Հանուն երևանյան պատմական շենքի՝ երիտասարդները գամվել են պատին (տեսանյութ)

Մայրաքաղաքի իշխանությունները որոշել են քանդել քաղաքի կենտրոնում գտնվող հին շենքերից մեկն ու դրա հաշվին մեծացնել Արամի և Աբովյան փողոցների խաչմերուկը: Պատմական շենքում 20-րդ դարում բնակվել են տասնյակ ականավոր գործիչներ, սակայն այսօր շենքը ներառված չէ Ճարտարապետական բացառիկ արժեք ներկայացնող կառույցների ցանկում: Շենքը որոշել են պահպանել երիտասարդ ակտիվիստները:

Արամի և Աբովյան փողոցների խաչմերուկում գտնվող փոքրիկ սրճարանի պատին իրենց գամած երիտասարդներից շատերը մինչ այս իրար չէին ճանաչում: Ծանոթացել են Facebook-ով: Այս կարմիր տնակը ոչ միայն նրանցից շատերի սիրելի ժամանցի վայրն է, այլև հարազատ քաղաքի հին անկյուններից մեկը: Քաղաքային իշխանությունները որոշել են քանդել այն ու լայնացնել փողոցը: Այստեղ հավաքված երիտասարդները դրան դեմ են: Երիտասարդ ակտիվիստ Արմինե Գրիգորյանը ԱՄՆ-ի քաղաքացի է: Արևմտյան Հայաստանով բազմիցս է ճամփորդել։ Պատմում է, որ տեսել է, թե ինչպիսի բարբարոսությամբ են թուրքերը վերաբերվում հայկական հուշարձաններին: Հայերի ինքնության մասին վկայող ցանկացած շինություն թանկ է նրա համար: Այսօր Արմինեն այստեղ է պատմությունը պահպանելու համար:

Ամերիկահայ Արմինեի կողքին կանգնած է ազգությամբ ռուս Ելենան: 3 ամիս է, ինչ Հայաստանում է: Այստեղ աշխատանքի բերումով է եկել: Սիրահարվել է քաղաքին և որոշել ընդմիշտ մնալ: Մեզ հետ զրույցում անկեղծանում է` կուզենար, որ իր երեխաներն այստեղ ծնվեին: Նա սիրով միացել է իր նոր հայ ընկերների նախաձեռնությանը:

Ակցիայի մասնակիցների թիվն աճեց շատ կարճ ժամանակում: Պատին գամված ակտիվիստների շարանի մի ծայրը սկսվելով Արամի փողոցում շարունակվում է Աբովյանով: Սոցիալական կայքում երիտասարդների տարածած կոչին այս անգամ արձագանքել են նաև քաղաքապետարանի աշխատակիցերը: Ակտիվիստների հետ բանակցության էր եկել քաղաքապետարանի ավագանու քաղաքաշինության հանձնաժողովի նախագան Հրայր Պողոսյանը: Այսօր ակցիայի մասնակիցներին Երևանի քաղաքապետի հանձնարարությամբ տեղում հանդիպել են մայրաքաղաքի Կենտրոն վարչական շրջանի ղեկավար Գագիկ Գյանջումյանը և Երևանի ավագանու քաղաքաշինության հանձնաժողովի նախագահ Հրաչիկ Պողոսյանը: Վերջիններս մասնավորապես նշել են, որ տվյալ տարածքը ՀՀ կառավարության 2008 թ. նոյեմբերի 20-ի որոշմամբ ճանաչվել է որպես բացառիկ` գերակա հանրային շահ և հայտարարվել է իրացման գոտի: Ձեռք բերված պայմանավորվածության համաձայն, նոյեմբերի 24-ին կողմերը հանդիպել են Կենտրոն վարչական շրջանի աշխատակազմում, որին մասնակցել է նաև տվյալ հատվածում կառուցապատման նախագծի հեղինակ, ճարտարապետ Աշոտ Ալեքսանյանը: Լսելով հասարակական նախաձեռնությունների անդամների կարծիքները` Աշոտ Ալեքսանյանը նշել է, որ խնդրո առարկա շինությունը ընդգրկված չէ Ճարտարապետական բացառիկ արժեք ներկայացնող կառույցների ցանկում: Ընդգծվել է, որ տարածքի իրացման վերաբերյալ կա կառավարության որոշում: