Ինչպես է Դիանա Շատվերյանը տոնել իր ամուսնության 10-ամյակն ու դստեր 8-ամյակը

18:50 • 04.07.20

Շոուբիզնես

Դիզայներ Դիանա Շատվերյանի ընտանիքում երեկ կրկնակի տոն էր: Դիանայի դուստրը` Վիվիենը, նշում էր ծննդյան 8-ամյակը, իսկ դիզայներն ու ամուսինը` Հայկը, ամուսնության 10-ամյակը:

Tert.am Life-ի հետ զրույցում Դիանան ասաց, որ անցած տարվանից նպատակ են ունեցել տոնական օրը մեծ շուքով նշել, բայց, համաճարակային իրավիճակից դրդված, սահմանափակվել են ընտանեկան փոքրիկ հավաքույթով:

«Այս տարի մեր օրը պասիվ անցավ, բայց պաշտպանված: Հյուրեր չունեցանք, որովհետև բոլորն էլ տանը տատիկներ, պապիկներ ունեն, ովքեր այս պահին ռիսկային գոտում են: Նախօրոք զրուցեցի Վիվիենի հետ ու բացատրեցի իրավիճակը, նա էլ հասկացավ: Ամառը պասիվ էր սկսվել ու երեխաներն արդեն սովոր էին այդպիսի իրավիճակին: Ստացվեց այնպես, որ չկարողացանք իրականացնել այն, ինչի մասին մտածել էինք: Հուսով եմ` ամեն ինչ կկարգավորվի և մյուս տարի կնշենք մեր ամուսնության 11, իսկ Վիվիենի 9-ամյակը»,-ասաց նա:

Դինայի խոսքով` ամեն ինչ արել են, որ Վիվիենի օրը հնարավորինս լավ անցնի. «Իր համար գնեցինք խաղալիքներ, նվերներ, այն ամենը, ինչ ցանկանում էր: Ուներ նաև շատ համեղ տորթ, որը իր հորաքույրն էր պատրաստել: Փչեց մոմերը, պահեց իր երազանքները,-ասաց նա և հավելեց, որ երեխան անակնկալներ չի ունեցել.-Ամեն տարի հագուստը, ծննդյան օրվա թեմատիկան հատուկ որոշում ենք, բայց այս տարի այսպես ստացվեց»:

Դիզայներն ընդգծեց, որ տարեցտարի նկատում է, թե ինչպես է Վիվիենը փոխվում. «Ինձ համար նորություն է, որ Վիվյենը գրաֆիկ դիզայնով է հետաքրքրված: Ծրագրեր է ներբեռնում ու ինքնուրույն աշխատանքներ է անում: Իհարկե երբեմն հարցեր է տալիս, մենք էլ ուղղություն ենք ցույց տալիս, բայց, կարծում եմ, շուտով դրա կարիքն այլևս չի լինի ու ամեն ինչ լրիվ ինքնուրույն կանի»:

Մարիամ Խաչատրյան