«Տղամարդիկ, որոնք խոհանոցում մոխրագույն առնետիկներ են նախընտրում, չեն կարող լինել հաջողակ»․ Նաիրա Մովսիսյանը՝ անձնական ու արտաքին փոփոխությունների և իր բիզնեսի մասին

Դերասանուհի Նաիրա Մովսիսյանը տևական ժամանակ է՝ հեռուստատեսային նախագծերում չի նկարահանվում։ Նաիրայի խոսքով՝ մասնագիտական դադարն ինքնանպատակ չէ. իր կյանքում մի շարք փոփոխություններ են տեղի ունեցել՝ անձնականից մինչև արտաքին։

Նաիրան իր արտաքին փոփոխությունը կապում է կյանքում տեղի ունեցող մյուս փոփոխությունների հետ։ Նա Tert.am Life-ին ասաց, որ խիստ կարճ սանրվածքով ու շագանակագույն մազերով ներկայանալու որոշումը հանպատրաստից է կայացրել, ինչպես իր կյանքի մյուս որոշումները։

Դերասանուհին վստահ է, որ մտածելու վրա շատ ժամանակ վատնել պետք չէ, պետք է գործել, քանի որ երկար մտորումների արդյունքում, ամենայն հավանականությամբ, ոչ մի քայլ էլ չես անի։

Փոխված աշխարհայացքի ու դրա պատճառի, նոր բյուջեի, դստերն ու մայրիկին ապահովելու, ուժեղ ու մոտիվացնող կին լինելու մասին Նաիրան զրուցել է Tert.am Life-ի հետ։

Նա ժպիտով նկատեց․ «Ինձ չեն մոռանում։ Եթե մարդն անգամ իր լռության մեջ ասելիք ունի, շարունակում է հետաքրքրել մարդկանց, անգամ, եթե էկրանին չէ»։

Արտաքին փոփոխության ու նոր ոճի մասին դերասանուհին ասաց, որ երբեք ոչինչ ինքնանպատակ չի անում․ «Փոփոխությունն արել եմ միանգամից, անսպասելի ու անհամբեր։ Կարելի է ասել, մեկ վայրկյանում որոշումն ընդունեցի, հաջորդ վայրկյանին արդեն իրագործեցի։ Ես իմ բոլոր որոշումներն եմ այդպես ընդունում։ Եթե նայենք աշխարհի հաջողակների կեսնագրությանը, կտեսնենք, որ իրենք գործի մարդ են։ Հայտնի տեսակետ կա, որ երբ չես մտածում, մեկ վայրկյանում անում ես ինչ-որ քայլ հօգուտ քո գործի ու ցանկության, հաջողության կհասնես։ Կան մարդիկ, որոնք իրենց ժամանակը հիմնականում մտածելու վրա են ծախսում, ոչ թե գործելու։ Ես գործողության մարդ եմ»։

Նոր սանրվածքը դերասանուհուն չի զարմացրել։ Ասում է՝ հայելու մեջ իր արտացոլանքի հետ հաշտ է առաջին րոպեից․ «Չեմ կարծում՝ կգտնվի մեկը, ով կասի, որ ինքն ամբողջությամբ ընկալում է իր արտացոլանքն այնպիսին, ինչպիսին կա։ Յուրաքանչյուր մարդ իրեն տեսնում է այն դիտակետից, որով ուզում է։ Այնպես որ, երբ տեսա կարճ մազերս ու նոր երանգը, շատ նորմալ վերաբերվեցի, չզարմացա, հանկարծակիի չեկա։ Ես ինձ միշտ շատ տարբեր կերպարներով եմ ընկալում, շատ հաճախ եմ արտաքին փոփոխություններ անում։ Տարբեր ժամանակներում ներկայացել եմ մազերի տարբեր գույներով՝ կապույտ, կանաչ, նարնջագույն, սև, շիկահեր, մոխրագույն։ Ինձ ընկալել ու հավանել եմ բոլոր կերպարներով»։

Սա, ըստ Նաիրայի, համարձակության հարց չէ։ Փոփոխությունների վերաբերյալ դերասանուհին ունի իր հստակ դիրքորոշումը․ «Սա հարց է ինքդ քեզ՝ դու ցանկանո՞ւմ ես կյանքում ունենալ նոր բան։ Իհարկե, գեղեցիկ են երկար ու խնամված մազերը, սակայն երբ մարդիկ դողում են վնասված ու անորակ մազերի համար, զարմանալի է։ Արտաքին յուրաքանչյուր փոփոխություն քեզ կարող է մոտիվացնել դեպի գործնական կամ անձնական փոփոխություններ։ Ոչ միայն կնոջ մոտ է այսպես, այլև տղամարդու։ Ամեն ինչ գալիս է մեր մտքից ու քայլ անելու վճռականությունից։ Ամենատարրական օրինակը մենք բերում ենք սանրվածքի վրա, սակայն նույն սկզբունքը կարող է լինել նաև ողջ կյանքի համար»։

Կողքի տեսակետներն ու մեկնաբանությունները, ըստ դերասանուհու, հաճախ են մարդկանց հետ պահում իրենց որոշումն իրականացնելուց։ Ցանկացած նոր բան կյանք թողնելով՝ շատերն են մտածում, թե ինչ կասեն մյուսները․ «Քայլ անելու համար մարդկանց ամենից հաճախ խանգարում է կողքի կարծիքը։ Հաճախ մենք չենք նկատում, որ մինչև կարևորում ենք այդ կարծիքը, դա հայտնող մարդիկ մեզանից առաջ են անցնում։ Ուղղակի պետք է հասկանալ՝ մենակ ծնվել ենք, մենակ ապրում ենք, մենակ էլ մեռնելու ենք։ Հասարակությունն ուղղակի լրացնում է մեր կյանքն ու տալիս չձանձրանալու հնարավորություն։ Երբ սկսում ենք կարևորել տարբեր տեսակետներ ու քայլ չանել, նկատում ենք, որ մեր կյանքը նույնն է մնացել։ Մարդը պետք է մտածի, որ ինքը բոլոր չէ, ինքն անհատ է։ Ով այդպես է մտածում, նա էլ սկսում է կառավարել մյուսներին, որոնք ողջ կյանքում այդպես էլ բոլոր են մնալու»։

Նաիրան ասաց, որ հիմա բիզնեսով է զբաղվում։ Նա ժպիտով ասաց, որ ատում է «ալարել» բառը, այդ երևույթի հետևանքով մարդիկ տարիներ շարունակ նույն տեղում են դոփում։

«Այո՛, դեպքեր եղել են, որ ես էլ եմ ալարել։ Ունեցել էի բիզնես կառուցելու առաջարկ հենց եղբորիցս, սակայն բավականին ժամանակ անց եմ վերադարձել առաջարկին ու քայլ արել։ Դա այն ժամանակ էր, երբ ես հետ նայեցի ու հասկացա, որ այդքան գործունեության արդյունքում ես հիմա ունեմ միայն անուն-ազգանուն, բայց ես չգիտեի՝ ինչպես բյուջե ունենամ, մայրիկիս ու դստերս տալու այն ամենը, ինչն իրենք ուզում են։ Իմ պետությունն ինձ այդ հնարավորություն չէր տալիս։ Համենայն դեպս, իմ մասնագիտությունն այստեղ ունի տարածաշրջանային սահմանափակումներ և չկա այն գնահատականը, որը պետք է լիներ։ Ինչու չանել մի բան, որով դու կարող ես շատ ավելի վաստակել ու ունենալ քեզ, քո ընտանիքին բավարարող եկամուտ»,֊ասաց Նաիրան։

Դերասանուհին նշեց, որ շատ են նաև վախերը․ «Կարծես մենք մեզնից վախեցած լինենք։ Մտածում ենք՝ ռեժիսորն է, պրոդյուսերն է մի բան կասի, կնկարահանվենք, մեր գումարը կստանանք ու վերջ։ Բան չունեմ ասելու, ես դա սիրով եմ արել և պաշտում եմ իմ մասնագիտությունը, հետագայում կրկին կլինեմ իմ սիրելի ոլորտում, սակայն իմ մասնագիտությունը կփորձեմ ավելի ճիշտ օգտագործել և ստանալ այն եկամուտը, որը ես եմ ուզում, ոչ թե հարմար է ռեժիսորին կամ պրոդյուսերին»։

Դերասանուհին վստահեցրեց, որ իր մասնագիտական ոլորտ դեռ վերադառնալու է․ «Մարդիկ ինձ կրկին կտեսնեն էկրանին, սակայն սա դադար է, որն ինձ պետք էր։ Ես բիզնեսով եմ զբաղվում, ինչն ինձ հնարավորություն է տալիս վաստակելու և ապագաս կառուցելու։ Երբ արդեն հասնեմ այն կետին, որն ինքս եմ ուզում, ես կորոշեմ որտեղ պետք է լինեմ և ինչպես։ Անգամ այս դադարի ընթացքում ես առաջարկների պակաս չունեմ»։

Դերասանուհու խոսքով՝ իրեն ոգևորում են մայրն ու դուստրը, սակայն իր միակ մոտիվատորն ինքն է․ «Մայրիկս էլ, աղջիկս էլ ինձ ոգևորում են, սակայն նրանք մոտիվատոր չեն կարող լինել, յուրաքանչյուրն իր կյանքում ինքն է մոտիվացիաներ հորինում։ Որքան էլ կողքից հորդորեն, ասեն, ոգևորեն, դուք որևէ բան չեք կարող անել, եթե ինքներդ դա չեք ցանկանում։ Իմ ներկայիս կյանքն ինձ լիարժեք է դարձրել»։

Դերասանուհին չի հերքում, որ միայնակ չէ, բայց կողակցի մասին խոսել չցանկացավ՝ միայն ակնարկելով, որ անձնականում փոփոխություններ կան․ «Իմ ամբողջ գործունեության ընթացքում ես իմ կյանքը սկուտեղի վրա մատուցել եմ հասարակությանը։ Հիմա ուղղակի չեմ ցանկանում խոսել այդ թեմայով»։

Նաիրայի խոսքով՝ ուժեղ ու մոտիվացված կանայք վախեցնում են տղամարդկանց, սակայն հարց է՝ ո՞ր տղամարդկանց․ «Եթե տղամարդն իր ոտքերի վրա կայուն է, գիտի՝ ինչ է ուզում և ուր է գնում, չի վախենա։ Կինն իր կանացիությամբ, ճկուն մտքով նման տղամարդկանց ոգեշնչում է, ոչ թե ղեկավարում, իսկ մյուս տղամարդիկ, որոնք նախընտրում են խոհանոցում մոխրագույն առնետիկներ, չեն կարող լինել զորեղ ու հաջողակ։ Իմաստուն տղամարդիկ ուժեղ կանանց են ընտրում, քանի որ եթե նայենք ողջ պատմությունը, յուրաքանչյուր կայացած, հարուստ, հզոր տղամարդու մեջքի հետևում կանգնած է իմաստուն, ուժեղ կին»։