Ջեյմս Քեմերոնի հետ երևանյան հանդիպումն ու համերգը չեղարկվել են

16:45 • 17.11.26

Երևանում նոյեմբերի 23-ին նախատեսված Ջեյմս Քեմերոնի հետ հանդիպումն ու համերգը չեղարկվել են։ Մինչ այդ միջոցառման մասին հրապարակված հայտարարություններում որպես նախաձեռնող նշվում էր Երևանի քաղաքապետարանը, իսկ կազմակերպիչ՝ Mezzo Production-ը։

Չեղարկման մասին տարածված հաղորդագրության մեջ կազմակերպիչները ներողություն են խնդրել պատճառված անհարմարության համար և հայտնել, որ տոմսերի գումարն ավտոմատ կվերադարձվի գնորդներին՝ հինգ աշխատանքային օրվա ընթացքում։ Չեղարկման պատճառների մասին խոստացել են առաջիկա օրերին լրացուցիչ պարզաբանումներ տրամադրել։

70-ամյա կանադացի կինոռեժիսոր, սցենարիստ և պրոդյուսեր Ջեյմս Քեմերոնը Հոլիվուդի ամենահայտնի հեղինակներից է։ Քեմերոնի ամենահայտնի ֆիլմերից են «Տերմինատորը», «Տերմինատոր 2»-ը, «Տիտանիկը» և «Ավատարը»։ «Տիտանիկը» 1998-ին «Օսկարի» 14 անվանակարգից հաղթել է 11-ում, այդ թվում՝ լավագույն ֆիլմի, ռեժիսորի և մոնտաժի համար։ «Ավատարը» ստացել է երեք «Օսկար»։

Բացի կինոյից՝ Քեմերոնը հայտնի է նաև օվկիանոսների խորքերի ուսումնասիրությամբ։ 2012 թվականին նա հատուկ նախագծված սուզանավով միայնակ հասել է Մարիանյան իջվածքի Չելենջեր Դիփ հատվածի հատակին՝ Երկրի օվկիանոսների ամենախոր հայտնի կետին։ Նա նաև National Geographic-ի հետազոտող է և զբաղվում է բնապահպանական խնդիրներով։