«Որդուս հետ բավականին երկար ժամանակ չենք հանդիպել»․ Զառա Սահակյան

17:08 • 26.03.20

Շոուբիզնես

Դերասանուհի Զառա Սահակյանը Փարիզից Երևան ժամանելուց հետո Women’s Club-ի մյուս մասնակիցների հետ գտնվում է մեկուսացման մեջ։

Tert.am Life-ի հետ զրույցում Զառան ասաց, որ շատ բարդ ժամանակահատված է հաղթահարել, քանի որ մոտ մեկուկես ամիս որդուց՝ 9-ամյա Նոյից հեռու է եղել։

«Դեռ այդ դժվարությունը չեմ հաղթահարել ու չեմ հաղթահարի, քանի տուն չեմ մտել ու որդուս հետ չեմ հանդիպել։ Երկու օրից նոր մեր մեկուսացումը կավարտվի։ Ինձ համար շատ բարդ է, որովհետև բավականին երկար ժամանակ չեմ հանդիպել որդուս։ Մենք շրջագայության էինք, ինչից հետո, գալով Երևան, հնարավորություն չունեցա տեսնել որդուս։ Այս մեկուսացումը բոլորի անվտանգության համար էր՝ այդ թվում՝ իմ որդու։ Դեռ Եվրոպայում գիտեինք, որ վերադարձից հետո մեկուսանալու ենք։ Մեր պրոդյուսերը նման որոշում կայացրեց, երբ դեռ Հայաստանում արտակարգ դրություն հայտարարված չէր»,-ասաց Զառան։

Նոյի խնամքով այս ընթացքում զբաղվում է տատիկը՝ Զառայի սկեսուրը․ «Որդուս խնամքի առումով բախտս շատ-շատ է բերել։ Պապան ու տատիկը՝ սկեսուրս, ամեն ինչ կազմակերպում են, բացի այդ, ինքը շատ հանգիստ երեխա է։ Որևէ խնդիր չենք ունեցել։ Միայն դասերի հետ կապված թերացումներ կային, բայց սկսեսուրիս օգնությամբ ամեն ինչ իր տեղն ընկավ»։

Զառան առաջին անգամ է որդուց այսքան երկար ժամանակ հեռու գտնվում։ Դերասանուհին նշեց, որ օրվա զգալի մասը նրա հետ է զրուցում, այդպիսով փորձում են ինչ-որ կերպ լրացնել մայրիկի բացակայությունը։

«Որդիս շատ հասկացող ու համբերատար երեխա է։ Ես իրեն մանրամասն բացատրել եմ հանգամանքները, ամեն անգամ ասում է՝ մամ, բայց դու հարբուխ չունես, չես վարակի ինձ, արի տուն։ Նեղսրտում էր, որ եկել եմ Երևան ու իրեն չեմ տեսնում։ Ամեն օր խոսում ենք։ Հիմա օնլայն ռեժիմով են դասերն անցկացնում։ հնարավորինս փորձում եմ հետևել, թե ինչ են անում, ինչ բացթողումներ կան կրթական առումով։ Ամենադժվար օրերս անցան, ընդամենը երեք օր է մնացել։ Չնայած այս վերջին օրերը, հնարավոր է, ավելի բարդ անցնեն։ Ուզում եմ հնարավորինս արագ անցնի այս ամենը, որպեսզի կարողանամ տեսնել որդուս»։