Ինչպե՞ս կքվեարկեն կուսակցությունները Օսկանյանի հարցով միջնորդությանը. արձագանքներ քաղաքական ուժերից

Երկուշաբթի օրը «Բարգավաճ Հայաստան» կուսակցության պատգամավոր, ՀՀ նախկին արտգործնախարար Վարդան Օսկանյանին որպես մեղադրյալ ներգրավելու մասին Գլխավոր դատախազի միջնորդության քննարկումից հետո հրավիրվելիք նիստում «Ժառանգություն» կուսակցությունը քննարկման արդյունքում կձևավորվի միասնական մոտեցում և կորոշի, թե ինչպես քվեարկել այդ միջնորդությանը, այս մասին Tert.am–ին տեղեկացրեց «Ժառանգություն» խորհրդարանական խմբակցության ղեկավար Ռուբեն Հակոբյանը։


«Նախևառաջ, քաղաքական մոտեցում կլինի, որովհետև որքան էլ՝ նույնիսկ եթե հիպոթետիկ ընդունենք, որ ներկայացվող փաստերը համապատասխանում են իրականությանը, շատ տեսանելի է, որ մոտեցումը հատվածական է»,– ասաց նա՝ պատասխանելով մեր այն հարցին, թե հնարավո՞ր է, որ քվեարկությունը թողնվի խղճի մտոք:


«Այսինքն՝ ընտրովի է այդ մոտեցումը և դրա մեջ հնարավոր չէ չտեսնել քաղաքական դրդապատճառներ»,- ավելացրեց պատգամավորը։


Ռուբեն Հակոբյանն ընդգծեց, որ Վարդան Օսկանյանի գործի հետ կապված իր ունեցած տեղեկատվությունն իրեն թույլ է տալիս ասել, որ «Ժառանգությունը» կա՛մ դեմ կքվեարկի, կա՛մ ընդհանրապես այդ քվեարկությանը չի մասնակցի:


Հիշեցնենք, որ երեկ հայտնի դարձավ, որ ՀՀ գլխավոր դատախազ Աղվան Հովսեփյանը հաջորդ երկուշաբթի մեկնարկող ԱԺ հերթական քառօրյային մտնելու է ԱԺ՝ Վարդան Օսկանյանին Ազգային անվտանգության ծառայության քննչական վարչության վարույթում քննվող քրեական գործով որպես մեղադրյալ ներգրավելու համաձայնություն տալու միջնորդությամբ:


Ազգային ժողովում միջնորդագիրը քննարկվում է հետևյալ կարգով՝ մինչև 20 րոպե տևողությամբ ելույթով հանդես են գալիս Գլխավոր դատախազը և միջնորդագրում նշված պատգամավորը, պատասխանում պատգամավորների հարցերին, ապա ընթանում է մտքերի փոխանակություն պատգամավորների մասնակցությամբ:

Դրանից հետո պատգամավորին ձերբակալելու, որպես մեղադրյալ ներգրավելու, կալանավորելու կամ նրա նկատմամբ դատական կարգով վարչական պատասխանատվության ենթարկելու հարցով կազմակերպվում է փակ, գաղտնի քվեարկություն:


Որոշումներն ընդունվում են քվեարկությանը մասնակցած պատգամավորների ձայների մեծամասնությամբ, եթե քվեարկությանը մասնակցել է պատգամավորների ընդհանուր թվի կեսից ավելին:


«Հայ հեղափոխական դաշնակցություն խմբակցության պատգամավոր Վահան Հովհաննիսյանը Tert.am–ի հետ զրույցում ասաց, որ անձամբ ինքը չի կարող կողմ քվեարկել: «Ներկայացված փաստարկները համոզիչ չեն»,- ասաց Վահան Հովհաննիսյանը՝ նշելով, որ Սիրիայի հարցերով զբաղված լինելու պատճառով տեղյակ չէ, թե խմբակցությունում ինչ որոշում կա:

Խմբակցության քարտուղար Աղվան Վարդանյանն էլ բազմազբաղ էր և չցանկացավ պատասխանել հարցերին:


Հայ ազգային կոնգրես» ընդդիմադիր դաշինքն արդեն հայտարարել է, որ ևս այս մասին որոշում կընդունի երկուշաբթի: Սակայն ՀԱԿ անդամ Լյուդմիլա Սարգսյանն այսօր արդեն ասել էր, որ անձամբ Վարդան Օսկանյանի հետ կատարվածը համարում է քաղաքական հետապնդում:

Հայաստանի Հանրապետական կուսակցության պատգամավոր Հովհաննես Սահակյանն ավելի վաղ Tert.am—ի հետ զրույցում ասել էր, որ Հանրապետականը նույնպես Օսկանյանին պատգամավորական անձեռնմխելիությունից զրկելու հարցը կքննարկի երկուշաբթի օրը կայանալի խմբակցության նիստին։

Իսկ մինչ այդ Հովհաննես Սահակյանը ճիշտ չէր համարել խոսել միջնորդությանը դեմ կամ կողմ քվեարկելու ինչպես իր, այնպես էլ խմբակցության դիրքորոշման մասին։

«Ես իմ որոշումը բոլորովին ճիշտ չեմ համարում այս պահին հրապարակել, որովհետև ես թիմի մաս եմ: Երկուշաբթի առավոտյան նախատեսված ֆրակցիայի նիստին ԱԺ քառօրյա նստաշրջանի մյուս հարցերի հետ նաև այս հարցը, անպայման, կքննարկենք»,-ասել էր նա։

Ավելի ուշ «Բարգավաճ Հայաստան» կուսակցությունը հանդես եկավ հայտարարությամբ, որում Վարդան Օսկանյանին պատգամավորական անձեռնմխելիությունից զրկելու Գլխավոր դատախազի միջնորդությունը համարել է նրա նկատմամբ քաղաքական հետապնդում։