«Բառի բուն իմաստով ստացա իմ երազանքների նվերը»․ Անահիտ Կիրակոսյանը՝ 30-ամյակի անակնկալների, գնահատված լինելու և ընտանիքի մասին

Դերասանուհի Անահիտ Կիրակոսյանն այսօր տոնում է ծննդյան 30-ամյակը։ Անահիտը տոնական օրվա իր զգացմունքների, ամենասպասված նվերի ու հուզիչ անակնկալների մասին պատմել է Tert.am Life-ին։

Դերասանուհու ամուսինը՝ Արտակը, նրան նվիրված հուզիչ գրառում էր կատարել, որն Անահիտին անչափ հուզել է։

«Համատեղ կյանքի տարիների ընթացքում դրանք ամենահուզիչ խոսքերն էին։ Ամուսինս բավականին փակ մարդ է, ավելի ոչ էմոցիոնալ և մեր տան բոլոր զգացմունքներն արտահայտողը, ռոմանտիկական կողմը պահողը միշտ ես եմ եղել։ 30-ամյակս շատ տարբերվող ու զգացմունքային ստացվեց։ Ես սովորականի նման մեր լվացքատանը գործերով էի զբաղված։ Երեխաները եկան ու ինձ ասացին, թե պետք է բարձրանամ երկրորդ հարկ։ Աչքերս փակեցին ու միասին գնացինք։ Բարձրանալով վերև՝ ես տեսա փուչիկները, զարդարանքներն ու երեսուն գրառումը։ Նրանցից ամեն մեկը մի նվեր էր պատրաստել, ինչը ևս անչափ հուզիչ էր։ Հայկը գնել էր իմ սիրելի շոկոլադե սալիկն ու անգամ հասցրել էր գունավոր թղթերով փաթեթավորել։ Աննան՝ աղջիկս, ով նկարչուհի է, իմ դիմանկարն էր պատրաստել, Լաուրաս սոցցանցում հատուկ հրապարակում էր արել։ Այս ամենի զգացողությունները դեռ չէի հասցրել ամբողջությամբ ընկալել, երբ կարդացի ամուսնուս՝ Արտակի գրառումը։ Բազմաթիվ էմոցիաների հետ ես զգացի գնահատված լինելու կարևորությունը»,-ասաց դերասանուհին։

Անահիտը նշեց, որ խոսքերն ավելորդ չեն լինում, քանի որ կինը պետք է լսի, զգա, ամփոփի ու հասկանա, որ ինքը գնահատված է, սիրված․ «Իհարկե, դու անում ես սիրելով, սակայն ուրախանում ես, որ տեսանելի է եղել քո արածը, որ կարողացել ես սերդ արտահայտել և դիմացինիդ ուրախացնել։ Այդ տողերը կարդալն ինձ համար անձնական ու յուրահատուկ ազդեցություն ուներ»։

Դերասանուհու անակնկալները շարունակվել են, և նա ստացել է իր համար ամենացանկալի նվերը․ «Բառի բուն իմաստով ստացա իմ երազանքների նվերը։ Վերջին շրջանում նվագում եմ, երաժշտական տարբեր հրապարակումներ եմ անում։ Միշտ մտածում էի, որ լավ կլիներ, եթե առավել պրոֆեսիոնալ մակարդակով դա իրականացնեի։ Անընդհատ ասում էի, որ կարելի է ձայնագրման որևէ ստուդիա գնալ։ Բայց արի ու տես, որ հիմա մեր տանը ես իմ փոքրիկ ստուդիան ունեմ։ Ամուսինս նվիրել է դրա համար անհրաժեշտ ողջ տեխնիկան։ Հիմա կարող եմ ձայնագրություններս բոլորովին այլ որակով ներկայացնել»։

Այս բոլոր անակնկալներից հետո Անահիտը մի լավ արտասվել է։ Նա ծիծաղելով, բայց հուզված պատմեց․ «Տանը բոլորը քնել էին, իսկ ես ուղղակի չէի կարողանում։ Այնքան շատ զգացմունքներ էին ինձ փոխանցվել։ Ես կարդում էի Արտակի ու երեխաներիս գրառումներն ու լացում։ Ուղղակի չէի կարող զսպել զգացմունքներս, որոնք ներսումս էին։ Հասկացա, որ 30-ը լացելու տարիք է։ Հիմա շատ անսովոր է, որ դուրս եմ եկել քսանից ու նոր տասնամյակում եմ։ Մի քիչ սթրեսային է ու տխուր։ Մինչև քսանը դանդաղ էի մեծանում, իսկ հիմա երեսուն եմ, ու դա վախենալու է։ Որքան էլ մեծանալու գաղափարը մի քիչ անհանգստացրել է, սակայն ես ունեմ ստեղծած հրաշալի ընտանիք, որն իմ կյանքում ամեն ինչ փոխում է։ Շատ արածներ ունեմ, իհարկե, ընտանիքիս գլխավորությամբ։ Գիտակցում եմ, որ հասուն ու կանացի տարիք է․ հասկանում ես, որ կին ես»։

Դերասանուհու ստեղծագործական նպատակն իրեն հետևողներին մի լավ զարմացնելն է․ «Նպատակներս կապված են գեղարվեստական ֆիլմերի հետ։ Երբ նկարահանվեցի «Պատվի համար» նախագծում, հասկացա, որ որակով աշխատանք ներկայացնելն ու նորովի ներկայանալը կարևոր է։ Ուզում եմ նոր գույնով, նոր որակով հանդես գալ։ Ուղղակի կցանկանամ զարմացնել և՛ ինձ, և՛ հեռուստադիտողներին։ Խոսքը նոր ու հետաքրքիր ինչ-որ բանի մասին է»։