«Այս օրերին քաշ հավաքելը բոլորիս համար է ցավոտ թեմա»․ Սոֆյա Պողոսյանը՝ ամուսնու խոհարարական հմտությունների և կարանտինի ընթացքում ժամանակն արդյունավետ օգտագործելու մասին

Tert.am Life-ն իր ընթերցողներին հայտնել է, որ Աշոտ Տեր-Մաթևոսյանի «Արմատներ» հեռուստասերիալի նկարահանումները ժամանակավորապես դադարեցվել են։ Դերասանն ու կինը՝ Սոֆյա Պողոսյանը, երկրում տիրող արտակարգ դրությամբ պայմանավորված մեկուսացել են։

Tert.am Life-ի հետ զրույցում Սոֆյան պատմել է մեկուսացման ընթացքում իրենց առօրյայի, հոբբիների և ժամանակն արդյունավետ օգտագործելու մասին։

«Ամբողջ աշխարհն էր սովոր աննորմալ ռիթմի, այդ տեմպից հետո մեզ համար ևս պասիվությունն անսովոր էր։ Ընդհանուր առմամբ, ես ու Աշոտը տանը ժամանակ անցկացնել սիրող մարդիկ ենք։ Կարծում եմ՝ կապված է մեր աշխատանքի բնույթի հետ։ Նկարահանումների պատճառով սովորաբար չենք հասցնում տանը լինել, հիմնականում դրսում ենք ժամանակ անցկացնում։ Հիմա «վայելում» ենք այս շրջանը ու, եթե կարելի է այդպես ասել, հանգստանում ենք»,-ասաց Սոֆյան։

Դերասանուհին խոսեց նսև իր հոբբիների մասին։ Պարզվում է՝ նա դեռ փոքր տարիքից սիրում է գեղանկարչություն։

«Հիմա կարող ենք օգտակար անցկացնել մեր ազատ ժամանակը։ Ես շատ եմ սիրում գեղանկարչություն։ Հայրիկս նկարիչ է եղել, ես այդ ամենի մեջ եմ մեծացել։ Հիմա սկսել եմ նկարել, մի բան, որ մինչ այս ժամանակի սղության պատճառով չէի անում։ Իհարկե սիրողական մակարդակով եմ նկարում։ Նաև անգլերենի իմացությունս եմ զարգացնում, ինչը շատ կարևոր է,- ասաց դերասանուհին ու ժպիտով նկատեց,- Այս օրերին քաշ հավաքելը բոլորիս համար է ցավոտ թեմա։ Ես տան պայմաններում սպորտով զբաղվելու համար որոշ պարագաներ եմ պատվիրել։ Ուտելն ու շարժվելը փորձում եմ բալանսի բերել։ Շատ լավ կլինի, եթե սպորտային challenge սկսենք։ Հատկապես այս շրջանում իրար մոտիվացնելը, դրական քայլերի դրդելը կարևոր է»։

Սոֆյան նաև նշեց, որ ամուսինն այս օրերին ուրախացնում է իր խոհարարական հմտություններով. «Աշոտը շատ է սիրում խոհարարություն և շատ համեղ է պատրաստում։ Նախկինում, երբ քաղաքից դուրս էինք գնում, մսային ուտեստներն ինքն էր պատրաստում»։

Անդրադառնալով ամուսնու հետ ընդհանուր հետաքրքրություններին՝ Սոֆյան ասաց․ «Հնարավորինս փորձում ենք մեր առօրյան լցնել տարբեր բաներով, միասին եղած ժամանակը վայելել։ Մեր ընդհանուր զբաղմունքներից է ֆիլմեր և մուլտֆիլմեր դիտելը, գրքեր կարդալը, որպեսզի օրը հնարավորինս թեթև անցնի»։

Դերասանուհին կարևորում է կարանտինի կանոններին խիստ հետևելու անհրաժեշտությունը․ «Օգնելու տեսանկյունից ոչինչ չենք կարող անել, բացի տանը մնալը։ Տանից գրեթե դուրս չենք գալիս, կարելի է ասել, վեջին օրերին ընդհանրապես դուրս չենք եկել։ Բոլորիցս հասնում է տանը նստել, բացասական տրամադրություն չտարածել և կենտրոնանալ դրականի վրա»։