Լիլուի ոճափոխությունը նոր տեսահոլավակի համար ու կամակորությունները հղիության ընթացքում

Երգչուհի Լիլուն նոր տեսահոլովակ ունի, որի մանրամասները պատմել է Tert.am Life-ին։ Զրուցել ենք նաև ոճափոխության և երկրորդ հղիության մասին:

«Հոգիս» երգի հեղինակը Վահրամ Պետրոսյանն է։ Պարզվում է` այն գրվել է շուրջ 15 տարի առաջ։

«2013 թվականին կատարեցի երգը թեթև գործիքավորմամբ ու տեղադրեցի իմ յութուբյան էջում: Ովքեր լսել էին, շատ էին հավանել: Անգամ երգիչներ կային, ովքեր երգը գնելու ցանկություն ունեին: Ամուսինս մի օր ասաց, որ այդ երգն իր ամենասիրելիներից մեկն է: Որոշեցինք նորովի ներկայացնել։ Նոր գործիքավորումն արեց Նիկ Եգիբյանը: Երգին նոր շունչ տալու համար նաև տեսահոլովակ նկարահանեցինք։ Ռեժիսորն Անի Աղասին է: Նա հիմնականում ֆոտոշարքերի վրա հիմնված հոլովակներ է նկարահանում, բայց իմն այդպիսին չէ: Չնայած ընկերներ ենք` մասնագիտորեն եմ մոտեցել այս հարցին: Նրա ճաշակն ինձ դուր է գալիս, համոզված եմ, որ ամեն ինչ լավ է ստացվել»,-ասաց Լիլուն։

Նա նշեց, որ հոլովակը սյուժետային գիծ չունի։

Լիլուն մազերը վարդագույն է ներկել հատուկ այս հոլովակի համար. «Ուզում էի այնպիսի գույն ընտրել, որն ուրիշ շունչ կտար ինձ: Նկարահանումից հետո համոզվեցի, որ ճիշտ որոշում էր: Հարմարվել եմ մազերիս նոր գույնի հետ, քանի որ տարիներ առաջ էլ այդ երանգին մոտ մազեր ունեցել եմ»:

Ըստ Լիլուիի` Միացյալ Նահանգներում հոլովակ նկարահանելը թանկ հաճույք է։ Իրենք նկարահանումներն արել են իրենց ընկերներին պատկանող մասնավոր տարածքում. «Այստեղ ամեն ինչ գումար արժե: Արմենչիկի հետ համատեղ հոլովակը Էլվիս Փրեսլիի տանը նկարեցինք և երկու ժամվա համար վճարեցինք 3000 ԱՄՆ դոլար: Հայաստանում այլ է. կա ընկերական շրջապատ, որի օգնությամբ շատ բաներ կարող են անվճար լինել: Իմ դեպքում այնպիսի օգնություններ են եղել, որոնց շնորհիվ ես կարողացել եմ շարունակել նկարահանել տեսահոլովակներ, օրինակ, ընկերուհիս իր տունը անվճար է տրամադրել նկարահանման համար»:

Երգչուհին նաև նշեց, որ ԱՄՆ-ում հայ երգչուհիները բուռն աշխատանքային գործունեություն չեն ծավալում, ինքն այն քչերի թվում է, ովքեր տեսահոլովակներ են նկարահանում. «Խոսքս ֆինանսական կողմի մասին չէ, ուղղակի հայերը նախընտրում են տղաների կատարումները լսել: Երբ Հայաստանից գալիս են Լիլիթ Հովհաննիսյանը, Սիլվա Հակոբյանը, նրանց սիրով լսում են, գնում համերգներին, բայց երբ այստեղ ես ապրում և ստեղծագործում, այնքան էլ չես ընկալվում հայերի կողմից: Միջոցառումների ժամանակ շատ քիչ եմ երգել: Ես այս տարիների ընթացքում փորձել եմ այդ կարծրատիպը կոտրել ու ապացուցել` արտիստը արտիստ է, կապ չունի` կի՞ն է, թե՞ տղամարդ»:

Լիլուն հիմա հղիության չորրորդ ամսում է։ Նրա խոսքով` նկարահանումների ընթացքում ամուսինն ամեն ինչ արել է իրեն դժվարություններից զերծ պահելու համար:

Երգչուհին ասում է` հղիության ընթացքում բնավորությամբ շատ է փոխվել. «Առաջ ամեն ինչին թեթև էի վերաբերվում, հիմա նույնիսկ հումոր չեմ ընդունում: Առաջին հղիությանս ընթացքում այդպիսին չէի, հիմա տարօրինակ հղի եմ: Գիշերը շատ ուշ եմ քնում, ցերեկային ժամերին եմ շատ քնում: Վերջերս հայկական «Էսկիմո» տեսակի պաղպաղակ էի ուզում, բայց հայկական խանութներն արդեն փակվել էին: Ամուսինս մոտավոր տարբերակներ էր առաջարկում, որոնք նման էին «Էսկիմո»-ին, բայց ես հենց դա էի ուզում»,- ժպիտով պատմեց նա։

Զույգը դեռ չի պարզել երեխայի սեռը, թեև Լիլուն ունի իր զգացողությանը. «Զգում եմ, որ տղա է, բայց կարևորը առողջ բալիկ լինի, սեռն այնքան էլ կարևոր չէ: Իմ ընկերներից մեկը` Թագուհի Օհանյանը, պետք է մեր փոխարեն իմանա երեխայի սեռը, հետո միջոցառում կկազմակերպենք, որի ընթացքում կիմանանք մեր բալիկի սեռը»:

Երգչուհու խոսքով` իր առաջնեկը` Ռոբերտը, ոչ քույրիկ է ուզում, ոչ էլ եղբայր. «Երբ համոզում ենք, որ նոր բալիկ է գալու մեր տուն, մի կերպ հարմարվում է (ծիծաղում է,-հեղ.): Ընկերուհիներս, ովքեր ևս երկու բալիկ ունեն, ասում են, որ իրենց մոտ էլ կա այդ խնդիրը: Մեր բոլոր հարազատներին զգուշացրել եմ, որ երկրորդ բալիկի ծնունդից հետո մեր տուն գալիս առաջինը Ռոբերտին մոտենան»:







Մարիամ Խաչատրյան