Նախընտրական խոստումներ՝ Հայաստանի գիտությանը

Այսօր հայաստանյան տարբեր քաղաքական ուժերի ներկայացուցիչներ «Հայաստանի քաղաքական ուժերի ծրագրերը և դիրքորոշումները՝ ՀՀ-ում գիտության ֆինանսավորման և գիտության զարգացման հեռանկարների վերաբերյալ» թեմայով քննարկման ներկայացրեցին իրենց տեսակետները:

Հայ հեղափոխական դաշնակցություն խմբակցության պատգամավոր Արծվիկ Մինասյանը նշեց, որ իրենք գիտության ոլորտի բարեփոխման համար պայքարել են նաև այս գումարման խորհրդանում, սակայն քանի որ քաղաքական փոքրամասնության ներկայացուցիչ են եղել, մոտեցումները առաջ տանելու հնարավորություն չեն ունեցել: «Մեր նախընտրական ծրագրում կարմիր թելով գնում է գիտելիքահենք տնտեսության կառուցումը»:

Արծվիկ Մինասյանի խոսքերով, ՀՅԴ ծրագրով նախատեսվում է գիտության ֆինանսավորումը ավելացնել տասն անգամ` հասցնելով ՀՆԱ-ի նվազագույնը մեկ, իսկ միջին ժամկետում` երկու տոկոսի:

«Բարգավաճ Հայաստան» կուսակցության քաղխորհրդի անդամ Միքայել Մելքումյանը նշեց, ԲՀԿ ծրագրով նույնպես ամրագրված է, որ գիտությանը հատկացվող ՀՆԱ-ի 0,27 տոկոսը, որ կա վերջին 5 տարիների ընթացքում, պետք է անպայման փոխվի: «Մենք նույնպես կողմնակից ենք, որ այն մոտեցվի 1-2 տոկոսի` հենց առաջիկա տարվա ընթացքում, իսկ 5 տարվա ընթացքում հասնի 4-5 տոկոսի»,- ասաց նա:

ԲՀԿ ներկայացուցիչը նաև նշեց, որ պետք է հարկային արտոնություններ տրամադրել գիտական ոլորտին: «Իհարկե, հեռու ենք այն մտքից, որ պետությունն ամբողջապես իր վրա պետք է վերցնի գիտության ֆինանսավորումը, սակայն պետության պարտքն է պետություն-մասնավոր հատված համագործակցության շրջանակներում այնպիսի ձեռնտու դաշտ ձևավորել, որ գիտության մեջ փող դնելը ձեռնտու լինի»,- նշեց նա:

«Օրինաց երկիր» կուսակցության ներկայացուցիչ Հովհաննես Վահանյանը նշեց, որ իրենք առաջարկում են ստեղծել կարիերայի կենտրոններ, որտեղ գրանցված՝ արտերկրում սովորած ուսանողներին կտեղավորեն աշխատանքի: «Նախատեսում ենք բյուջետային ոլորտների աշխատակիցների` գիտնականների, ուսուցիչների, բժիշկների, մշակութային գործիչների և այլ բնագավառների աշխատակիցների աշխատավարձերի հետևողական բարձրացման միջոցով հասցնել պետական ծառայողի մակարդակին»,- ասաց նա:

ՕԵԿ ներկայացուցիչը նաև կարևորեց, որ երիտասարդ գիտնականներն առանց կանխավճարի բնակարան գնելու հնարավորություն ունենան:

Հայ ազգային կոնգրեսի գիտության և կրթության հանձնախմբի համակարգող Սամվել Կարաբեկյանը նշեց, որ Կոնգրեսի ծրագրով նախատեսվում է գիտությանը տրամադրվող ՀՆԱ-ի տոկոսը դարձնել մեկ, իսկ հետագայում երկու տոկոս: «Բայց մենք հասկանում ենք, որ եթե անգամ հայթայթվեն միջոցներ և անմիջապես ներդրվեն գիտության մեջ, ոլորտի կառավարման այս համակարգի պայմաններում նույն արագությամբ մսխվելու են նաև այդ միջոցները և չեն հասնելու նպատակային գիտնականին և ստեղծագործողին: Մեր ծրագրի հիմնական խնդիրներից մեկն էլ լինելու է ոլորտի կառավարման համակարգը փոխելը»,- ասաց նա:

«Ժառանգություն» կուսակցության մամուլի խոսնակ Հովսեփ Խուրշուդյանը տեղեկացրեց, որ իրենց նախընտրական ծրագրում գիտության զարգացման նվազագույն շեմը պետք է հենց հաջորդ տարվա պետբյուջեով պետք է հասնի մինչև երեք տոկոսի:

«Ներկա իշխանությունը լավ էլ հասկանում է, թե ինչ է նշանակում գիտության ֆինանսավորման և գիտնականների թվի մեծացումը, և ինչ վտանգ դա կարող է ներկայացնել գործող իշխանության համար, որովհետև գիտնականներին ավելի դժվար է կառավարել և հնազանդեցնել: Այստեղ կա նաև քաղաքականություն»,- ասաց նա: