«Մենք 3 հարսանիք ենք ունեցել». Արսեն Սաֆարյանը` ամուսնության 19-ամյակի առթիվ կնոջը մատուցած անակնկալի և իրենց երեխաների մասին

Երգիչ Արսեն Սաֆարյանն ու կինը` Սաթեն Գաբրիելյանը, օրերս նշել են ամուսնության 19-ամյակը: Այս առիթով Tert.am Life--ը հետաքրքիր զրույց է ունեցել Արսենի հետ, ով պատմել է, թե ինչպես են նշել օրը, վերհիշել է իրենց ծանոթության ու երեք հարսանիքի պատմությունն ու խոսել երեխաների` Էլենի և Արթուրի մասին:

«Մեր ամուսնության օրը համընկավ մեր ընկերներից մեկի ծննդյան օրվա հետ, մի քանի հոգով հավաքվել էինք: Սաթենը մտածում էր` մոռացել եմ, թե ինչ օր է: Խնդրեցի, որ միացնեն իմ երգացանկից «Էս ինչ սիրուն ես» երգն ու ծաղկեփնջով ներս մտա: Անակնկալը պարզ էր, բայց ստացված, ուրախացավ: Հաճախ սեր չեմ խոստովանում, քանի որ ամեն ինչ խոսքերով չի որոշվում, բայց պարտադիր չէ տոն լինի, որ կնոջս ծաղիկներ նվիրեմ: Ես կարող եմ ծաղիկներ նվիրել մի սովորական երկուշաբթի: Մարդուն միայն խոսքերով չեն սիրում, սիրում են խորիմաստ լռելով, գործողություններով»,- ասաց Արսենը:

Արսենն ու Սաթենն առաջին անգամ հանդիպել են 1997 թվականին Երգի թատրոնում. Սաթենը Քրիստինե Պեպելյանի ընկերուհին է. «Առաջին հայացքից նրան առանձնացրի մյուսներից, երկար ժամանակ չէի մոտենում, հեռվից էի հետևում, որովհետև ինքս էլ դեռ կայացման փուլում էի: Նրա մեջ ինձ գրավեց մաքրությունը, անաղարտ լույսը, որ գալիս էր իրենից: Հետաքրքիր է, որ ես չեմ ասել` ես քեզ սիրում եմ, ասել եմ, որ նրա մեջ տեսնում եմ իմ կնոջն ու մեր երեխաների մայրիկին: Ամուսնացանք 2001 թվականին, ունեցանք երեք հարսանիք»:

Արսենը պատմեց, որ առաջին հարսանիքը Մոսկվայում է եղել. զույգը գնացել է նշանելու նպատակով, բայց Արսենը Սաթենին ասել է` էլ ե՞րբ հնարավոր կլինի այդքան մարդու հավաքել մի հարկի տակ, ու որոշել են միանգամից ամուսնանալ:

«Ունեցանք նաև հայկական մեծ հարսանիք` 700 հյուրով, պսակադրվեցինք եկեղեցում: Հարսի կողմն իմ մատանին մոռացել էր տանը, այդ պատճառով հյուրերից մեկի մատանին դրեցի մատիս,- ասաց նա և հավելեց,  որ երկրորդ հարսանիքը Հրազդանում է եղել, այն առանձնահատուկ է դարձրել Արթուր Գրիգորիչը` իր անակնկալով: -Գաղտնիք չէ, որ մաեստրո Արթուր Գրիգորիչը խնջույքներ չի սիրում, այնուամենայնիվ, նրան հրավիրել էի երկրորդ հարսանիքիս: Ինձ համար անսպասելի` նա եկավ Երգի թատրոնի մեր սերնդի ներկայացուցիչների` Ալլա Լևոնյանի, Զարուհի Բաբայանի, Տիգրան Պետրոսյանի, Անդրեի, Քրիստինե Պեպելյանի և մյուսների հետ: Դա իմ ու Սաթիկի համար մեծ երջանկություն էր»:

Զույգի երրորդ հարսանիքը տեղի է ունեցել Սևանում. Այն անակնկալ էր Արթուր Գրիգորիչի կողմից. «Երրորդ հարսանիքը շատ օրիգինալ էր, քանի որ Արթուր Գրիգորիչը մեզ անակնկալի բերեց: Գնացինք Սևան, նա վարձեց Սևանի միակ նավը, պահանջեց, որ Սաթիկը հագնի հարսի զգեստ, ես էլ` փեսայի կոստյում: Այդ շոգին կատարեցինք մաեստրոյի ցանկությունը, թեև հետո հարսիկը իրեն վատ զգաց: Հետագայում պարզվեց, որ նա հղի է»:

Նկատառմանը, որ կողքից իր ընտանիքն իդեալական է թվում, Արսենը հակադրեց. «Իդեալական ոչինչ չկա, ընտանիքը բարդ օրգանիզմ է, որը համեմատում են մի փոքրիկ պետության հետ: Այդ պետության մեջ մեծանում են նաև փոքրիկներ: Պետք է կարողանաս այն ղեկավարել: Երկու տարբեր անհատ միասին կիսում են աշխարհի ամենաբարդ բանը` կենցաղը, որը շատ բան է փչացնում: Չնայած նաև միացնում է, հիմնականում, կենցաղը բացասական ազդեցություն է ունենում»:

Զույգի աղջիկը` Էլենը, արդեն 18 տարեկան է, այս տարի ընդունվել է Ֆրանսիական համալսարանի Իրավագիտության ֆակուլտետ: Տղան` Արթուրը, 12 տարեկան է, դպրոցական է: «Երևի շատերը գիտեն, որ Էլենը որքան մաքուր երգեցողություն ունի, բայց, որպես հայր, նրան խորհուրդ տվեցի ունենալ մեկ այլ մասնագիտություն, իսկ երբ ցանկանա երգել, ես նրա կողքին կլինեմ: Այդ խորհուրդն իմ փորձի ընթացքում է ծնվել: Եթե ժամանակը հետ տայի, պրոֆեսիոնալ երաժշտական կրթություն կստանայի: Որդիս էլ բացառիկ մաքուր է երգում, վստահորեն կարող եմ ասել, որ երկուսն էլ այսօրվա որոշ երգիչ-երգչուհիներից մաքուր են կենդանի երգում»,-նկատեց երգիչը:

Արսենը նաև ասաց, որ ոչ ինքն է  պարապել երեխաների հետ, ոչ էլ ինչ-որ դասերի են հաճախել, դա գենետիկ է. «Ես վոկալի դասերի սկսել եմ հաճախել 18 տարեկանից: Եթե աղջիկս ցանկանա, մյուս տարի կգնա դասերի: Շատ եմ կարևորում վոկալի դասերը, տաղանդը տաղանդ, բայց դասերը շատ կարևոր են: Առհասարակ, երեխաներիս փորձում եմ ազատ թողնել իրենց նախասիրությունների մեջ: Ես չեմ պարտադրում, հետևում եմ, բայց չեմ սիրում բռնանալ: Երեխաներիս սովորեցնում եմ, որ սիրով անեն այն, ինչ անում են: Իմ թաթիկը ոչ ոք չի բռնել ու տարել կայացման ուղով, ես էլ երեխաներինս չեմ բռնում»:

Մարիամ Խաչատրյան