«Եթե նույնիսկ կոմունալները վճարելու գումար չունենայի, չէի բողոքի»․ Գագիկ Մկրտչյանը՝ կարանտինային շրջանը ֆինանսապես հաղթահարելու և 12 տարեկանից աշխատելու մասին

Դրամատիկական թատրոնի դերասան Գագիկ Մկրտչյանը կարանտինային շրջանում մոտ 20 օր չի աշխատել, բայց երբևիցե չի բողոքել այդ փաստից ու բարձրաձայնել դրա մասին:
Tert.am Life-ի հետ զրույցում Գագիկն ասաց, որ հոգեբանորեն այդ շրջանը բավականին հեշտ է հաղթահարել, իսկ ֆինանսապես հաղթահարել է իր տարիների կատարած աշխատանքի շնորհիվ:

«Ինչ էլ անեի, միևնույն է, մի օր կարող էի վարակվել, ինչքա՞ն պետք է մնայի տանը, 2-3 ամի՞ս: Կարանտինային շրջանում մոտ 20 օր չեմ աշխատել, բայց այդ շրջանում տանը յուղաներկով կտավի վրա նկարել սկսեցի: Ուսանողական տարիներին փորձել էի նկարել, բայց որպես հանձնարաություն, ոչ թե` հաճույքի համար,-ասաց նա և հավելեց, որ տեսակով դժգոհող չէ ու ճանաչում է մարդկանց, ովքեր նույնիսկ ամենավատ իրավիճակում դրականն են տարածում.-Նման մարդիկ ինձ ավելի են դուր գալիս, քան բողոքողները: Ես էլ միշտ փորձել եմ չբողոքել, եթե նույնիսկ կոմունալները վճարելու գումար չունենայի, չէի բողոքի: Ես տարիներ շարունակ աշխատել եմ, որ կարողանամ ինչ-որ կետի հասնել: Հենց դա ինձ օգնեց, որ կարանտինային շրջանը «յոլա տանեմ»»:

Գագիկի խոսքով` գուցե մի քիչ ավելի երկար ժամանակ չաշխատելու դեպքում սկսեր բարկանալ: Իր դաջվածքի սրահում անջատել են լույսը` գումարը չվճարելու պատճառով: «Այդ շրջանում պարզվեց, որ թեկուզ իմ դաջվածքի սրահը չի աշխատում, ես պետք է լույսի գումար վճարեմ: Չգիտեմ` ով դրա հետ կապ ունի, չի էլ հետաքրքրում, նման բաների մասին շատ քիչ եմ սիրում խոսել, բայց բարկացա ու սկսեցի աշխատել: Մանավանդ որ մարդիկ այդ շրջանում սթրեսի մեջ էին ու դաջվածք էին ուզում անել` իրենց կյանքում փոփոխություն մտցնելու նպատակով: Պահպանելով բոլոր կանոնները` աշխատեցի»:

Խոսելով կարանտինային շրջանում ընտանիքը պահելու համար այլ աշխատանքներով զբաղվելու մասին` Գագիկն ասաց. «Որպես ֆինանսի աղբյուր` կարանտինային շրջանում այլ աշխատանքներով չեմ զբաղվել: Եթե պետք լիներ, կարող էի նաև հավաքարար աշխատել, ինձ համար վատ աշխատանք չկա, քանի որ 12 տարեկանից տախտակներ եմ դատարկել օրը 1000 դրամով, շատ ուրիշ աշխատանքներ եմ արել ու այդ տարիները ժպիտով եմ հիշում, որովհետև ես որոշել էի` աշխատել»:

Հարցին, թե թույլ կտա՞ իր երեխաներն էլ սկսեն աշխատել այդքան վաղ տարիքից, Գագիկը պատասխանեց. «Իմ երեխաներին ոչինչ չեմ արգելում, ազատ եմ թողնում: Մեր հսկողության տակ են, բայց մեր թելադրանքով չեն ապրում, միայն երբեմն խորհուրդներ ենք տալիս: Իմ ծնողներն էլ երբեք չեն սահմանափակել իմ ազատությունը, եղել է, որ նույնիսկ չեն իմացել` ուր եմ եղել առավոտից: Դա վստահությունն է երեխայի հանդեպ, որ անձը ճիշտ ձևավորվի»:

Մարիամ Խաչատրյան