«Թեև միշտ տղա ունենալու ցանկություն եմ ունեցել, աղջիկների հայր լինելը երջանկություն է». Ժակը`ամուսնության 16-ամյակի և երեխաների մասին

Հաղորդավար Ժակը և կինը` Էվելինան, երեկ նշել են ամուսնության 16-ամյակը: Այս առիթով Tert.am Life–ը հետաքրքիր զրույց է ունեցել Ժակի հետ, ով պատմել է, թե ինչպես են նշել օրը, վերհիշել է իրենց ծանոթությունն ու հարսանիքը, խոսել երեխաների` Սիլվիայի և Ժակլինի մասին:

Ժակն ասաց, որ տոնական օրը երկուսով են նշել. «Գնացինք սրճարան` մի փոքր ընդգծված տրամադրությամբ: 16 տարվա ամուսնական կյանքը հաշվի առնելով` սովորական երեկոյից փախչելն արդեն տոնել է նշանակում,-ասաց նա ու վերհիշեց, որ ամենատպավորիչը նշել են իրենց ամուսնության 10-ամյակը,-Այդ տարի Փարիզ գնացինք: «Հաղթական կամար» գրքից տպավորված` շրջեցինք հավերժ սիրո քաղաքի փողոցներով: Ենթադրություններ անելը լավ բան չէ, բայց հետաքրքիր կնշենք թե՛ 30-ամյակը, թե՛ 40-ը: Կարևոր է նշանավորել այն փաստը, որ երկուսով միլիարդավոր մարդկանց մեջ գտել եք իրար, դիմանում եք, սիրում, օգնում»: 

Ժակն ու Լինան առաջին անգամ հանդիպել են 2001 թվականին ռադիոկայաններից մեկում. «Գնացել էի ռադիոկայան` աշխատանքի ընդունվելու համար, իսկ Լինան այդտեղ մի գրասենյակում էր աշխատում, այդպես ծանոթացանք,-ասաց նա և հավելեց, որ կնոջը գրավել է իր ոճով, հետաքրքրություններով,-Այդ տարիներին ինձ լսող ռադիոունկնդիրը միայն ձանով էր ճանաչում, իսկ Լինան ինձ լսելու, տեսնելու ու միարժամանակ չհիասթափվելու առիթ ուներ: Իսկ եթե լուրջ, երկուսս էլ ներքուստ զգացել ենք, որ նման ենք միմյանց : Լինայի մեջ ինձ հեցն սկզբից գրավեց ներքին կրակը, որին մոտենալիս ինքս էլ բոցավառվում եմ»:

Զույգի հարսանիքը տեղի է ունեցել 2004 թվականին. «Ունեցել ենք հայկական ավանդական հարսանիք, որին ներկա էին մեր հարազատները, ռադիոկայանի ընկերներս: Հասցրինք նույնիսկ ԶԱԳՍ-ի գրանցման արարողությունը կազմակերպել: Հետո գնացինք մեղրամսի` արտերկիր»:

Ժակի խոսքով` ինքն ու կինը ընտանեկան խնդիրները լուծելու իրենց բանաձևն ունեն. «Կոմպրոմիսի գնալով, մարդկային որակներով, իրար հասկանալով կարողացել ենք սուր անկյունները հաղթահարել: Դժվարություններ, իհարկե, եղել են, բայց փորձել ենք միմյանց լսել, օգնել: Ես բնույթով նրբանկատ եմ և ուշադիր, իսկ կինս ներող ու հասկացող է: Ես կարողանում եմ հնարավորինս խուսափել խնդիր առաջացնող իրավիճակներից, բայց եթե նույնիսկ չի ստացվում, կինս փորձում է այլ կերպ լուծել խնդիրը, մաքսիմում երկու օր ամպեր են կուտակվում մեր վերևում և վերջ»:

Հարցին, թե հաճա՞խ է կնոջը սեր խոստովանում, Ժակը պատասխանեց. «Քանի որ խոսքն իմ աշխատանքային գործիքն է, այն անձնական կյանքում չեմ կարողանում շեշտադրել ու կիրառել: Ավելի շատ մոտեցումներով, գործերով եմ սեր խոստովանում` չնայած հակառակ կողմից մեղադրանքներ կան, որ մեկ-մեկ պետք է խոսքերով արտայհայտեմ սերը: Մեկ-մեկ արտահայտում եմ, բայց կանանց համար դա քիչ է»:

Հաղորդավարը երկու դուստր ունի: Ավագ դուստրը` Սիլվիան, շուտով 16 տարեկան կդառնա, ըստ Ժակի` իրեն շատ նման է. «Թեև միշտ տղա ունենալու ցանկություն եմ ունեցել, որ ազգանունս շարունակվի, աղջիկների հայր լինելը երջանկություն է: Մեծ աղջիկս ներսում ստեղծագործ գիծ ունի, նկարում է, ոճաբանության, դիզայնի հետ սեր ունի ու սրտով ուզում է ստեղծագործական ուղղությամբ շարունակել: Ուղեղով մտածում է, որ պետք է ունենա պրակտիկ մասնագիտություն ու դիմի Հայաստանի ամերիկյան համալսարան: Չգիտեմ հետո ինչ կլինի, ժամանակը ցույց կտա, թե որ ուղղությունը կընտրի, հիմա դեռ ավագ դպրոցի սան է,-ասաց նա` ընգծելով, որ փոքր դուստրը` 4-ամյա Ժակլինը, Սիլվիայից շատ տարբեր է,-Ժակլինը լրիվ այլ բնավորություն ունի: Այն երեխաներից է, որ մեզ մեծ հանձագործ կզգանք, եթե երաժշտական կամ թատերական որևէ խմբակ չհաճախի: Մեկ բառով` արտիստ է: Նրա անունը հետաքրքիր պատմություն ունի: Իմ ու կնոջս անունների խառնուրդն է` Ժակ և Լինա` Ժակլին: Մտքի հեղինակն էլ կինս է»:

Մարիամ Խաչատրյան