«Լողազգեստով ելույթիս ժամանակ հայրիկս աշխատում էր չնայել ինձ»․ «Փափուկ Խաղալիք»-ից Նաիրա Վարդանյանը՝ ավանդապաշտ ընտանիք ունենալու և պլաստիկ միջամտության դիմելու մասին

«Արմենիա» հեռուստաընկերությամբ հեռարձակվող «Փափուկ խաղալիք» նոր սիթքոմի հերոսուհիներից մեկը Նաիրա Վարդանյանն է, ում հեռուստադիտողներից շատերը կարող են հիշել «Միսս Տիեզերք Արմենիա» գեղեցկության մրցույթից, որտեղ նա հայտնվեց լավագույն հնգյակում, ինչպես նաև գրավեց «Միսս ինտելեկտ» տիտղոսը։

Tert.am Life-ի հետ զրույցում Նաիրան պատմել է ավանդապաշտ ընտանիք ունենալու, իր ճանապարհին նրանց արձագանքի, դժվարությունների և պլատիկ միջամտության մասին։

Նաիրան ասաց, որ «Փափուկ խաղալիք» սիթքոմում նկարահանվելու համար քասթինգի չի մասնակցել, իրեն առաջարկել են խաղալ այս կերպարը, սիրով համաձայնել է։ Ըստ նրա՝ «Միսս Տիեզերք Արմենիա»-ն և դրա շնորհիվ ձեռք բերած հայտնիությունը հեռուստատեսությունում հայտնվելուն չեն խթանել։ Որպես դերասանուհի առաջին քայլերն անելու հետևում, նրա խոսքով, երկար ճանապարհ կա, որն ինքը հաղթահարել է։

«Ես ունեմ հայկական ավանդական ընտանիք, հայրիկս բնավորությամբ շատ ավանդապաշտ մարդ է։ Ինձ մանկուց օգնել է ինքնասածի և համառ բնավորությունս։ Ուրախ եմ, որ ունեմ կամքի նման ուժ և կարողանում եմ առաջ գնալ, պայքարել։ Մանկուց մինչև հիմա երազկոտ եմ։ Փոքր ժամանակ գնում էի երազանքներիս հետևից, հիմա՝ նպատակներիս։ Տարիների ընթացքում ընտանիքիս հասկացրեցի, որ յուրաքանչյուրն ունի ինքնաարտահայտվելու իրավունք։ Այսինքն, եթե ես ինձ լավ եմ զգում այս միջավայրում և այս մասնագիտությամբ, պետք է հարգել իմ որոշումը։ Դժվարությամբ ստացվեց բոլորին համոզել, բայց ստացվեց»,-ասաց Նաիրան։

Նա նշեց, որ ծնողները դեմ են եղել իր մասնագիտական ընտրությանը, բայց ինքն ընդունվել է Երգի պետական թատրոն, որտեղ ստացել է հաղորդավարուհու և լրագրողի կրթություն։ Նրա խոսքով՝ ընտանիքին այդ մասին հայտնել է ընդունվելուց հետո։

«Բարդ էր, սակայն հասա այն կետին, որ գեղեցկության մրցույթի ժամանակ հայրս, մայրս, քույրս ու տատիկս իմ երկրպագուների առաջին շարքում էին։ Որքան էլ 21-րդ դարում ենք ապրում, միևնույն է, Հայաստանի իրականության մեջ լողազեստով բեմ բարձրանալը մեծ հարց է դառնում։ Բեմից զգում էի, որ լողազգեստով ելույթիս ժամանակ հայրիկս աշխատում էր չնայել, բայց իր ներկայությամբ ինձ աջակցում էր։ Կարողացա հասնել նրան, որ իմ թե՛ առաջին քննադատը, թե՛ առաջին սատարողը դառնա ընտանիքս»,-ասաց Նաիրան։

Նրա խոսքով` «Միսս Տիեզերք Արմենիա» մրցույթից հետո որոշել է կարճատև դադար վերցնել՝ չնայած այդ ընթացքում մի շարք առաջարկներ է ստացել․ «Ես կրկին կլինեմ պոդյումում, որովհետև դա իմ տեղն է, ես ինձ ազատ ու լավ եմ զգում։ Գեղեցկության միջազգային մի քանի մրցույթ կա, որոնց կմասնակցեմ, բացի դա, մեկ այլ տիտղոս եմ նվաճել՝ WNBF-ի կազմակերպած «Միսս բիկինի» մրցույթում զբաղեցել եմ երկրորդ տեղը»։

Նաիրան նշեց, որ հանրային մարդկանց անձի և արտաքնի վերաբերյալ քննարկումներն անխուսափելի են։ Ինքը դա նկատել է դեռ գեղեցկության մրցույթում մասնակցելու ընթացքում։

«Ես շատ հայրենասեր մարդ եմ, շատ եմ սիրում մեր ժողովրդին, բայց չենք կարող չնկատել նաև հայերիս ծայրաստիճան քննադատ լինելը։ Շատ տարբեր կարծիքներ եմ լսել իմ մասին։ Մեր ժողովուրդն ունի մի փոքր թերություն․ երբեք սատար չի կանգնում այն մարդկանց, որոնք միջազգային մրցույթներում են հայտնվում։ Մենք միշտ քննադատում ենք, փորձում գտնել վատը, անգամ, եթե չկա։ Ասում են՝ սա է վիրահատել, սա է փոխել, այս միջամտությունն է արել, դիմել է պլաստիկայի։ Փնովում են այն աղջիկները, որոնք չունեն ներքին ուժ՝ սենյակից, համակարգչից կամ հեռախոսից դուրս գալու։ Եթե դու քեզ գեղեցիկ ես համարում, դուրս արի բեմ։ Ապացուցիր, որ չունենալով վիրահատական միջամտություն՝ դու ես ամենագեղեցիկը։ Նմանատիպ մարդիկ միայն քննադատում են, ինչն ամենահեշտն է։ Քննադատելն աղջկան չի գեղեցկացնում։ Ամեն մեկն ինքն է որոշում՝ նստել ու չարանալ, թե՞ առաջ գնալ։ Երկար ժամանակ է պետք, որ այդ գիծը վերանա»,- ասաց նա։

Չշրջանցելով պլաստիկ միջամտություններին դիմելու հարցը՝ Նաիրան նշեց, որ ինքն անկեղծ մարդ է, երբեք չի փորձել թաքցնել, որ դիմել է պլաստիկ միջամտության։

«Այն աղջիկներից չեմ, որոնք դա թաքցնում են։ Կան մարդիկ, որոնք վիրահատում են իրենց քիթը, հետո թաքցնում դա կամ ասում շնչառական խնդիր ունեի։ Ես արել եմ պլաստիկա, բայց դա չեմ արել գեղեցկանալու համար։ Ես ուղղակի ընդգծել եմ իմ գեղեցկությունը։ Շատերն անգամ ասում են, որ ես մինչ պլաստիկան ավելի գեղեցիկ էի։ Մանկուց բնատուր գեղեցկություն եմ ունեցել,քթի վիրահատությունն ուղղակի նրբություն է հաղորդել ինձ»,-նշեց Նաիրան։

Չնայած շստերը նրան վերագրում են նաև շուրթերի ծավալի մեծացում և այտոսկրերի ուրվագծում, Նաիրան հերքեց նման միջամտությունների դիմելը։ Նրա խոսքով՝ շուրթերի ծավալի մեծացում նախկինում արել է, սակայն գեղեցկության մրցույթին մասնակցելուց առաջ հանել է նյութը։ Հիմա, ըստ Նաիրայի, որևէ այլ միջամտություն չունի։

Խոսելով գեղեցկության վերաբերյալ իր պատկերացումների մասին՝ Նաիրան ասաց․ «Ես ինձ համարում եմ գեղեցիկ, բայց գեղեցիկ եմ առաջնահերթ իմ մտածելակերպով, կենսակերպով, դատողություններով և ներքին աշխարհով։ Իհարկե, գեղեցկությունը, հատկապես այս ոլորտում, շատ կարևոր է, սակայն երբ դու բացի գեղեցկությունը, ուրիշ ոչինչ չունես տալու, դա ժամանակավոր է։ Գեղեցիկ աղջիկները շատ են, բայց պետք է կարողանաս քեզ գեղեցիկ ներկայացնել ու ճիշտ մատուցել հեռուստադիտողներին։ Ներքին հարուստ աշխարհը շատ կարևոր է, որովհետև դու այդպիսով չես լինի միայն գեղեցիկ պատյան։ Ես կարողանում եմ փոխանցել իմ մեջ եղած կրակը, և դա անում եմ մեծ հաճույքով»։