«Վախենում էի, որ Լիլիթն ամեն ինչ կիմանա». Ներսես Ավետիսյանը`անակնկալ ամուսնության, 6 ժամ անձրևի տակ պարելու և Բալիում չեղարկված հարսանիքի մասին

EXCLUSIVE

Tert.am Life-ն իր ընթերցողներին արդեն հայտնել է, որ դերասան Ներսես Ավետիսյանը օգոստոսի 22-ին Գառնու տաճարի մոտ ամուսնության առաջարկություն է արել սիրելիին` Լիլիթին: Նրա դրական պատասխանից հետո Գառնու տաճարի մոտակայքում տեղի է ունեցել նաև ամուսնության գրանցման արարողությունը:

Օրվա բացառիկ մանրամասները Ներսեսը վստահել է Tert.am Life-ին ու պատմել անակնկալ առաջարկության, անձրևի տակ 6 ժամ պարելու, Բալիում չեղարկված հարսանիքի մասին, իր ու Լիլիթի ծանոթության պատմության մասին, ինչպես նաև տրամադրել լուսանկարներ հարսանիքից:

Դերասանն ասաց, որ հարսանիքը, որի մասին Լիլիթը տեղյակ էր, պլանավորված էր անցկացնել հուլիսին Բալիում` մի քանի ընկերների հետ:
«Քանի որ կորոնավիրուսն առաջ եկավ, որոշեցի այսպիսի անակնկալ անել: Միգուցե, արտերկրում կտոնենք մեր ամուսնության 1-ամյակը,-ասաց նա և պարզաբանեց, որ իր` Միացյալ Նահանգներից վերադառնալուց հետո ամեն օր աշխատել են անակնկալի ուղղությամբ: -Ամեն ինչ շատ ինքնաբուխ էր, բայց մանրակրկիտ մտածված: Շատ անքուն գիշերներներ ենք անցկացրել ընկերներիս հետ, որ այդ ամենը ճիշտ կազմակերպենք: Անընդհատ վախենում էի, որ Լիլիթը կիմանա ամեն ինչ, ամեն օր «փշերի վրա» էի Լիլիթի հետ խոսելիս, բայց նա այդպես էլ ոչինչ չիմացավ մինչև վերջին պահը»:

Ներսեսի խոսքով` Լիլիթին նախապես զգեստ է ուղարկել ու հրահանգներ, թե որ ժամին ուր պետք է գնա. «Նա Երևանից ուղղաթիռով եկավ Գառնի, որտեղ էլ արեցի առաջարկությունը: Երբ հիմա հարցնում եմ, թե հրահանգները տեսնելիս ինչ է մտածել, Լիլիթն ասում է, որ միայն ամուսնության առաջարկության մասին է ենթադրել, բայց որ նաև կամուսնանայինք, չի մտածել: Դրական պատասխանից հետո տվեցի հարսի զգեստն ու ասացի` հագիր և արի ամուսնության գրանցման արարողությանը, որը ևս Գառնու տաճարի տարածքում էր»:

Ամուսնությունը գրանցելուց հետո զույգն օրը նշել է բացօթյա ռեստորանում: «Համաճարակային իրավիճակով պայմանավորված` հրավիրել էի միայն ամենամտերիմ մարդկանց: Քանի որ բոլորս էլ խենթ ենք, անձրևի տակ մոտ 6 ժամ պարել ենք: Ճիշտ է, հիմա մի փոքր ոսկորի ցավ ունենք, բայց ոչինչ: Անձրևի տակ այդպես մեկ էլ պարել էինք, երևի, 2015-ի ապրիլի 23-ին` System of a down-ի համերգի ժամանակ: Իրականում, ես ինձ վատ եմ զգում, երբ անձրևից հագուստս թրջվում է, բայց այդ պահին ամեն ինչ խելահեղ էր: Այդ օրը նաև երգ նվիրեցի Լիլիթին, որը հատուկ նրա համար էր գրված: Երգի խոսքերը գրել էի ընկերոջս` Արտակի հետ միասին: Այս տարին աշխարհի համար վատագույն, իսկ մեզ համար լավագույն տարին է»,-նշեց Ներսեսը:

Հարցին, թե ինչպե՞ս է Լիլիթն արձագանքել մեկ օրվա ընթացքում էմոցիաների այդպիսի տեղատարափին, Ներսեսը պատասխանեց. «Լիլիթը զուսպ է, սենտիմենտալը ես եմ: 3 տարվա ընթացքում մեծ առաջընթաց ունենք էմոցիաների հարցում, բայց դեռ ես եմ ամենաէմոցիանալը»:

Դերասանն ամեն ինչ ընտրել է ընկերների օգնությամբ կամ Լիլիթին հարցնելով, օրինակ, հետագայում ամուսնանալու դեպքում ի՞նչ մատանի, զգեստ է ցանկանում ունենալ: «Ուզում էի, որ ամեն ինչ նաև Լիլիթի սրտով լինի: Միայն մատանին է մի փոքր մեծ: Որքան էլ ամենափոքրն ընտրեցի, բայց մեծ ստացվեց»,-ասաց նա:

Խոսելով իր ու Լիլիթի ծանոթության մասին` Ներսեսն ասաց, որ ծանոթացել են 2017 թվականին։ «Բուլղարիայում մասնակցում էինք մի նախագծի: Այդ ճամփորդության ընթացքում մեր մեջ ինչ-որ բան ծնվեց: Դրանից հետո երկուսս էլ մեկ այլ նախագծի շրջանակում մեկնեցինք Կենտրոնական Եվրոպա` շրջագայության: Այդ ընթացքում ինձ համար արդեն պարզ էր, որ նա իմ կինն է լինելու»,- պատմեց նա։

Մարիամ Խաչատրյան