«Ամենատաքուկ երազանքս իմ ընտանիքն ունենալն է». Ժաննա Վելիցյանի 26-ամյակի անակնկալն ու արտասովոր զգացողությունը

15:26 • 20.05.20

Շոուբիզնես

Երիտասարդ դերասանուհի Ժաննա Վելիցյանն այսօր տոնում է 26-ամյակը, ինչի առթիվ հետաքրքիր զրույց է ունեցել Tert.am Life-ի հետ։

Ժաննան պատմեց, որ տոնական տրամադրությունը մեկնարկել է երեկ երեկոյան` ժամը 22։30-ին, երբ ընկերներն անակնկալ այցելել են իրեն։

«Երեկոյան շատ հոգնած էի, պատրաստվում էի գնալ քնելու, մեկ էլ ընկերներս եկան։ Ինձ համար դա անսպասելի էր, քանի որ նախորդ տարիներին չէին եկել, կեսգիշերին միշտ ընտանիքիս հետ էի նշել ծնունդս»,- ասաց նա ու հավելեց, որ շատ է ուրախացել այդ անակնկալից, լավ ժամանակ է անցկացրել։

Դերասանուհին հայտնեց, որ այսօր թատրոնում փորձ ունի, ինչի համար շատ ուրախ է։ Արդեն երեկոյան ընկերների հետ կգնա սուրճ խմելու, քանի որ արտակարգ իրավիճակն այլ բան թույլ չի տալիս։

«Միշտ ակտիվ ծնունդներ եմ ունեցել։ Այս տարի պասիվություն էի ուզում, նույնիսկ կուզեի լրիվ մենակ լինել, սակայն չստացվեց։ Չգիտեմ` ինչու է այդպես, բայց իմ ներսում, գիտակցության մեջ շատ բան է փոխվել։ Եկել է մի շրջան, երբ հանգստություն ու լռություն եմ ուզում։ Երբեք չեմ ունեցել այն զգացողությունը, որը հիմա ունեմ։ Թվում էր`2020-ը շատ նպատակային տարի է լինելու, բայց մեզ կոտրեց։ Երևի դրանից է, որ այսպիսի տարօրինակ զգացողություններ ունեմ», - ասաց նա։

Ըստ Ժաննայի` նման զգացողությունը տարիքով չէ պայմանավորված. «Մեծանալուց, երևի, չեմ վախենում։ Իհարկե, հայելու մեջ տեսնում եմ սպիտակ մազ, կնճիռ, սակայն իմ ներսում թրթիռ, մանկական պարզություն կա, որը չի փոխվում և օգնում է ինձ»։

Ձեռքբերումների ու բացթողումների մասին խոսելիս Ժաննան նկատեց, որ բացթողումներ շատ ունի։ «Բոլորս էլ մինչև կյանքի վերջ անընդհատ ունենալու ենք բացթողումներ։ Ամենակարևորն այն է, որ ես հասկանում և ընդունում եմ բացթողումներս, փորձում եմ ամեն ինչ անել, որպեսզի դրանք չկրկնեմ։ Մի քանի օր առաջ մտածում էի` արդեն 26 տարեկան եմ դառնում, իսկ ո՞րն է իմ ձեռքբերումը։ Ես չգիտեմ` որն է իմ ամենամեծ ձեռքբերումը, բայց, այն, ինչ ունեմ այս պահին շատ սիրում և գնահատում եմ։ Երևի, հենց այդ գնահատելու ունակությունն է ձեռքբերումս»,- նկատեց նա։

Ժաննան երազանքներ շատ ունի։ Խոսելով դրանց մասին` անկեղծացավ։ «Մասնագիտական առումով ուզում եմ լինել այնտեղ, ինչի համար ընտրել եմ այս մասնագիտությունը, բայց ամենատաքուկ, սրտամոտ երազանքս իմ ընտանիքն ունենալն է»,- ասաց նա ու հավելեց, որ չկա այն մարդը, որի հետ պատկերացնում է ընտանեկան այդ ջերմությունը։