«Տևական ժամանակ նկարահանման առաջարկ չէի ստանում»․ Սեպուհ Ապիկյան

Դերասան Սեպուհ Ապիկյանը, ով ներկայումս հանդես է գալիս «Հարս չկա» սիթքոմում, Tert.am Life-ի հետ զրույցում ասաց, որ նախագծում նկարահանվելու առաջարկը ստացել է տևական դադարից հետո։

Մոտ մեկուկես տարի առաջարկների բացակայությունը Սեպուհը դժվարացավ մեկնաբանել, նա նշեց, որ, անկախ ամեն ինչից, հեռուստատեսային ոլորտում ընտրությունն այնքան էլ մեծ չէ։

«Սովորաբար նման դադարների ընթացքում ժամանակս ընտանեկան միջավայրում է անցնում, ինչպես բոլոր մարդկանց կենցաղում։ Եթերում չէի, որովհետև չկային առաջարկներ, այնպես չէ, որ ես ինքնակամ, հանգստանալու նպատակով որոշել էի չնկարահանվել։ Այսօր մենք ապրում ենք մի իրականության մեջ, որտեղ մեր աշխատանքային ընտրությունը մեծ չէ։ Շատ առաջարկներ չկան, որ ընտրես ու որոշես՝ որտեղ պետք է նկարահանվես, որտեղ՝ ոչ։ Միանշանակ չեմ նկարահանվի անորակ նախագծում, սակայն մեր ընտրությունը քիչ է ու սահմանափակ»,-ասաց դերասանը։

Նա նշեց, որ առաջարկների բացակայությունից չի նեղվել՝ չնայած նկարահանվելու ցանկությունը միշտ էլ մեծ է․ «Ֆորմայի մեջ մնալու համար դերասանը միշտ պետք է նկարահանվի, քանի որ դադարներն իրենց ազդեցությունն ունենում են։ Սակայն հարցի մյուս կողմն էլ կա՝ դերասանը չպետք է էկրանին այնքան լինի, որ հեռուստադիտողներին ձանձրացնի։ Դադարից հետո վերադարձը ենթադրում է, որ մի որոշ ժամանակ պետք է գալու ռիթմի մեջ մտնելու համար»։

Դերասանի խոսքով՝ գուցե ընթերցողները զարմանան, սակայն ինքն իրեն հարմարավետ է զգում դրամատիկ կերպարներում․ «Ես հանդես եմ եկել և՛ հումորային, և՛ լուրջ կերպարներում, սակայն դժվար է խոսել հոգեհարազատ կերպարների մասին։ Ես կլինեմ անկեղծ՝ հեռուստասերիալներին լուրջ չեմ վերաբերվում։ Իմ դեպքում դրանք եղել են աշխատանքներ, որոնք փորձել եմ ուժերիս ներածին չափով լավ կատարել։ Հումորայինն ամենաբարդ ժանրերից է, որին պետք է ամենայն լրջությամբ մոտենալ։ Հումորը խաղալիք չէ։ Եթե հարմարավետությունից խոսենք, ինձ ավելի լավ եմ զգում լուրջ կերպարներով ու դրամատիկ ձևաչափում։ Սակայն արտիստի ստեղծագործական կյանքում բոլոր ձևաչափերն էլ իրենց տեղն ունեն»։

Սեպուհն ասաց, որ յուրաքանչյուր արտիստ իր երազած կերպարն ունի։ Նա հստակ մի կերպար չառանձնացրեց, սակայն խոսեց ցանկալի որակի մասին․ «Հստակ կերպարային անուն չեմ կարող ասել, բայց պետք է նկարահանվել տարբերվող նախագծում՝ տարբերվող կերպարով։ Խոսքն այն նախագծերի մասին չէ, որոնք հիմա անընդհատ նկարահանվում են, նույն թեմաները բարձրացնում։ Կարծում եմ՝ մի օր էլ արժի նկարահանել նախագիծ, որը կլինի կյանքային, նախագիծ, որը կներկայացնի ինտելեկտուալ հումոր, կբարձրացնի հետաքրքիր թեմաներ, իրավիճակներ և մի լավ բան կթողնի հեռուստադիտողների մտքում։ Ցանկանում եմ նման նախագծում ներկայանալ»։

Դերասանն ասաց, որ սիրով է համաձայնել նկարահանվել «Հարս չկա» նախագծում։ Ըստ նրա՝ սիթքոմի ձևաչափն իրեն անհամեմատ ավելի է դուր գալիս, դրանում կա ժամանակակից շունչ․ ««Հարս չկա» նախագծում նկարահանվելու առաջարկը ստացել եմ ստեղծագործական թիմից, ծանոթացել եմ կերպարին ու տվել համաձայնությունս տվել։ Ընթերցողները գուցե չգիտեն՝ ես և Մենչը՝ նախագծի պրոդյուսերը, տասը տարի սովորել ենք նույն դպրոցում, զուգահեռ դասարաններում։ Սա մեր համատեղ երկրորդ նախագիծն է Yere1-ից հետո: Այսինքն՝ համագործակցելիս կարևորում եմ նաև թիմը, որի հետ աշխատելու եմ։ Այս դեպքում վստահություն կար, որ լավ նախագիծ ենք ստանալու»։