«Հնարավորինս շուտ պետք է նոր նախագիծ սկսեմ, որպեսզի ոչ մեկի ընտանիքը չտուժի դադարից». Դիանա Գրիգորյանը` «Անահասցե ծնվածները» սերիալի ավարտի և նոր նախագծի մասին

Այս օրերին նկարահանվում են պրոդյուսեր, սցենարիստ Դիանա Գրիգորյանի «Անհասցե ծնվածները» նախագծի վերջին սերիաները: Tert.am Life-ի հետ զրույցում Դիանան հայտնեց, որ  հեռուստադիտողը հնարավորություն կունենա մինչև օգոստոս հետևել սերիալի զարգացումներին:

Նրա խոսքով՝ հեռուստասերիալի նկարահանումները կավարտվեն մինչև հունիսի 15-ը. «Վերջին սերիաների սցենարները գրում եմ` հաշվի առնելով հեռուստադիտողների կարծիքները: Հենց նրանք են այսքան ժամանակ հետևել մեզ, վերջում կտեսնեն այն, ինչ ուզում էին տեսնել: Կփորձենք հաշվի առնել և՛ հեռուստադիտողների կարծիքը, և՛ կտրուկ լուծումներով գունավորել շղթան»:

Ըստ սցենարիստի`սերիալի ավարտի պատճառը տեխնիկական է. «Քանի որ «Արմենիա» հեռուստաընկերությունը 4K ձևաչափով նկարահանումներ է իրականացնում, մենք տեխնիկան թարմացնելու խնդիր ունենք: Որոշեցինք այս նախագիծը շուտ ավարտել, որպեսզի սեպտեմբերից նոր տեխնիկայով սկսենք նկարահանել նոր նախագիծ»:

Անդրադառնալով սերիալի վարկանիշին` Դիանան ասաց, որ նույնսիկ վերջին շրջանում, երբ սերիալը ցուցադրվել է շաբաթական երեք օր, պահպանել են իրենց մշտական բարձր ցուցանիշը:

Նա նշեց, որ նոր նախագծի հետ կապված բացահայտումներ անել այս պահին չի կարող. «Մինչև չեմ ավարտում ընթացիկ նախագիծը, հաջորդի համար պլաններ չեմ գծում: Դեռևս ընթանում են «Անհասցե ծնվածներ» հեռուստասերիալի նկարահանումները, ամբողջությամբ այս նախագծով եմ զբաղված: Առավել ևս վերջերս հասկացա, որ ոչինչ պլանավորել պետք չէ: Հաջորդ նախագծի համար նախապես քաստինգ կհայտարարենք, ինչից հետո կորոշվի դերասանական կազմը»:

Դիանայի խոսքով` ինչպես յուրաքանչյուր մարդ, ինքը նույնպես հանգստի կարիք ունի, սակայն երբ տեսնում է, որ մի ամբողջ ստեղծագործական թիմ իրեն է սպասում, չի կարող պարապուրդի մատնվել. «Հնարավորինս շուտ պետք է նոր նախագիծ սկսեմ, որպեսզի ոչ մեկի ընտանիքը չտուժի դադարից: Ես զարմանում եմ այն մարդկանց մեկնաբանություններից, ովքեր բողոքում են սերիալի երկարաժամկետությունից, չեն ուրախանում, որ մարդիկ աշխատանք ունեն: Այսօր, երբ փակ են թատրոնները, դերասանի համար ինքնաարտահայտվելու միակ հարթակը հեռուստատեսությունն է, մասնավորապես, սերիալները: Իմ խմբում այս դժվարին օրերին ոչ ոք առանց աշխատանքի չմնաց: Մենք պահպանեցինք պարերտատան բոլոր կանոնները, բայց տանը չմնացինք, շարունակեցինք նկարահանումներ անել: Այս շրջանում բոլորիս կյանքը փոխվել է, բնականոն հունով չի գնում, ինչ-որ առումով նաև ձանձրալի է, բայց մենք չենք կարող դա ներկայացնել հեռուստադիտողին»,-ասաց Դիանան:

Սցենարիստը կարծում է` բազմասերիանոց նախագծի համար սցենար գրելը և այն նկարահանելը բարդ է. «Շատ բարդ աշխատանք է յուրաքանչյուր օր գրել 28-30 էջ սցենար, իրականացնել նկարահանումներ, շաբաթական հինգ օր ապահովել  38-40 րոպե խրոնոմետրաժ և փորձել անել ամեն ինչ, որ հեռուստադիտողը գամված դիտի ու չձանձրան: Խոսքը ոչ միայն իմ աշխատանքի մասին է, այլև նկարահանող խմբի, դերասանական կազմի: Որքան ճկուն պիտի լինի դերասանը, որ կարողանա մոտ երկու տարի հեռուստադիտողին պահել հեռուստացույցի առջև և չհոգնեցնի իր խաղով»:

Դիանայի խոսքով՝ ավելի հեշտ է քսան մասում ամփոփել ասելիքը և անցնել հաջորդ նախագծին. «Կայուն վարկանիշի համար հեռուստաընկերությանը հարկավոր են երկարաժամկետ սերիալներ, այլապես ինքս էլ եմ կողմ կարճամետրաժ նախագծերին: Ինձ համար «The Young Pope»–ից և «The New Pope»-ից այն կողմ սերիալ չկա: Ամեն անգամ դիտելիս մտածում եմ` տեսնես մի օր մենք նման որակի սերիալ կնկարահանե՞նք: Իմ ճաշակը կարող է չհամընկնել շատերի ճաշակի հետ, ես ոչ մեկին չեմ պարտադրում իմ դիտած սերիալներն ու լսած երգերը: Աշխատելիս անում եմ այն, ինչի պահանջարկը կա: Սակայն ես ստեղծեցի «Իմացիր ավելին» ճանաչողական հաղորդաշարը, որպեսզի մի քիչ էլ իմ ցանկությանը հագուրդ տամ և հեռուստադիտողին ավելին իմանալու հնարավորություն տամ»:

Մարիամ Խաչատրյան