«Փորձում եմ լինել այնտեղ, որտեղ կա ճաշակ և մակարդակ». Նարինե Պետրոսյանի տարբերվող ֆոտոշարքն ու դադարի պատճառը

Դրամատիկական թատրոնի դերասանուհի Նարինե Պետրոսյանն արդեն 7 ամիս է` թատրոնում չի խաղում: Tert.am Life-ի հետ զրույցում նա ասաց, որ կարանտինի սկզբնական շրջանում հանգստի կարիք ուներ ու վայելում էր իրավիճակը, հիմա արդեն տեղը չի գտնում:

«Այսքան տարի բեմում եմ, նման երկար դադար չէի ունեցել, անսովոր է: Ներկայացումների բուռն շրջանում ամսական 9 ներկայացում եմ խաղում: Թատրոնի տեղը ոչնչով չես կարող լրացնել: Իհարկե, կարող ես զբաղվել ինքնակրթությամբ, այլ նախագծով, բայց նույնը չեն: Կան թատրոններ, որոնք բացօթյա ներկայացումներ են բեմադրում, ցավոք, մեր թատրոնն այդ հնարավորությունը չունի»,-ասաց նա:

Նարինեի խոսքով` արդեն մի քանի ամիս է` ներկայացման փորձեր են անում. «Հիմա, իհարկե, փորձերն ավելի ակտիվ փուլում են: Մենք պատրաստ սպասում ենք, որպեսզի թույլ տան խաղալ: Թատրոնը գործող էակ է ու պետք է բնականոն ռիթմի մեջ լինի: Երկար չխաղալու դեպքում դերասանն էլ, այսպես ասած, լավ մարզավիճակում չի լինում: Առաջ ես շաբաթական 4 օր փորձի է, մյուս 3 օրն արդեն ներկայացումներ էի խաղում: Փորձում եմ սպորտով զբաղվել, խոսքային վարժություններ անել, որպեսզի աշխատանքային վիճակում լինեմ»:

Դերասանուհին օրերս նոր ֆոտոշարք է իրականացրել, որի ընթացքում համագործակցել է լուսանկարիչ Արամ Վարժապետյանի և հագուստի նկարիչ Նարինե Սահակյանի հետ: Ըստ նրա` ոգեշնչվել են միջնադարը ներկայացնող ֆիլմերից, Յան Վերմեերի, Ռեմբրանտի գործերից:

«Կարծես, ինչ-որ կտավի մեջ լինեմ, մեկ-երկու նկարներ էլ ինձ ֆիլմեր են հիշեցնում, օրինակ` The young pope ֆիլմը: Տարբեր ժամանակաշրջանների գեղանկարչության հանդեպ սեր ունեմ, երբ հագուստի օրինակը տեսա, մտովի միանգամից գնացի միջնադար: Չունեի նմանատիպ ֆոտոշարք, այսպիսի դերում դժվար թե լինեմ որևէ ներկայացման կամ ֆիլմի մեջ»,-ասաց նա:

Հարցին, թե ինչո՞ւ է դերասանուհին եթերում դադարներով հայտնվում, Նարինեն պատասխանեց. «Պարբերաբար առաջարկներ են լինում, բայց արդեն երևի առաջարկողներն էլ գիտեն` իրենց նախագիծը ինձ համապատասխանո՞ւմ է, թե՞ ոչ: Ես ունեմ մի քանի կետ, երբ դրանք բացակայում են, առաջարկը չեմ ընդունում: Պետք է նախագծի սցենարը լավը լինի, գրագետ հիմք ունենա, ոչ թե տարիներով ձգվի: Եթե նախագիծն ինձ չի գոհացնում, չեմ ցանկանում դրա վրա ժամանակ ծախսել: Փորձում եմ լինել այնտեղ, որտեղ կա ճաշակ և մակարդակ: Եթե լինի լավ գեղարվեստական ֆիլմ, նախագիծ, սիրով կհամաձայնեմ, բայց այս պահին նման առաջարկ չկա»: 

Դերասանուհին ասաց, որ նկարահանումների ընթացքը կարոտում է, բայց չի ուզում ուղղակի լինել տեսախցկի առաջ: «Ցավում եմ, որ իմ պատկերացրած որակն ունեցող նախագծերը Հայաստանում քիչ են, բայց տեսնում եմ, որ քայլեր արվում են դրանք շատացնելու ուղղությամբ: Վերջին երկու տարիների ընթացքում շատ գրական ստեղծագործությունների հիման վրա հեռուտադրամաներ նկարահանվեցին: Թվում է` չկա լսարան, որը նման նախագծերը կդիտի, որովհետև մարդիկ սովոր են գռեհկությանը, ցածր ճաշակին, փողոցային հումորին, բայց, օրինակ, «Վերջին ուսուցիչը» նախագիծն ինչքան մեծ արձագանք գտավ: Ճիշտ է, ինքս այդ նախագծում զբաղվածություն չունեի, բայց հրաշալի նախագիծ էր»,- ասաց նա:

Մարիամ Խաչատրյան