Աստղիկ Սաֆարյանի «Ինչու» տեսահոլովակի «բեքսթեյջ» կադրերն ու զվարճալի նկարահանումները Բյուրականում

Երգչուհի Աստղիկ Սաֆարյանը լսարանին ներկայանում է նոր աշխատանքով՝ «Ինչու» երգի տեսահոլովակով։ Երգչուհին որոշել է պրեմիերան ներկայացնել արտակարգ դրության շրջանում։ Ըստ նրա՝ սա դրական էներգիա փոխանցելու լավ տարբերակ է։ Աստղիկը տեսահոլովակի «բեքսթեյջ» կադրերը տրամադրել է Tert.am Life-ին ու պատմել երգի, տեսահոլովակի նկարահանման և սպասելիքների մասին։

««Ինչու» ստեղծագործությունը հասանելի էր օնլայն մի շարք տիրույթներում, այսօրվանից արդեն կհնչի տարբեր ռադիոկայաններից։ Սա նոր երգ է, որի երաժշտությունը հեղինակել եմ ես, բառերը՝ երիտասարդ բանաստեղծուհի Լաուրա Հովհաննիսյանը, գործիքավորումը վստահել եմ Արամ Ռիանին։ Որոշեցի հիմա ներկայացնել, քանի որ բոլորս տանն ենք ու սահմանափակումների մեջ։ Ցանկացա հանդիսատեսիս փոխանցել բարձր տրամադրություն, դրական էներգիա և նրանց առօրյան ավելիբուրախ դարձնել իմ ստեղծագործությամբ։ Այս իրավիճակում շատերը կարիք ունեն թարմ, լավ տրամադրությամբ երգերի։ Հուսով եմ՝ այն կսիրվի շատերի կողմից, ինչպես սիրվել են իմ նախորդ աշխատանքնեը»,- ժպիտով ասաց երգչուհին։

Խոսելով երգի նախապատմության մասին՝ Աստղիկն ասաց․ «Նախաձեռնությունը սկսվել է Լաուրայից, մեր երկրորդ համագործակցությունն է։ Առաջին անգամ նրա հետ աշխատել եմ «Որբուկ» երգի շրջանակում։ Ի սկզբանե Լաուրան գրել էր բանաստեղծությունը, ցանկանում էր, որ այն դառնա երգ, ունենա տեսահոլովակ։ Այդ ամենը պրոֆեսիոնալ կերպով իրականացնելը վստահեց ինձ և երաժշտական իմ ճաշակին։ Բանաստեղծությունն ինձ հոգեհարազատ թվաց ու սկսեցի աշխատել երգի ստեղծման վրա»։

Աստղիկը հայտնեց, որ տեսահոլովակի նկարահանումները կայացել են նախորդ տարվա ամռան ավարտին, սակայն պրեմիերան որոշել է հետաձգել։ Նա մեկնաբանեց, որ այդ ընթացքում արդեն եթերում էր իր Suerte երգի տեսահոլովակը։ Բացի դա, այդ ընթացքում պատրաստել ու ներկայացրել է ևս մեկ աշխատանք՝ «Ամպի տակից» երգի նորացված տարբերակը։

«Ինչու» երգի տեսահոլովակը նկարահանվել է Բյուրականում։ Ըստ երգչուհոը՝ զվարճալի ու հետաքրքիր օրեր են եղել, քանի որ ողջ թիմով գտնվել են այնտեղ․ «Շատ գեղեցիկ տեսարաններ ենք ստացել։ Ողջ թիմով Բյուրականում էինք, որտեղ հետաքրքիր նկարահանումներ ունեցանք։ Տեսահոլովակն ունի սյուժե, որին համապատասխան էլ նկարահանումներն արեցինք։ Բացի Բյուրականից, մենք նկարահանումներ ենք ունեցել նաև Երևանում, որտեղ մի քանի տեսարան կար տեսահոլովակի հերոսի հետ, ում մարմնավորում է տաղանդավոր լուսանկարիչ Մանչ Վարդանյանը։ Տեսահոլովակի ռեժիսորը Վարուժան Գալթակյանն է, օպերատորը՝ Հովհաննես Պողոսյանը։ Այս թիմի հետ համագործակցել եմ «Օ՜, քամի, քամի․․․» երգի տեսահոլովակի ընթաքում, որը շատ է սիրվել։ Քանի որ բազմաթիվ դրական արձագանքներ եղան, որոշեցի կրկին աշխատել նրանց հետ։ Կերպարներիս ոճով այս անգամ էլ ինքս եմ զբաղվել»։