«Այն, ինչ բեմից կարդում էի, արդեն ապրել էի»․ «Սիրուն Սոնա» հեռուստասերիալից Լիլիթ Սարգսյանը՝ «Երգ երգոց» նախագծում իր ելույթի ու զգամունքների մասին

14:46 • 02.04.20

Շոուբիզնես

Դերասանուհի Լիլիթ Սարգսյանը հեռուստադիտողներին հայտնի է «Պատվից առավել» և «Սիրուն Սոնա» նախագծերից։ Վերջին օրերին համացանցում լայն տարածում գտավ նրա մասնակցությամբ «Երգ երգոց» հաղորդաշարից մի դրվագ, որտեղ դերասանուհին զգացմունքային ներկայացնում է Սյունե Սևադայի «Փոխանցեք իրեն» ստեղծագործությունը, որի վերջին տողերը դերասանուհին հուզմունքից դժվարությամբ արտասանեց։

Tert.am Life-ի հետ զրույցում Լիլիթը պատմել է հուզմունքի պատճառի, անսպասելի արձագանքի և հաղորդաշարում նկարահանվելու մասին։

«Էկրանին եղել էի և հիմա էլ էկրանին եմ, սակայն, չգիտեմ ինչու, երեխայի նման անհամբեր սպասում էի այդ եթերին։ Տպավորություն էր, թե առաջին անգամ եմ ինձ հեռուստացույցով տեսնելու։ Պատասխանատվությունն էլ շատ մեծ էր»,-ասաց Լիլիթը։

Դերասանուհին ասաց, որ Խորեն Լևոնյանի առաջարկով նախագծի այդ եթերին պետք է մասնակցեին Թատերական ինստիտուտի ուսանողները։ Ինքը ևս իր ուժերը փորձել է և մասնակցության առաջարկ ստացել։

Լիլիթի համար բարդ է եղել ստեղծագործության ընտրությունը։ Երկար տատանումներից հետո ընտրությունը կանգ է առել հենց այդ գործի վրա։

«Սյունեի գրվածքներին իհարկե ծանոթ էի, սակայն սկզբում ուրիշ հեղինակի պիեսից էինք հատված ընտել, հետո ինձ պատահաբար ուղարկեցին «Փոխանցեք իրեն» ստեղծագործությունը, որօեսզի ուղղակի կարդայի։ Դա չէի ընտրել, որովհետև Հայոց ցեղասպանության վերաբերյալ թեմատիկ բան էին ուզում։ Վերջին վայրկյանին որոշեցի, որ «Փոխանցեք իրեն»-ն եմ ուզում ներկայացնել։ Առաջարկս ընդունեցին, սակայն նախապայմանն այն էր, որ հնարավորինս զգայական լինի»,-ասաց դերասանուհին։

Այս պարագայում Լիլիթին օգնել են ոչ թե դերասանի մասնագիտական հմտությունը, այլ զգացմունքները։ Այն, ինչ բեմում է եղել, ըստ դերասանուհու, մասնագիտական խաղ չէ․ «Այս անգամ բեմում ինձ օգնել է իմ զգայական դաշտը, ոչ թե դերասանի մասնագիտությունս։ Այն, ինչ բեմից կարդում էի, արդեն ապրել էի,բայց առաջին անգամ էի դա բեմում զգում ու պետք էր նաև փոխանցեի։ Չգիտեմ՝ որքանով ստացվեց, բայց իսկապես հուզվել էի»։

Լիլիթին զարմացրել է այն արձագանքը, որը եղել է․ «Այդ տեսանյութի հետ կապված արձագանքն ինձ համար շատ անսպասելի էր ու անկանխատեսելի։ Երբ հոլովակը էջումս հայտնվեց, իմ հետևորդները ակտիվ սկսեցին արձագանքել։ Հետո իմացա, որ մի շարք էջեր իրենց մոտ են տեղադրել։ Ընկերներս անընդհատ «սքրին» էին ուղարկում, մարդիկ ինձ իրենց «սթորիներում» էին նշում։ Անկեղծ կլինեմ, ոչ մի բացասական արձագանք մինչ օրս չեմ ստացել։ Բոլորը միայն դրականն են ասում։ Ստեղծագործության հեղինակն էլ՝ Սյունեն, շատ գեղեցիկ ու հետաքրքիր կարծիք էր հրապարակել»։

Հարցին՝ հետագայում կշարունակի՞ ասմունքել և տեսանյութեր հրապարակել, դերասանուհին պատասխանեց․ «Ես վաղուց ցանկանում էին նման հոլովակներ ներկայացնել։ Ես սիրում եմ, որ ամեն ինչ պրոֆեսիոնալ մակարդակով լինի, սակայն հիմա ժամանակ չունեմ պրոֆեսիոնալ պատրաստել այդ ամենը։ Բացի այդ, ինձ ավելի շատ դուր է գալիս նայել, թե ինչպես են ասմունքում, օրինակ՝ հետևում եմ Աննա Եղոյանին, ով ամեն բան շատ լավ ու պրոֆեսիոնալ է ներկայացնում»։