«Տղամարդու ուժ է պետք մերկապարի համար». «Կինստագրամից» Էմմա Մկրտչյանը՝ թատրոնում մերկապար ու բալետ սովորելու, առաջին անգամ սիթքոմում խաղալու և Արուս Տիգրանյանի հետ մտերմանալու մասին

Դրամատիկական թատրոնի դերասանուհի Էմմա Մկրտչյանին շատերը հիշում են «Դեբեդի գաղտնիքը» 25 մասանոց սերիալում գլխավոր դերակատարմամբ, սակայն նրան առավել ճանաչեցին «Կինստագրամ» սիթքոմում Ալինայի կերպարով։

Tert.am Life-ն Էմմայի հետ զրուցել է ինչպես հումորային նախագծում իր դերի, այնպես էլ թատրոնում խաղացած կերպարների, հանուն դերի մերկապար և բալետ սովորելու մասին։

Սիթքոմն Էմմայի համար նոր ժանր է։ «Առաջին անգամ էի ներկայանում սիթքոմում։ Մինչև այս ներկայացել էի դրամատիկ կերպարներով, հեռուստադիտողն ինձ ասոցացնում էր լացող աղջկա հետ։ Լավ էր, որ առիթ ունեցա ներկայանալու նաև այս ժանրում,- ասաց նա ու հավելեց, որ իր դեպքում փոփոխությունը հեշտ են ընդունել, - սովորաբար կա նման խնդիր, որ փոփոխությունը դժվարությամբ են ընդունում։ Անուն չեմ նշի, սակայն մեր սիթքոմում էլ կա մարդ, որին այլ նախագծում տեսել էին, հիմա չեն ընկալում, ասում են՝ այնտեղ ավելի լավն էր, որովհետև իրեն չի սազում, ենթադրենք, լուրջ դեր։ Կարծում եմ՝ դերասանը հենց նրանով է հետաքրքիր, որ կարողանում է տարբեր բաներ խաղալ, որպեսզի հանդիսատեսի մոտ էլ ռեակցիա չլինի, թե մի ժանրում ես կարողանում ներլականալ»։

Հստակեցմանը՝ դա կախված է դերասանի՞ց, թե՞ հեռուստադիտողների ընկալումից, նա պատասխանեց. «Առաջինը հետուստադիտողի ընկալումն է, սակայն եթե կարողացար համոզել, որ այդ ժանրում էլ ես հետաքրքիր, սկսում են նաև այդ ժանրում պատկերացնել քեզ»։

Թեև Էմման պրոֆեսիոնալ դերասանուհի է, խաղում է Դրամատիկական թատրոնում, հեռուստադիտողները նրան շատ չեն ճանաչում։ Ըստ Էմմայի՝ «Կինստագրամ»-ն իրեն հայտնիություն բերեց. «Թատրոնի հանդիսատեսը տարբերվում է և, ցավոք, քիչ է։ Նախագծի շնորհիվ ինստագրամյան մասշտաբի ճանաչումն էր շատ, ինչի համար շնորհակալ եմ թիմին՝ ռեժիսոր Հարութ Շատյանի գլխավորությամբ»։

Սոցիալական հարթակներում նկատելի է, որ Էմման մտերմացել է Արուս Տիգրանյանի հետ։ Նա նշեց, որ Արուսի հետ շփումը շարունակվում է նաև նկարահանումների ավարտից հետո։

«Բոլորի հետ լավ հարաբերություններ ունեմ, բոլորին շատ սիրում եմ, սակայն առաջին հայացքից ընկերացանք Արուսի հետ, բնավորությամբ իրար նման էինք։ Նկարահանումներն ավարտվել են, բայց մեր կապը պահպանվում է։ Լիանա Վանոյանի հետ էլ եմ մտերիմ։ Քրիստինա Եղոյանը համակուրսեցիս է, մյուսների հետ տաղավարում եմ ծանոթացել»,- ասաց նա։

«Կինստագրամի» առաջին եթերաշրջանի նկարահանումներն ավարտվել են, հեռուստատեսային զբաղվածության նոր առաջարկներ Էմման չունի, թատրոնն էլ դեռ չի վերսկսել աշխատանքը։

Հայաստանում ապրելու համար ամենօրյա աշխատանք է պետք, Էմման նշեց, որ վաստակում է նաև մանկական միջոցառումներ վարելով և հույս հայտնենց, որ շուտով կվերադառնա բնականոն ռիթմին։ Դերասանուհու համար բարդ է առանց թատրոնի, հատկապես, որ այն իրեն նաև ֆիզիկական մարզավիճակում էր պահում։

Էմմայի դերերն առավել բազմազան են թատրոնում։ «Գանգստեր Մաք» ներկայացման մեջ նրա հերոսուհին մերկապարուհի և բալետի պարուհի է։ Մերկապարուհու դերը խաղալը ֆիզիկական մեծ պատրաստվածությունից բացի նաև ռիսկակին էր հայկական իրականության համար։

«Հայ իրականության մեջ բավականին մեծ էր ռիսկը խաղալ այդ կերպարը, որովհետև մարդիկ մտածում են՝ դու ես խաղացածդ կերպարը, բավականին դժվար է համոզել հանդիսատեսին, որ դու կապ չունես խաղացածդ կերպարի հետ։ Այստեղ կարևոր է դերասանի պրոֆեսիոնալիզմն ու ռեժիսորի մեկնաբանությունը։ Մենք սրան չենք վերաբերվել որպես մերկապարի, մեզ համար սա «փոլ դենս» էր, որը ներկայացնելու համար 8 ամիս պարապել ենք։ Մենք ամեն օր կապտուկներով էինք, արդեն մկաններ ունենք, որովհետև տղամարդու ուժ է պետք ձողի վրա պարելու համար։ Ներկայացումը շատ հետաքրքիր էր՝ կերպարս ոչ միայն մերկապարուհի է, այլև բալետի պարուհի. պատրաստվածության 2 էտապ եմ հաղթահարել»,- ասաց նա։

Մերկապարուհու խաղալը որքան էլ ռիսկային է, թատրոնում դա այնքան խնդրահարույց չէ, որքան կարող է լինել հեռուստատեսությունում։ Էմման խոստովանեց, որ էկրանին նման դեր խաղալ կզգուշանար։

«Ցավոք, դեռ չեմ կարողացել իմ մեջ այնքան զարգացնել դերասանի մասնագիտությունը, որ կարողանամ բեմի ազատությունը նաև էկրանին ունենալ։ Բեմում անկողնային տեսարան էլ կար, բայց երբ հեռուստատեսությունից եմ անկողնային տեսարան խաղալու առաջարկ ստանում, մերժում եմ։ Չեմ կարողանում իմ մեջ հաղթահարել դա։ Պետք է ռեժիսորի հարցում բախտդ բերի, որպեսզի էկրանից դա էսթետիկ մատուցվի։ Այն, ինչ հիմա եմ տեսնում ֆիլմերում, ինձ դուր չի գալիս»,- նշեց դերասանուհին։