Եղանակն՝ այսօր
Ճարտարապետներն անթույլատելի են համարում «Հրազդան» մարզադաշտի տարածքում առևտրի կենտրոնի կառուցումը
«Հրազդան» մարզադաշտի տարածքում 20 մետր բարձրությամբ առևտրի կենտրոնի կառուցումը կվտանգի մարզադաշտի գոյությունը։ «Դա մեծ խոչընդոտներ կառաջացնի «Հրազդան» մարզադաշտի հետագա շահագործման համար, կստեղծի վթարային վիճակ, քանի որ այդ կենտրոնը կառուցվելու է մարզադաշտի էվակուացիոն մասում»,- այսօր լրագրողների հետ հանդիպմանն ասաց ճարտարապետ Մկրտիչ Մինասյանը:
Նրա խոսքով` սպորտային բնույթի կառույցին հարող հասարակական տարածքը այսպիսով վերածվում է առևտրային գործառույթ իրականացնող մասնավոր օբյեկտի: Ըստ Մկրտիչ Մինասյանի` հետո կկառուցվեն նաև հյուրանոցներ, սրճարաններ և վտանգի տակ կդրվի թե կառույցի, թե մարդկանց անվտանգությունը:
Ճարտարապետ Գուրգեն Մուշեղյանը նշեց, որ կան հստակ ուսումնասիրություններ, նորմեր, թե որքան ժամանակ է պահանջվում «Հրազդան» մարզադաշտում արտակարգ պատահարի դեպքում մարդկանց տարհանման համար: Նրա խոսքով` Արտակարգ իրավիճակների նախարարությունը բացասական եզրակացություն է տվել, համաձայն որի` անթույլատրելի է մարդկանց տարհանման տարածքում նոր առևտրային կենտրոնի շահագործումը:
«Հուսով եմ՝ հայկական ֆուտբոլը վերելք կապրի, այդ դեպքում տարածքի սեփականատերերը պիտի մտածեն ոչ թե առևտրի կենտրոն կառուցելու, այլ ամբողջ տարածքը անվտանգ դարձնելու մասին»,- ասաց Գուրգեն Մուշեղյանը:
Ճարտարապետների միության նախագահ Ռուբեն Հասրաթյանն իր հերթին նշեց, որ «Հրազդան» մարզադաշտը Երևանի բրենդերից մեկն է, քիչ-քիչ Երևանի ողնաշարն է քանդվում, գլխավոր հատակագիծն է խախտվում, և ճարտարապետներն իրենց պարտքն են համարում բարձրաձայնել դրա մասին:
«Մարդիկ կան, որ ի պաշտոնե սխալ խորհուրդներ են տալիս, սխալ որոշումներ կայացնում, որոնք հղի են սարսափելի հետևանքներով, նրանք ավելի շատ են մեղավոր, քան այն սեփականատերերը, որ առևտրի կենտրոն են կառուցում, մեր խնդիրն է` պահպանել մեր կառույցները, որ սեփականատերերն էլ նպատակային օգտագործեն իրենց սեփականությունը»,- ասաց Ռուբեն Հասրաթյանը:
Studio One