Ամառային փարթի. ինչպես են անցել Գոռ Հակոբյանի և Գևորգ Մարտիրոսյանի տեսահոլովակի նկարահանումները

Պարային ուրախ տրամադրություն, աղջիկներ՝ մի խոսքով հայկական փարթի. Գոռ Հակոբյանն ու Գևորգ Մարտիրոսյանը զուգերգ ունեն, որի հիման վրա տեսահոլովակ են նկարահանել: Tert.am Life-ը ներկա է եղել նկարահանումներին և ներկայացնում է բեքսթեյջն ու մանրամասները:

Գոռը պատմեց, որ երաժշտությունը ծնվել է մոտ 2 տարի առաջ, սակայն որոշել է այն չներկայացնել որպես հերթական աշխատանք. «Պահեցի, քանի որ չէի ցանկանում վնասել իրեն: Կարծում եմ՝ հաջողված աշխատանք է լինելու, քանի որ ով լսում է, միանգամից դրական կարծիք է ասում: Ամառային երգ է, որն իմ ձևաչափի մեջ է, շատ կոմերցիոն չեմ դարձրել, բայց կարծում եմ՝ պետք է աշխատի: Երգի մեջ կա կոմերցիոն մաս, որը երգում է Գևը»:

Գևորգ Մարտիրոսյանն էլ ասաց, որ համագործակցության առաջարկը ստացել է Գոռից: «Չգիտեմ՝ ավելի մեծ լսարան կգրավի՞, թե՞ ոչ: Անկեղծ ասած՝ չեմ մտածել այդ մասին, ուղղակի Գոռն իմ շատ լավ ընկերն է, շատ տաղանդավոր է, մեծ սիրով համագործակցում եմ իր հետ առանց հետին ակնկալիքի: Վերջերս չեմ մտածում հիթ լինել-չլինելու մասին, մտածում եմ հետաքրքիր աշխատանք անել, որպեսզի մենք մնանք այդ աշխատանքի մեջ: Ամեն դեպքում հաճելի է, երբ աշխատանքդ մասսայական է լինում,- ասաց նա, իսկ Գոռի խոսքին, որ կոմերցիոն մասն ինքն է երգում, արձագանքեց,- կոմերցիոն ասելով՝ երևի մեղեդային գիծը նկատի ունի,ես չեմ կարծում՝ դա կոմերցիոն հատված է, ինքն էլ ռեփ է կարդում, կարծում եմ՝ դրա մեջ էլ կոմերցիա կա: Եթե էդպես է, իր մասն էլ է կոմերցիա, ընդհանուր գաղափարն է կարևոր»:

Շատ երգիչներ այս ընթացքում խուսափում են նոր աշխատանքներ անել, քանի որ կորպորատիվ միջոցառումներ չկան, որոնք կվերադարձնեն ծախսերը: Գոռը ևս մեկ անգամ նշեց, որ կորպորատիվ միջոցառումներին ինքը մեծ պահանջարկ չունի: «Ես այս ամենն առաջին հերթին անում եմ իմ հաճույքի համար: Տարվա ընթացքում 3-4 երգ եմ ներկայացնում, սա նույնիսկ ուշացրել եմ, հունիսին պետք է նկարեինք»,- ասաց նա:

Տեսահոլովակը սյուժետայի գիծ չունի: Ռեժիսորը Տիգրան Ավետիսյանն է: Նա ասաց, որ սա իր և Գոռի առաջին,բայց ոչ վերջին համագործակցությունն է: Պրեմիերան նախատեսում են այս ամիս:

«Շատ հետաքրքիր երգ է, ամառային գունեղ, ռիթմիկ տեսահոլովակ է լինելու, որը մոտ կլինի մեր տեսած եվրոպական ստանդարտներով տեսահոլովակներին: Երգիչները  շատ եվրոպական արտաքին ունեն, կարող ենք ստանալ գեղեցիկ, եվրոպական տեսահոլովակ»,- ասաց նա:

Գոռն էլ նշեց, որ սյուժեով մեկ տեսահոլովակ ունի. նախընտրում է առանց սյուժե տեսահոլովակներ, որովհետև կամ սյուժեն պետք է մարդուն գամի էկրանին, կամ չլինի:

Հարցին՝ այս աշխատանքը կհիշեցնի՞ իր և Քրիստինա Եղոյանի ամառային տեսահոլովակը, նա պատասխանեց. «Քրիստինա Եղոյանի հետ զուգերգի կատարելագործված տարբերակն է: Չեմ կարծում՝ նույնքան դիտումներ կունենա, քանի որ աղջկա գործոնը միշտ աշխատում է: Կարծրատիպ է, որ հայկական փարթիների ժամանակ պետք է լինեն սիրուն աղջիկներ: Այս տեսահոլովակում կլինեն սիրուն ու ցանկալի աղջիկներ, բայց մի հերոսուհի չունենք»:

Լուսանկարները՝ Էլեն Գասպարյանի