«Որդիս կարող է ժամերով մնալ իր հայրիկի գրկում»․ Մարի Պետրոսյանը՝ ընտանիքի հետ մեկուսանալու և փոքրիկի խնամքի մասին

15:58 • 31.03.20

Շոուբիզնես

Դերասանուհի Մարի Պետրոսյանն ի տարեբերություն շատերի, կարանտինի այս ընթացքում պասիվ առօրյա չունի։ Նրա խոսքով՝ մայրիկ լինելու դեպքում դժվար է խոսել հանգիստ գրաֆիկի կամ ձանձրանալու մասին։

Tert.am Life-ի հետ զրույցում խոսելով որդու խնամքի ու մեկուսանալու մասին՝ Մարին նշեց, որ յոթ ամսական որդին՝ Մոնթեն, լցնում է իր ողջ օրը, չի էլ զգում, թե օրն ինչպես է սկսվում ու ավարտվում։

«Բալիկիս հետ ընդհանրապես հնարավոր չէ պասիվ օր ունենալ՝ անկախ նրանից տա՞նն ես, թե դրսում։ Մայրիկներն ինձ շատ լավ կհասկանան, որովհետև օրն իսկապես շատ հագեցած է։ Մինչև երեխայի խնամքով զբաղվում եմ, օրս անցնում է։ Մենք պասիվ օր չենք ունենում, անգամ, կարանտինի ընթացքում բավականին հագեցած գրաֆիկով ենք ապրում»,-ասաց դերասանուհին։

Մարին նշեց, որ դեռ դժվարանում է ասել՝ որդին ակտի՞վ, թե՞ պասիվ երեխա է, սակայն փաստ է, որ մայրիկի համար միշտ զբաղմունք ապահովում է։

«Հիմա իր քայլելու շրջանն է, շատ է ակտիվացել։ Ընդհանուր առմամբ՝ երևի այդքան էլ ակտիվ չէ։ Որդիս արդեն սկսել է իր բնավորությունն ամբողջությամբ ցույց տալ։ Այն, ինչ ցանկանում է, այդ պահին պետք է լինի։ Սիրում է կենդանիների հետ ժամանակ անցկացնել, մեր շունիկի հետ է խաղում։ Մուլֆիլմների սիրահար է։ Նաև իրեն դուր է գալիս մեզ հետ ժամանակ անցկացնել։ Եթե ես իրեն խաղալիքների հետ մենակ թողնեմ, գուցե լաց լինի, բայց մեր կողքին՝ ոչ, ժամերով կարող է մնալ իր հայրիկի գրկում, իմ գրկում ևս։ Չի սիրում, երբ ես հեռախոսով եմ զբաղվում, անընդհատ այնպես է անում, որ իր հետ լինենք, ուշադրություն է սիրում։ Շատ հասկացող երեխա է»,-ասաց դերասանուհին։

Մարին նշեց, որ հատկապես դուրս գալու սահմանափակումներին այս շրջանում իրենց բախտը բերել է, քանի որ տնամերձ բակ ունեն։

«Երբ ինչ-որ մի բան անհասանելի է լինում, մմավելի ես ձգտում դրան։ Օրինակ՝ դուրս գալու սահմանափակումից հետո, տպավորություն է, որ ավելի շատ ես ուզում դրսում լինել։ Այս առումով մենք շատ չենք նեղվում, որովհետև տունը սեփական է և բակ ունենք։ Մաքուր օդ շնչելու պակաս չենք զգում։ Հատկապես երեխայիս համար մաքուր օդում լինելը շատ կարևոր է։ Ես ակտիվ մարդկանց շարքին չեմ դասվում, իմ տեսակով հանգիստ եմ։ Որքան էլ ծանր է, փորձում եմ ավելի հանգիստ տանել այս ամենը»,- նշեց Մարին։

Դերասանուհին ասաց, որ անկախ կարանտինից, աշխատանքից և դրսում լինելու ներկայիս սահմանափակումներից, ընտանիքով միասին լինելու համար միշտ ժամանակ գտնում են․ «Ինձ համար ծիծաղելի է, երբ մարդիկ ասում են՝ վայ սահմանափակում եղավ, տանն ենք, հարազատների կողքին։ Դա շատ դաժան է։ Այսինքն՝ մարդը պետք է սպասի, որ նման բան լինի ու ինքը սկսի իր հարազատների հետ շփվելկամ տանը լինել։ Այս ամեն ինչի մեջ դրական բան դժվար է տեսնելը, որովհետև սա շատ վատ է։ Մենք մեր ընտանեկան շփումնեը միշտ պահում ենք։ Ո՛չ գործը, ո՛չ գրաֆիկը չեն կարող անդրադառնալ մեր՝ միասին ճաշելու կամ ինչ-որ տեղեր գնալու վրա։ Մենք փորձում ենք մեր ընտանեկան ժամանցը միշտ կազմակերպել ու միասին ժամանակ անցկացնել»։

Մարին նշեց, որ այս ամենից հետո մարդիկ պետք է փոխվեն ու ավելի ուշադիր լինեն բնության հանդեպ․ «Այս ամենի համար շատ եմ ցավում, կարծես երազ լինի։ Իհարկե, ուզում եմ այս ամենը շատ շուտ ավարտվի։ Ամեն դեպքում, պետք է աղոթենք, խելոք մնանք տանը, որպեսզի ոչ մենք վնասենք, ոչ մեզ վնասեն։ Ընտանիքներն էլ, անկախ նման դեպքերից, պետք է միասին լինեն։ Հուսամ՝ սա դաս կլինի, որպեսզի բոլորս ավելի խնամքով ու լավ վերաբերվենք բնությանը, կենդանիներին»։

Հեղինակ Զառա Ղազարյան