«Պիտի կառչենք մեր սիրուց ու բաց չթողնենք այն». Հասմիկ Խոջյանի 25-ամյակի չեղարկված խնջույքը, անակնկալն ու կարևոր որոշումը

Դերասանուհի Հասմիկ Խոջյանը մարտի 29-ին նշել է 25-ամյակը, ինչի առթիվ հետաքրքիր զրույց է ունեցել Tert.am Life-ի հետ ու պատմել ոչ միայն տարեդարձի, այլև կյանքի այս փուլի ու իր մտորումների մասին։

«Ինչպես միշտ, տարեդարձս սկսվեց կեսգիշերին, թեև այս անգամ առանց հյուրերի։ Ամեն տարի ընկերներս կեսգիշերին գալիս են, այս անգամ հասկանալի պատճառով չեկան, ծնողներս էին կազմակերպել ամեն բան։ Չնայած դրան՝ ջերմության, ուշադրության պակաս չեմ ունեցել։ Կեսգիշերից սկսվեցին զանգերն ու շնորհավորանքները։ Չկար մի մարդ, որը պետք է շնորհավորեր ինձ, բայց մոռացավ դա անել կեսգիշերին»,- ասաց դերասանուհին։

Հասմիկը սովորաբար խնջույք չի կազմակերպում տարեդարձի առթիվ, բայց վաղուց որոշել էր 25-ամյակը տոնել հավաքույթով։ Ծրագրերը, սակայն, խափանվեցին։

«Վաղուց որոշել էի, որ 25-ամյակս տոնելու եմ, տրամադրվել էի, կազմակերպել... տեղ, տորթ, զգեստ, ձևավորում, ամեն բան որոշված էր, բայց չեղարկվեց։ Եթե արտակարգ դրություն էլ չլիներ, կչեղարկեի, որովհետև այն, ինչ կատարվում է աշխարհում, շատ ցավալի է։ Դու չես կարող ապրել միայն քեզ համար ու չնկատել, թե ինչ է կատարվում շուրջդ։ Չէի կարող ուրախանալ միայն ինձ համար»,- ընդգծեց նա։

Այս տարի ավելի, քան երբևէ Հասմիկը զգացել է, որ մեծանում է։ «Տարեդարձիս գիշերը չեմ քնել։ Առաջին անգամ էի այդպես զգում, որ մեծացել եմ։ Չէի պատկերացնում այսպիսի ծնունդ, որ այդքան մենակ լինեմ։ Խոսքս ֆիզիկական մենակության մասին չէ, ուղղակի այս տարի կարողացա ինքս ինձ հետ մենակ մնալ։ Սա ներս նայելու, ներաշխարհի զարգացման, աշխարհայացքի փոփոխման հնարավորություն է բոլորիս համար, իսկ երբ այդ ամենի մեջ նաև ծննդյանդ օրն է ու 1 տարով մեծանում ես, մտածում ես՝ ինչ ես արել, ինչի ես հասել, ինչ կարող էիր անել, որ չես արել, ինչ պիտի անես... Արածներիս համար չեմ ուզում փոշմանել, չարածներս էլ պետք է լրացնեմ ու հաղթահարեմ շատ բաներ։ Պետք է հասնել նրան, ինչ սրտանց ուզում ես, որովհետև մեր կյանքը շատ կարճ է։ Պետք է ամուր բռնենք այն, ինչ ունենք և սիրում ենք ու բաց չթողնենք։ Պիտի փորձենք կառչել մեր սիրուց ու բաց չթողնենք այն»,- ասաց նա ու հավելեց, որ այն, ինչ չի արել, այդ գիշեր դարձրել է նպատակ, բայց դրանց մասին կխոսի իրագործելուց հետո։

Հատկապես այս շրջանում ունեցած մտորումների արդյունքում Հասմիկն ընդգծեց ժամանակի կարևորությունը. «Ամենաթանկ բանը ժամանակն է, եթե ինչ-որ մարդու կամ գործի ժամանակ ես նվիրում, ուրեմն այն առաջնային է։ Տվածդ ժամանակը միշտ պիտի գնահատվի. եթե ժամանակ ես տրամադրում, ուրեմն սիրում ես, եթե դա չի գնահատվում, ժամանակ վատնելն անիմաստ է։ Ընդ որում՝ ձախողումն էլ է գնահատական, քանի որ մեծ դաս է, պետք է խելացի լինես ու ամեն պահի հասկանաս՝ ով կամ ինչն է քեզ ճիշտ գնահատում, առաջ մղում։ Ցանկացած շփման մեջ՝ լինի սիրային, ընկերական, աշխատանքային, թե այլ, կարևոր է, որ քեզ էներգետիկ առումով առաջ մղեն, եթե առաջ չեն մղում, ուրեմն չեն գնահատում այն ժամանակը, որը նվիրում ես»։

Վերադառնալով տարեդարձի օրվան՝ Հասմիկը նշեց, որ առանց անակնկալների չի մնացել. «Ընկերուհուս տանը շատ փոքր կազմով օրենքի սահմաններում հավաքույթ էին կազմակերպել ինձ համար, թեև դժվարանում եմ դա հավաքույթ կոչել։ Ամեն դեպքում տորթ ունեցա և՛ տանը, և՛ այնտեղ, 2 անգամ մոմ փչեցի և 2 անգամ երազանք պահեցի։ Զարմանալիորեն 2 անգամ էլ նույն երազանքն եմ պահել։ Ամեն տարի երազանք եմ պահում ու մոռանում։ Այս տարի որոշել եմ հիշել, մինչև այն կատարվի»։

Իր նվերները բացահայտել Հասմիկը չի սիրում, քանի որ դրանք արդեն իր անձնական սեփականությունն են, բայց նշեց, որ այդպիսիք շատ են եղել շնորհիվ առաքման ծառայությունների, ստացել է և՛ հասցեական, և՛ անանուն նվերներ, ծաղիկների պակաս էլ չի ունեցել։
«Նվերներ եմ ստացել նաև Եվրոպայում ապրող ընկերներիցս։ Այս օրերին, երբ բոլորը շատ խառն են, հաճելի է, որ չեն մոռանում քեզ ժպիտ պարգևելու մասին։ Այդ ամենից հետո սկսում ես ավելի ճիշտ գնահատել աշխարհը»,- նկատեց նա։