Աղջիկների խնամքը` տան պայմաններում. խորհուրդներ առողջ ապրելակերպ վարող հայ մոդելներից

Վերջին ամիսներին շատ աղջիկներ սովորեցին իրենց խնամքն ապահովել տան պայմաններում։ Մոդելներ Լիլիթ Մարտիրոսյանն ու Լյուսի Հայրապետյանը Tert.am Life-ին պատմել են տան պայմաններում մաշկը խնամելու իրենց տարբերակների մասին։

«Թոփ մոդել Հայաստան 2015», «Միսս մոլորակ 2015», «Միսս երկրագունդ 2017» տիտղոսակիր Լիլիթ Մարտիրոսյանի խոսքով՝ իր առավոտը սկսվում է մրգային կամ բանջարեղենային սմուզիով, քանի որ հետևում է քաշին։

«Հաշվարկում եմ, թե ինչքան վիտամիններ եմ ընդունում: Արդեն գիտեմ, թե որ սննդամթերքը որքան կալորիա է պարունակում, նույնիսկ կշռելու կարիք չի լինում: Իմ դիետիկ ուտեստները ես և մայրս ենք պատրաստում,- ասաց նա և հավելեց, որ կարանտինի ընթացքում քաշի ավելացում չի ունեցել։ -Նույնսիկ մի փոքր նիհարել եմ: Շոկոլադների մեծ տեսակներ վաղուց հանել եմ իմ սննդակարգից: Տեսնում եմ, որ այս ընթացքում շատերը, լարված նյարդերը հանգստացնելու նպատակով չարաշահում են քաղցրեղենը, բայց ինձ մոտ այդպես չէ: Այս ընթացքում տագնապի զգացում չեմ ունեցել, ուղղակի անհարմար և անսովոր էր այդքան երկար տանը նստելը»:

Մաշկի խնամքի հարցում Լիլիթը հարցում մեծ տեղ է տալիս բնական միջոցներին։ «Սիրում եմ կաթի և մեղրի խառնուրդով դիմակներ, նաև ավոկադո եմ օգտագործում թե՛ սննդակարգում, թե՛ մաշկի խնամքի համար: Մազերս կոկոսի յուղով եմ խնամում, որ փափուկ լինեն: Սակայն եթե սխալ սնվեմ և չմարզվեմ, ոչ մի խնամքի միջոց չի օգնի»,- ընդգծեց նա։



Մոդել Լյուսի Հայրապետյանի համար ևս մարզումները առաջնային տեղում են. «Այնպես չէ, որ ստիպված եմ սպորտով զբաղվում, այն ինձ համար արդեն ապրելակերպ է դարձել: Քանի որ վերջին ամիսներին մարզասրահները փակ էին, մարզվել եմ բացօթյա տարածքներում, հեծանիվով զբոսանքների եմ գնացել»:

Խոհարարական թաքնված տաղանդներ Լյուսիի մեջ այս ընթացքում չեն արթնացել: Ասում է, հետագայում, երբ սիրելի ունենա, նրա համար կպատրաստի: Կարանտինի ընթացքում միայն մեկ խմորեղեն է պատրաստել, որի համար նախկինում ժամանակ չէր գտնի. «Կարանտինի ընթացքում ավելի շատ եմ զբաղվել իմ խնամքով, քան դրանից առաջ: Քանի որ այս ընթացքում չէի շպարվում, մաշկս հանգստացել է կոսմետիկայից: Կավով դիմակներ եմ դրել, նույնիսկ ինքս եմ դիմակ պատրաստել: Խառնել եմ սուրճը, թթվասերը, նուշի և կոկոսի յուղերը, հացի թեփը: Այս դիմակը փափկեցնում է մաշկը և միատոն դարձնում: Մազերս խնամելու համար բնական յուղեր եմ օգտագործել, կերակրի աղի և բնական յուղերի համադրությամբ դիմակ եմ պատրաստել: Վերջինն առաջին անգամ էի փորձում, բավականին արդյունավետ էր»,- ասաց նա:

Մարիամ Խաչատրյան