«Մտածում էինք` չի կարողանա իրեն ճիշտ դրսևորել». Դերասան Արտաշես Մխիթարյանն ու կինը` Մարիամը, հանպատրաստից մկրտել են իրենց որդուն

Դրամատիկական թատրոնի փոխտնօրեն, դերասան Արտաշես Մխիթարյանն ու կինը` Մարիամը, օրերս մկրտել են իրենց որդուն` 3 տարեկան Մաքսիմին:
Tert.am Life-ի հետ զրույցում Արտաշեսը պատմել է, որ վաղուց էին ուզում մկրտել Մաքսիմին, բայց ամեն ինչ, չգիտես ինչու, հետաձգվում էր:

«Մեր հարսանիքի արարողակարգն արել էր Դիլիջանի Հաղարծին վանքի սբ. Աստվածածին եկեղեցու վանահայր Տեր Սամվել վարդապետ Մխիթարյանը: Այդ օրից ավանդույթ է դարձել ամեն տարի օգոստոսին նրան տեսության գնալը: Նախորդ տարիներին միշտ հարցնում էր, թե երբ ենք ցանկանում մկրտել մեր տղային, մենք ասում էինք, որ պատրաստ ենք, բայց այդպես էլ չէինք մկրտում: Երկու օր առաջ գնացինք նրան այցելության ու նորից բարձրացավ մեր տղային մկրտելու հարցը: Որոշեցինք հենց այդ օրն էլ մկրտել Մաքսին, քանի որ արդեն 3 տարեկան է»,-ասաց Արտաշեսը:

Փոքրիկի կնքահոր պարտականություններն է ստանձնել հենց Հայր Սամվելը: «Խաչ մեզ հետ չունեինք, արծաթից խաչ նվիրեց կնքահայրը, իսկ մենք մտածեցինք` այլևս ոչինչ պակաս չէ, մենք էլ վաղուց պատրաստ ենք: Մի քանի ժամ անց` երեկոյան, մկրտեցինք որդուս և նա ստացավ Դանիել անունը: Դանիելը ծառայել է հենց Հաղարծինի վանքում, նրա պատվին հուշաքար կա այնտեղ և շուտով հնարավոր է` Դանիելը դասվի սրբերի շարքին: Այսօր երկեոյան 6-ից հետո կանենք մյուռոնից հանելու արարողակարգը, և որդիս կհամարվի իսկական քրիստոնյա: Աստծո գործերն անքննելի են, մեր ոտքով գնացինք ու հանպատրաստից մկրտեցինք Մաքսին»,- նշեց Արտաշեսն ու նկատեց, որ հանպատրաստից ամեն ինչ ավելի լավ է ստացվել, քան եթե պատրաստվեին:

Հարցին, թե ինչպե՞ս է 3 տարեկան Մաքսիմն ընկալել մկրտության արարողությունը, Արտաշեսը պատասխանեց. «Մինչև մկրտությունը զբոսնեցինք եկեղեցու տարածքում, բացատրեցինք` ինչ են անելու իր հետ: Դեռ փոքր է, այդ գիտակցումը չունի, իր համար ամեն ինչ մի փոքր անսովոր էր, բայց լուռ հետևում էր արարողությանը` չնայած մենք մտածում էինք չի կարողանա իրեն ճիշտ դրսևորել: Ընթացքում կնքահոր հետ խաղի մեջ էր մտել»:

Խոսելով Մաքսիմի նախասիրությունների մասին` Արտաշեսն ասաց, որ երեխան 1,5 տարեկանից հաճախ թատրոն է գնում, ներկայացումներից հատվածներ դիտում, սիրում է երգ, պար:

«Նաև խաղեր է սիրում, ինչպես իր տարիքի բոլոր երեխաները: Երբ ես տուն եմ գալիս, նա մոռանում է ամեն ինչի մասին, աշխարհում միայն ես եմ լինում իր համար: Կինս էլ կատակում է, որ երբ ես տանն եմ, իրենք չկան Մաքսի համար: Հաճախ հորինում ենք ինչ-որ խաղեր, խաղում որոշ ժամանակ, հետո ուրիշ խաղեր ենք հորինում»:

Մարիամ Խաչատրյան