«Սկզբում իմ ու Նարեկի շփումը չէր ստացվում». Ծովինար Մարտիրոսյանի ու Նարեկ Հայկազյանի ամուսնական կյանքն ու նոր ֆոտոշարքը

Դերասաններ Նարեկ Հայկազյանն ու Ծովինար Մարտիրոսյանը իրենց ավագ որդու` Անրիի հետ ֆոտոշարք են անցել, որն առաջինը տրամադրել են Tert.am Life-ին: Մեզ հետ զրույցում Ծովինարը պատմեց, որ փոքր որդին`Արշակը, չի մասնակցել լուսանկարահանմանը, քանի որ երկար ճանապարհ գնալ չի սիրում: Նա նշեց, որ ֆոտոշարքն իրականացրել են Ստեփանավանի մոտակայքում:

Դերասանուհին միշտ նշում է, որ շատ երջանիկ է իր ընտանիքում, բայց վերհիշեց, որ իր և ամուսնու շփումը ծանոթության առաջին փուլում չի ստացվել: «Նարեկին ճանաչում եմ 2001 թվականից, նույն կուրսում ենք սովորել, ամուսնացած ենք արդեն 14 տարի: Չգիտեմ ինչու, սկզբնական շրջանում մեր շփումը լավ չէր ստացվում, հետո ինձ գրավեց Նարեկի անկեղծությունը, ազատությունը, մտածողությունը, նաև այն, որ շատ գեղեցիկ տղամարդ է: Ընկերություն անելու նրա առաջարկը միանգամից չեմ ընդունել, իմ աղջկական քմահաճույքներն այն ժամանակ շատ էին, հիմա էլ կան: Առաջին քայլը Նարեկն է արել, մինչև հիմա ինքն է անում»,- ասաց նա:

Պարզվում է` Նարեկը հանուն սիրո շատ խենթություններ է արել, մինչև հիմա էլ անում է. «Վերջերս տանն էի, դրսից լսեցի «Երևանի սիրուն աղջիկ» երգը, պատուհանից նայեցի, տեսնեմ Նարեկն է`բարձր երաժշտությունը միացրած ու ծաղիկներով կագնած: Հատուկ չէր մտածել այդ ամենը, տուն գալու ճանապարհին էր որոշել այդպես անել: Շատ այլ խենթություններ են եղել, որոնց մասին չեմ պատմի: Սիրում եմ և՛ լսել, որ սիրված եմ, և՛ տեսնել դա քայլերով: Իմ տեսակով բավականին բարդ եմ, բայց Նարեկը շատ համբերատար է: Գուցե հենց սերն է, որ տանելի է դարձնում թե՛ իր, թե՛ իմ թերությունները»:

Դերասանուհին ընդգծեց, որ ամուսինը հաճախ է իրեն հուզել ուրախությունից. «Իմ 31-ամյակի օրը Նարեկն իմ դիմանակարն էր նվիրել, որը շատ գեղեցիկ ու հետաքրքիր էր: Շատ էի հուզվել այդ անակնկալից: Մեր երկրորդ տղային` Արշակին, Նարեկը հորս պատվին է անվանակոչել: Նա այդպես էր որոշել, որովհետև ես մեր տան միակ զավակն եմ, հորս էլ երկար տարիներ չէի տեսել, քանի որ արտերկրում էր»:

Ծովինարը նկատեց, որ ընտանիքում հաճախ պետք է մի կողմ դնել սեփական ճշմարտություններն ու փոխհամաձայնության գնալ: «Ընտանիքում փոխզիջումները պարտադիր են: Ընտանիք ստեղծելը հեշտ է, բոլորը կարող են ամուսնանալ, պահելն ու փայփայելն է բարդ, քանի որ ընտանիք պահելն ամենօրյա աշխատանք է: Պետք է թե՛ կինը, թե՛ տղամարդը ունենան սեփական «ես»-ը, իրար չձանձրացնեն, չհոգնեցնեն,-ասաց նա և ընդգծեց, որ իրենց ընտանիքում երկուսն էլ զիջումների են գնում: -Չի կարող կինն անընդհատ զիջել, իսկ տղամարդն առիթից օգտվի: Մեծ նշանակություն ունի իրար հարգելը, կարծիքները լսելը: Բացի այդ, կենցաղը չպետք է առաջնային դառնա, առաջին տեղում սերը պետք է լինի»:

Ըստ նրա`տան տրամադրություն ստեղծողը կինն է. «Եթե կինն ուրախ է, ընտանիքում բոլորն ուրախ են: Մի այսպիսի խոսք կա` ուժեղ տղամարդու կողքին կինը ոչ թե ուժեղ, այլ երջանիկ է լինում: Իրոք, կինը պետք է թույլ տա, որ իր մասին էլ հոգ տանեն»:

Լուսանկարները՝ Էդգար Մելքոնյանի

Մարիամ Խաչատրյան