Շոու բիզնեսի հայտնի դեմքերը՝ Սոֆի Մխեյանի նոր տեսահոլովակում. «Կա մի բանաձև, ինձ ասա՝ բարև»

Երգչուհի Սոֆի Մխեյանը նոր տեսահոլովակ ունի, որի գաղափարը սեր ու դրական էներգիա տարածելն է։ Երգչուհու ներքին լռությանը հաջորդել է նոր միտքը կյանքի կոչելու ոգևորությունն ու կրկին որպես ռեժիսոր ներկայանալու հնարավորությունը։

Տեսահոլովակի առաջին մանրամասները Սոֆին վստահել է Tert.am Life-ին ու հայտնել, որ գաղափարից մինչև իրականացում ընդամենը օրեր են տևել։

«Կարանտինային իրավիճակում բոլորս տանն էինք, ես էլ շատ լուռ էի՝ ներքին լռություն էր։ Ուզում էի ինչ-որ բան ներկայացնել, սակայն ոչինչ չէր ծնվում։ Երևի, ավելի քան 30 օր սպասում էի այդ էմոցիային։ Ունեի պատրաստի տեսահոլովակ «Խորոտիկ» երգի հիման վրա, սակայն հասկացա, որ հիմա այն ներկայացնելու ժամանակը չէ։ Մի օր զանգեցի Դերհովային ու հարցրեցի՝ ի՞նչ երաժշտություն կարող է ուղարկել ինձ։ Նա ինձ ուղարկեց մի երաժշտություն, որը տարիներ առաջ գրել են Արփի Շահնուբարյանի հետ։ Երաժշտության մեջ այնքան դրական ելևէջներ կային, որ ինձ դրական էներգիա փոխանցեցին։ Զանգահարեցի իմ շատ սիրելի ընկեր Ավետին, խնդրեցի լսել երաժշտությունը և եթե խոսքերի գաղափար ունենա, գրի»,- պատմեց Սոֆին։

Նախագծի գաղափարը, սակայն, ծագել է հենց Սոֆիի գլխում. «Մի օր արթնացա մտքով՝ ներկայացնել դրոնով նկարահանված տեսահոլովակ, որը կշրջի քաղաքով, տարբեր մարդկանց պատշգամբներից բարևներ ու ջերմություն կտարածի։ Զանգեցի Ավետին, պատմեցի մտքիս մասին, շատ ոգևորվեց, ինձ էլ ոգևորեց։ Իմ խնդրանքն էր, որ երգը լինի դրական, բայց չլինի «Մնա տանը», չունենա փուլային սահմանափակում։ Ինչպես միշտ շատ արագ ընկալեց միտքս ու ծնվեցին շատ գեղեցիկ բառերը։ Ավետին ուղղորդել պետք չի, ես իրեն անվերապահորեն վստահում եմ։ Երգն իր տեսակով այս ամենի մեջ է, մեր ներկայիս իրականության մասին է, սակայն ժամանակ անց էլ արդիական կլինի։ Ինչպես Ավետն է ասում՝ ես սիրում եմ ակցիաներ անել՝ «Ժպտա», «Ճանաչիր», «Հայաստան ջան» և այլն։ 2 օր անց նա զանգեց, ասաց արի երգիդ խոսքերը տար։)»։

Սոֆին պատմեց, որ մինչ ԴերՀովան անում էր գործիքավորումը, Ավետն աշխատում էր խոսքերի վրա, ինքն աշխատում էի գաղափարի ուղղությամբ։ Երգչուհին առաջին անգամ չէ ներկայանում որպես ռեժիսոր։ Այս անգամ փորձել է իր աչքերով ներկայացնել «ժպտացող ու ջերմացնող քաղաքը»։

«Գաղափարն այն է, որ ես եմ սարքը թռցնողը, այն գնում է, ակնթարթորեն վերցնում բարևները և տարածում քաղաքով։ Ամբողջը նկարահանված է միայն թռչող սարքով, այն կարծես իմ աչքերն է, որով տարածվում է բարությունը։ Շնորհալալ եմ բոլորին, որ արագ արձագանքեցին, ժպտացին, համբույր ուղարկեցին, դրականը փոխանցեցին։ Մեսիջն այն մասին է, որ մենակ չես, ես եմ քեզ հետ»,- ոգևորությամբ պատմեց երգչուհին։

Տեսահոլովակում նկարահանվել են ինչպես պատահական մարդիկ, այնպես էլ Սոֆիի հայտնի ընկերները՝ Ավետ Բարսեղյանը, Նազենի Հովհաննիսյանը, ԴերՀովան, Սարոն, Նարինե Մանուկյանը, Սիլվա Հակոբյանը, Վահե Բեգոյանը, Անահիտ Կիրակոսյանը, Հրաչ Քեշիշյանը, Լուսինե Թովմասյանը, Տեր Գրիգոր քահանա Գրիգորյանը, Նիկ էգիբյանը, Սոնա Ռուբենյանը, Արամեն և Աննա Թովմասյանը, Վարդան Բադալյանը, Արփին, Հրանուշ Եղոյանը, Գրիգոր Դանիելյանն ու Հռիփսիմե Ելինյանը, Կամո Թովմասյանն ու Տիգրանիուսը (Տիգրան Մնացականյան)։ Նրանք իրենց ջերմությունն են փոխանցել իրենց տներից, բակերից, հարազատ վայրերից։ Շատերը նկարահանվել են իրենց ընտանիքների հետ. «Նպատակս ոչ թե իրենց հայտնիությունն օգտագործելն էր, այլ իրենց ջերմությունը մարդկանց փոխանցելը»։

Սոֆին պատմեց, որ եղանակային պայմանները մի քիչ խանգարել են, սակայն կարողացել են արագ կազմակերպել նկարահանումները։ Հիմա մոնտաժային փուլում են և օրեր անց կներկայացնեն տեսահոլովակը։