«Այն տունը, որն ունեի երկու օր առաջ, ինձ չէր տրամադրում տուն գնալ»․ Լիանա Վանոյանը՝ ինքնուրույն իր տունը վերանորոգելու, ավելորդ իրերից ազատվելու և կյանքի նոր փուլի մասին

Դերասանուհի Լիանա Վանոյանն օրերս ինքնուրույն վերանորոգել է իր տունը։ Tert.am Life–ի հետ զրույցում նա ասաց, որ առավոտյան սուրճ խմելիս է հասկացել՝ ուզում է տունը վերանորոգել։

«Քանի որ տեսակով անհամբեր եմ, որոշեցի, որ դա պետք է լինի մեկ օրում։ Ընկերուհուս հետ գնացինք շինանյութի խանութ, գնեցինք ներկն ու մյուս անհրաժեշտ պարագաները և եկանք տուն՝ պատերը ներկելու։ Գիշերը վերջացրինք ներկելու գործընթացն ու սկսեցին խնդիրները։ Ես չէի հաշվարկել, որ պետք է տունը կեղտոտվի, որ ես պրոֆեսիոնալ չեմ ու կյանքում առաջին անգամ էի փորձում։ Քանի որ ինձ օգնող չկար, կար միայն իմ ու ընկերուհուս ուժը, փորձեցինք մաքսիմալ ձևով լավ արդյունք ստանալ։ Ընկերներս արդեն կատակում եմ, որ ինձ համար այդ բնագավառի աշխատանք կգտնեն։ Հիմա նստած եմ բացարձակ վերանորոգված բնակարանում»,–ասաց նա։

Դերասանուհու խոսքով՝ վերանորոգումը սկսվում է տնից, վերջանում՝ կենցաղով և հոգում տիրող քաոսով։ «Ամեն անգամ պայուսակս բացելիս գիտեմ, թե կոնկրետ ինչ հոգեվիճակում եմ այդ օրը։ Եթե այնտեղ խառնաշփոթ է, իմ մեջ ևս խառնաշփոթ է։ Նույնը տան դեպքում է։ Այն տունը, որն ունեի երկու օր առաջ, ինձ չէր տրամադրում տուն գնալ։ Հիմա մտածում եմ, որ կարող եմ տնից աշխատել, ոչ թե, օրինակ, երևանյան սրճարաններից»։

Լիանան ընդգծեց, որ արագ է որոշումներ կայացնում, երբ դրանք իրեն են վերբերվում, իսկ դիմացինի անձի հետ կապված որոշումները դանդաղ է կայացնում, երկար մտածում։

«Երբեք չեմ փոշմանում իմ որոշումների համար։ Իհարկե, կյանքում բացառություններ լինում են, բայց արածից հետո փոշմանելն անիմաստ է։ Վերանորոգումից հետո որոշել եմ իմ արտաքինում ևս փոփոխություններ անել, ուզում եմ մազերս ներկել։ Ասում են, երբ կինն ուզում է մազերը ներկել, ուրեմն՝ նրա կյանքում ինչ–որ բանի պակաս կա։ Ես հակառակն եմ մտածում։ Եթե կինը խաղաղության մեջ է, իրեն հետաքրքիր է այլ կերպ լինելը, որ ինքն իրեն չհոգնեցնի, որ ամեն օր հայելու դիմաց նայելիս չմտածի, թե ինչքան կարելի է տեսնել հետևի կեղտոտ պատը»,–նշեց նա։

Դերասանուհին շեշտեց, որ կեղտոտ պատի նմանությամբ մարդիկ իրենց կյանքում հանդուրժում են այն մարդկանց, ովքեր փչացնում են իրենց մթնոլորտը։

«Նրանց չենք վերանորոգում, չենք հեռացնում, բայց հանդուրժում ենք։ Իմ կյանքում լրիվ նոր փուլ է, ինձ խաղաղության մեջ եմ զգում։ Երբ դեռ պատերը չէի ներկել, տպավորություն էր, որ իմ հոգեվիճակն իմ տան պատերիր նման էր։ Վերանորոգումից հետո այնքան իրեր եմ նետել աղբը, որոնք տարիներ շարունակ պահում էի։ Դրանք իրենց մեջ կրում էին պատմություններ՝ կապված ինչ–որ մարդկանց հետ։ Բայց եթե մարդն այլևս քո կյանքում չկա, ի՞նչ իմաստ ունի պահել այդ իրերը։ Մեկ ժամում հավաքեցի այն ամենը, ինչն ինձ հանգարում էր ու դեն նետեցի։ Հիմա իմ կյանքում շաբաթօրյակ է՝ բոլոր առումներով»,–ասաց Լիանան։

Նկատառմանը, որ մարդկանց դեպքում բաժանումը մի փոքր բարդ է, Լիանան պատասխանեց․ «Կան մարդիկ, ովքեր ունեն պիտանելիության ժամկետ։ Երբ մարդը գալիս է քո կյանք, տալիս է ինչ–որ բան կամ վերցնում, նրա առաքելությունը վերջանալուն պես այդ մարդը պետք է գնա։ Երբ չես թողնում նրան գնալ կամ ինքը չի գնում, դատարկություն է տիրում։ Պետք է հեռացնես նրան, որ նոր մարդ գա։ Կյանքում հեշտ կամ դժվար բաներ չկան, ամեն ինչ ցանկության հետ է կապված։ 7 տարի սովորել եմ երաժշտական դպրոցում, բայց դաշնամուրին չեմ տիրապետում։ Դժվար չէր, ես ցանկություն չունեի։ Իսկ մեկ գիշերվա ընթացքում վերանորոգեցի բնակարանս»։

Մարիամ Խաչատրյան