեցի Մոսկվա, քանի որ այստեղ ևս սկսում եմ դիետիկ հացերի արտադրություն, սակայն նոր կորոնավիրուսի տարածման պատճառով այլ երկրների քաղաքացիների մուտքը սահմանափակվեց ու հիմա չեմ կարողանում վերադառնալ Հայաստան։ Ես Ռուսաստանի քաղաքացի եմ, դրա համար Հայաստանն ինձ չի ընդունում»,- ասաց Լիլիթն ու հավելեց, որ իր համար դա մի շարք խնդիրներ է ստեղծել, քանի որ այս շրջանում իր արտադրությունը Հայաստանում ավելի մեծ թափով է աշխատում։

«Քանի որ զբաղվում եմ սննդամթերքի արտադրությամբ և առաքմամբ, որն այս օրերին համարվում է առաջին անհրաժեշտության ծառայություն, մեր աշխատանքը չենք դադարեցրել։ Շատ ավելի լավ կլիներ, եթե անձամբ վերահսկեի աշխատանքները, սակայն դա չի օգնում, որ ինձ թույլ տան վերադառնալ։ Ստիպված ես էլ եմ անցել աշխատանքի հեռահար տարբերակի ու այստեղից եմ ղեկավարում աշխատանքները։ Առաջիկայում կփորձեմ վերադարձի տարբերակ գտնել»,- ասաց նա։

Լիլիթի խոսքով՝ ինքը տեսակով աշխատող մարդ է, այս առօրյան ազդում է նաև իր հոգեբանական վիճակի վրա, բայց որդին՝ Ալեքսը, կարողանում է ցրել բոլոր վատ մտքերը։

Սննդաբանն ասաց, որ Մոսկվայում խուճապ չկա, սակայն ինքը խուսափում է լինել հանրային վայրերում, մեկուսացած է պահում նաև որդուն։

«Կարծում եմ՝ Ռուսաստանը թաքցնում է դեպքերը։ Ես ու տղաս ժամանակը տանն ենք անցկացնում։ Այս իրավիճակում ինձ փրկում է այն հանգամանքը, որ տղաս ինձ հետ այստեղ է։ Եթե այս իրավիճակին գումարվեր որդուս կարոտը, հաստատ չէի դիմանա։ Ես ու Ալեքսը կարողանում ենք իրար հետ լավ ժամանակ անցկացնել։ Մեր տունը Մոսկվայում բավականին մեծ է, դրա համար ձանձրանալու խնդիր չի առաջանում, կարողանում ենք դուրս գալ, զբոսնել, իրար հետ խաղեր ենք խաղում, մարզվում ենք,- պատմեց նա ու հավելեց, որ փորձում է ժամանակը ճիշտ օգտագործել,- Առօրյայում շատ եմ սրտնեղում, որ չեմ կարողանում տղայիս այնքան ժամանակ հատկացնել, որքան ես եմ ուզում, միաժամանակ հասկանում եմ, որ աշխատում եմ իր ներկան ու ապագան հնարավորինս լավ կերտելու համար։ Այս օրերին միակ դրական կողմն այն է, որ ամբողջ ժամանակս Ալեքսի հետ եմ անցկացնում»։