«Ճնշված վիճակս միայն տանը փակված լինելով չի պայմանավորված»․ Անելյա Գուբրյանը՝ մեկուսանալու, իրեն անհանգստացնող հետևանքների ու ընտանեկան միջավայրի մասին

Մոդել, դերասանուհի Անելյա Գուբրյանն այս օրերին ընտանիքի հետ մեկուսացել է։ Մոդելը նշեց, որ իրենք փորձում են խիստ հետևել արտակարգ դրության կանոններին։ Անելյան ժամանակը զուր չի վատնում՝ զբաղվում է մաշկի ու մազերի խնամքով ու այն ամենով, ինչ նախկինում, ժամանակի սղության պատճառով, չի կարողացել անել։ Մոդելը ժպիտով նկատեց, որ հիմա բոլորի խնդիրը դարձել է քաշ հավաքելը։

Tert.am Life-ի հետ զրույցում Անելյան պատմել է, թե ինչպես է առօրյան անցկացնում մեկուսացման ընթացքում և ինչ հոբբիներ ունի։

«Եթե դա կարելի է հոբբի համարել, ապա սերիալներ դիտելն ու գրքեր կարդալն է։ Սիրում եմ ժամանակ առ ժամանակ իմ զարդերի խանութով զբաղվել, հաճախ ընկերներիս հետ հանդիպել։ Իհարկե, ընկերական հանդիպումները հիմա խիստ սահմանափակ են, որովհետև մենք ընտանիքով մեկուսացած ենք, ինչպես կարգն է պահանջում։ Բոլոր գործերը, այդ թվում՝ նկարահանումներս, դադարեցված են։ Ամեն ինչ փորձեցինք անել, սակայն ոչ մեր առողջությունը վտանգելու հաշվին։ Երբ հասկացանք, որ ծայրահեղ վիճակ է, ուղղակի դադարեցրինք աշխատանքները։ Առողջությունը բոլորիս համար էլ առաջնային է»,-ասաց Անելյան։

Նա նշեց, որ սովոր է գերլարված գրաֆիկով զբաղվածությանը, սակայն պետք է համակերպվել վերջին օրերի պասիվությանը։ Անելյայի խոսքով՝ ինքն այս ընթացքում հոգեբանորեն ճնշվում է։

«Ընկճախտ, որպես այդպիսին, չի լինի, սակայն կա ճնշվածության զգացում։ Ճնշված վիճակս կապված է ոչ միայն տանը փակված լինելու, այլև այն ամենի հետ, ինչ այս օրերին կատարվում է։ Սկսած հիվանդությունից մինչև դրա բոլոր հետևանքները. մարդիկ չեն աշխատում, ֆինանսական խնդիրներ են առաջ գալիս։ Եվ այս ամենից չես կարողանում չազդվել ու չճնշվել»։

Անդրադառնալով աղջիկների՝ այս օրերին գիրանալու համատարած անհանգստությանը՝ նա նշեց․ «Բոլորն այս օրերին գիրանում են, ես՝ ոչ այնքան, որովհետև սովորաբար էլ շատ եմ ուտում, այս ընթացքում սննդակարգս չի փոխվել։ Քաշս չի ավելացել, բայց ինձ համար խնդիր է ֆիզիկական պասիվությունը։ Հիմա շատ շարժվելու հնարավորություն չկա՝ հիմնականում պառկած կամ նստած ենք։ Սովորաբար ես վազվզոցի մեջ եմ լինում և շատ ակտիվ եմ։ Անսովորության զգացում կա. սովոր եմ աշխատանքի, իսկ հիմա որևէ բան չկա, ինչով կարող ես զբաղված լինել։ Մարդ, որը 24 ժամից 20- ն ակտիվ գործունեություն է ծավալում, հիմա ոչ մի բան չի անում»։

Անդրադառնալով ժամանակն արդյունավետ օգտագործելուն՝ Անելյան նշեց․ «Սա լավ ժամանակ է «ռեստարտ»-ի համար։ Ես սկսել եմ իրերս կարգի բերել՝ սկսած անձնական պարագաներիցս։ Դեն եմ նետել իրեր, որոնք վերջին տարիների ընթացքում չեմ օգտագործել, բայց, չգիտես ինչու, պահում էի։ Վերջերս սկսել եմ հետևոել հայ նորաձևության բլոգգերներին։ Իրենց խորհուրդներին եմ ծանոթանում, արդեն օգտագործած իրերս փորձում եմ նոր համադրություններով ներկայացնել։ Չեմ համբերում, թե երբ է կյանքն իր բնականոն հունի մեջ մտնելու, որպեսզի կարողանամ դրանք կիրառել առօրյայում»։

Մոդելը ժամանակ է տրամադրում նաև խնամքի միջոցներին․ «Մազերիս ու դեմքիս խնամքին եմ ժամանակ հատկացնում։ Սրանք այն բաներն են, որոնք միշտ ուզում էի անել, զգում էի անհրաժեշտությունը, սակայն ժամանակի սղության պատճառով չէր ստացվում։ Խնամքի համար տարբեր դիմակներ եմ պատրաստում, տարբեր պրոցեդուրաներ եմ անում ինքս ինձ համար։ Առհասարակ, առօրյայում չեմ շպարվում։ Փորձում եմ մաշկիս հանգիստ տալ, քանի որ նկարահանումների ժամանակ դեմքս տոնային քսուկի տակ է լինում։ Այս ընթացքում, առավել ևս չեմ շպարվում, որովհետև տանն եմ»։

Անելյան ժպիտով նշեց, որ ընտանիքով վերջապես կարողանում են միասին ժամանակ անցկացնել, քանի որ բոլորը սովորաբար զբաղված են լինում․ «Իմ ընտանիքում բոլորս գերզբաղված ենք։ Միշտ չէ, որ տանը լինելու ժամերը համընկնում են։ Մեկը շուտ է գալիս, մյուսը՝ ուշ։ Հիմա իրար հետ շատ ժամանակ ենք անցկացնում։ Իհարկե, սովոր չենք, քանի որ մեզանից յուրաքանչյուրը միշտ իր գործով է զբաղված լինում։ Իսկ հիմա ընդհանուր ինչ-որ հետաքրքիր բաներ ենք անում, ինչը շատ լավ է ու կարևոր»։