«Շատերը մտածում են ամենաերջանիկ զույգն ենք, բայց ամեն փայլող բան ոսկի չէ». Նոնա Թելոյանի և Դավիթ Հակոբյանի ընտանեկան կյանքն ու խնդիրները

Դերասան-ամուսիններ Դավիթ Հակոբյանն ու Նոնա Թելոյանը օրերս նշել են ամուսնության -5-ամյակը: Նրանց որդին՝ Էդուարդը, արդեն 4 տարեկան է:

Tert.am Life-ի հետ զրույցում Նոնան ասաց, որ այս տարիների ընթացքում ֆինանսական, հոգեբանական բազմաթիվ խնդիրներ են ունեցել, բայց հաղթահարել են դրանք իրենց մեծ սիրո շնորհիվ:

«Ֆինանսական խնդիրները լուծելու հարցում սկզբնական շրջանում մեզ օգնում էին մեր ծնողները, հետո երկուսով աշխատեցինք ու կարողացանք առանց օգնության պահել մեր ընտանիքը: Ես ավելի քիչ եմ աշխատում, քան Դավիթը, որովհետև փորձում եմ երեխայի հետ շատ ժամանակ անցկացնել: Շատերը, տեսնելով մեր լուսանկարները, մտածում են` աշխարհի ամենաերջանիկ զույգն ենք, բայց ամեն փայլող բան ոսկի չէ: Լուսանկարներն ամենահետաքրքիր օրերին են արվում, իսկ բացեր բոլորի մոտ կան: Այդ հոգեբանական բացերը լրացնել մեզ օգնում են սերը և մեր տղան` Էդուարդը»,-ասաց Նոնան:

Ներդաշնակ ապրելու բանաձևը զույգը դեռ լիովին չի գտել, բայց, Նոնայի խոսքով, տարիքի հետ շատ բան է փոխվել. «Հայաստանում ամուսնանում են վաղ տարիքում` ի տարբերություն Եվրոպական երկրների, որտեղ ամուսնանում են հասուն տարիքում, մինչև ամուսնանալն արդեն սեր կորցրած, փորձ ձեռք բերած են լինում: Ես ամուսնացել եմ 23 տարեկանում, ինչն իմ պարագայում վաղ էր, իսկ Դավիթը 27 տարեկան էր ու պատրաստակամ: Այն ժամանակ այսքանը դեռ չէի գիտակցում բարդությունը, քանի որ ուզում էի հնարավորինս շուտ կենցաղ կիսել իմ սիրելի մարդու հետ»:

Վեճերը բնական երևույթ են բոլոր ընտանիքներում, Նոնան ու Դավիթը բացառություն չեն: «Ես սիրում եմ հանդարտ վիճել, Դավիթը բնավորությամբ էմոցիոնալ է: Սկզբում վեճերի նման ընթացքն ինձ համար անսովոր էր, հետո սովորեցի: Դավիթն ասում է, որ կարող է բարկանալ հենց իմ հանդարտ վիճելու ձևից: Հաճախ չենք վիճում, իրարից երկար նեղացած չենք մնում: Նրանք, ովքեր հաճախ են վիճում, կարծում եմ,սիրո պակաս ունեն»,- նկատեց դերասանուհին:

Ըստ Նոնայի՝  իրենք ռոմանտիկ չեն. «Նույնիսկ չեմ հիշում`վերջին անգամ երբ եմ ասել, որ սիրում եմ: Նման ռոմանտիկ տեսարաններ ունենում ենք մեր բալիկի հետ, նրան ենք ասում, որ սիրում ենք: Այդ պահերին մեզ կատարյալ երջանիկ ենք զգում»:

Ըստ Նոնայի` իրենց որդին`4-ամյա Էդուարդը, արտաքնապես իր եղբորը, իսկ բնավորությամբ՝ Դավթին է նման. «Նրա պես համառ է, հասնում է իր ուզածին, կռվարար է: Երբ ես աշխատանքի եմ գնում, զանգում են, ասում, որ երկուսով լավ տեղ են գնում, ինձ էլ չեն տանում, ես էլ կատակով հուզվում եմ: Երբ Դավիթն ու Էդուարդը վիճում են, ես պարտադիր խառնվում եմ, որովհետև նրանք նույն բնավորությունն ունեն,- ասաց դերասանուհին ու հավելեց, որ Էդուարդը բարդ երեխա է: -Անընդհատ պետք է ուշադրության կենտրոնում պահենք նրան, իմ կյանքում առաջին խանդոտ տղամարդն է:  Խանդում է տատիկներին, պապիկներին, առաջ նույնիսկ Դավթին էր խանդում: Չի սիրում որևէ բան տալ, սիրում է վերցնել, այս դարի երեխա է: Մտածում ենք հետագայում նրան քույր կամ եղբայր պարգևելու մասին, բայց Էդուարդը կտրականապես դեմ է»:

Խոսելով որդու հետաքրքրությունների մասին՝ Նոնան ասաց, որ դեռ փոքրուց պայքարել են, որ երեխան ինտերնետում չանցկացնի իր մանկությունը: «Զարմանալի կհնչի, բայց պլանշետային խաղեր չի սիրում, իր ժամանակը դրսում է անցկացնում, ընկերների հետ խաղում»,- ուրախությամբ նկատեց մայրիկը:

Մարիամ Խաչատրյան