Րաֆֆի Հովհաննիսյանը Բաղրամյան 26-ի մոտ Հայաստանի հիմնը երգեց և բարի գիշեր մաղթեց հավաքվածներին (տարբերակ 20)

Ազատության հրապարակում կրկին մեկնարկել է Րաֆֆի Հովհաննիսյանի հանրահավաքը։ Հիշեցնենք, որ այսօր կայացած Սերժ Սարգսյանի երդմնակալության արարողությանը զուգահեռ Ազատության հրապարակում Րաֆֆի Հովհաննիսյանի կողմից հանրահավաք էր կազմակերպվել, որն ուղեկցվեց նաև «Նոր Հայաստանի երդմնակալությամբ»։

Հանրահավաքի վերջում Րաֆֆի Հովհաննիսյանը հայտարարեց, որ հանրահավաքին կհետևի քայլերթ, ապա Ազատության հրապարակում կհնչի երգ-երաժշտություն, իսկ ժամը 18-ին կրկին տեղի կունենա հանրահավաք, որի ժամանակ կհնչեն այլ ելույթներ։ Րաֆֆի Հովհաննիսյանը հայտարարեց, որ ինքը չի ճանաչում ոչ Սերժ Սարգսյանին, ոչ Վեհափառ Հայրապետին, այլ ճանաչում է ժողովրդին։ Այդ ընթացքում հանրահավաքի մասնակիցները քայլերթ կատարեցին Երևանի կենտրոնով և փորձեցին գնալ Բաղրամյան 26, սակայն ոստիկանները խոչընդոտեցին և նրանք վերադարձան Ազատության հրապարակ։

Այդ ընթացքում եղան նաև մի շարք ակտիվիստների բերման ենթարկելու դեպքեր։

Այսօր Ազատության հրապարակում և դրան հաջորդած իրադարձություններին կարող եք հետևել այստեղ։

18.50
Ազատության հրապարակում Րաֆֆի Հովհաննիսյանը իշխանություններից պահանջեց ազատել Ոստիկանության բաժանմունքում գտնվող երիտասարդ ակտիվիստներին, որոնց անվանեց քաղաքական բանտարկյալներ և ձերբակալել իրեն: «Մեր տղաներին և աղջիկներին, մարդ եք, հայ եք, հայաստանցի եք, վերցրեք ինձ, Սերժ Սարգսյան, վերցրեք ինձ կեղտոտ դատախազ Աղվան Հովսեփյան, ազգային հերոս Սեյրան Օհանյան»,- ասաց Րաֆֆի Հովհաննիսյանը՝ պահանջելով իր խոսքով՝ կեղծ երդում իրականացրած Սերժ Սարգսյանից, «գեներալ-զորավարից ու Գորիկից» հարգել ՀՀ քաղաքացիներին և ազատել Մարիամ Սուխուդյանին ու մյուսներին:

«Մենք գնում ենք հանելու»,- գոռացին մի քանի հավաքվածներ, որին միացան նաև «հիմա, հիմա» կոչեր անողներ: Րաֆֆի Հովհաննիսյանն ասաց, որ գիտի՝ շատ բան կա կուտակված:

«Կոնկրետ ա էդի»,- նկատեց տղամարդը՝ նկատի ունենալով «կուտակվածը», որին ի պատասխան էլ Րաֆֆի Հովհաննիսյանն ասաց՝ «կոնկրետը իմ կյանքն է, ախպեր»։
«Զադնի դնել չկա»,- նրան իր խոսքը հիշեցրին շարքերից:

Րաֆֆի Հովհաննիսյանն այսօր պահանջեց ոչ միայն Սերժ Սարգսյանի, այլև Վեհափառ Հայրապետի հրաժարականը, ում այսօր անվանում էր Գարեգին Ներսիսյան:

«Սա սպառնալիք չի, ոչ էլ վերջնագիր:Սա ձեր քրիստոնեական վերջին խոստովանանքի իրավունքն է, խնդրում ենք Սերժ Սարգսյանին, Գարեգին Ներսիսյանին, Րաֆֆի Հովհաննիսյանին վերջին խոստովանանքի հնարավորությունից չզրկեք»,- ասաց նա։

Դիմելով իշխանություններին՝ նա ասաց, որ իրենց կերած-խմածը թող անուշ լինի, և նաև «Ամերիկայի, Օբամայի, Բառոզոյի, Վլադիմիրովիչի, ովքեր մեր գլխի վրա տեղ ունեն, իրենց սխալը անուշ խմած ունեն, որովհետև իրենց այդ սխալը իրենց կոկորդը՝ «բողազը» պիտի մնա»:

Սրանից հետո Րաֆֆի Հովհաննիսյանն ավելացրեց, որ պատրաստ է վաղը առավոտյան
գնալու Մոսկվա, հանդիպելու «պարոն Պուտինին և բերելու հաղթանակը»:

«Ամսի 12-ին, ժամը 6-ին այստեղ տեղի է ունենալու երկու ժամանոց հավաք: Մի ժամ ես ձեզ ներկայացնելու եմ Հայաստանի նոր իշխանության պատկերը, ձեր թույլտվությամբ և ձեր քվեով: Երկրորդ, ներկայացնելու եմ «Բարև Երևան» դաշինքը… »,- հայտարարեց Րաֆֆի Հովհաննիսյանը, ում այս խոսքը դուր չէր գալիս հավաքվածներին և ընդհատվում էր սուլոցներով: Հավաքվածները պահանջում էին վճռական գործողություններ և հանդես գալիս «հի-մա, հի-մա» վանկարկումներով։

Րաֆֆի Հովհաննիսյանը, արձագանքելով շարքերից հնչող դժգոհությանը, ասաց.«վաղը ինձ սուլեք, ոնց կուզենաք, ինձ քավության նոխազ դարձրեք, դավաճան ու չգիտեմ ինչ, բայց հիմա, այսօր՝ ապրիլի 9-ին Հայաստանի Ազատության հրապարակում ասում եմ ձեզ , լսեք ինձ մեծ խոսացող տղերք, դուխով տղերք, որ այսօր կեղծ երդմամբ Սերժ Սարգսյանը, Վեհափառ Հայրապետը դավաճանել են հայ ժողովրդին: Ու իրենք պատասխան պիտի տան»:
Րաֆֆի Հովհաննիսյանը խոստացավ, որ ժողովուրդն իրենից պատասխան կստանա, քանի որ թույլ չի տալու, որ որևէ մի հայ մարդ, հայր, մայր, որդի և զինվոր, քաղաքացի, թե ոստիկան Հայաստանի Հանրապետությունում արյուն թափի:

«Ոչ մի արյուն: Բայց ով ուզում է քայլ, թող պատրաստ լինի ոչ թե մեկ փամփուշտի՝ սիրո և հայրենիքի, այլ թող ինքը պատրաստ լինի պայքարի, որը կարող է մի օր, մի շաբաթ, մի ամիս տևի: Բայց եթե դուք պատրաստ եք ինձ հետ, ես էլ ձեզ հետ պատրաստ եմ տանել այդ պայքարը մինչև հաղթանակ: Պատրա՞ստ եք»,- հարցրեց Րաֆֆի Հովհաննիսյանը:
Նա նկատեց, որ իշխանական կերուխումը վերջացել է: «Իրենց կերած-խմած չալաղաջը անուշ…»,- Րաֆֆի Հովհաննիսյանի այս խոսքերը ևս ընդհատվեցին տևական «հի-մա»-ներով:
Սակայն Րաֆֆի Հովհաննիսյանն ի պատասխան հիշեց, որ երբ այսօր ժամը 12 –ին երդվել է, ապա առաջարկել մարդկանց ցրել, ոչ ոք չեն հավատացել, որ ժողովուրդը կարող է գնալ և հետ գալ: «Չհավատացին, որ ժողովուրդը հաղթանակի մեջ է, որ սա մեր հայրենիքն է, և մեր դեմ խաղ չկա»:

Դիմելով ժողովրդին՝ նա ասաց, որ ամեն մեկը մի խորհուրդ է տալիս, և ինքը ընդունում է այդ խորհուրդը՝ նկատի ունենալով երթը դեպի Բաղրամյան 26 և «հիմա»:

Րաֆֆի Հովհաննիսյանը այնուհետև հայտարարեց, որ հանրահավաքից հետո շարժվելու են դեպի նախագահի նստավայր:

Այժմ երթի մասնակիցները հասել են Բաղրամյան պողոտա, որտեղ հանդիպել են ոստիկանների երկու շարքից բաղկացած պատնեշին։

19.10
Րաֆֆի Հովհաննիսյանը հորդորեց բոլորին բարձրացնել ՀՀ Սահմանադրությունը, որովհետև ինչպես ինքն ասաց՝ ժողովուրդը հաղթել է: «Մեր հայրենիքի Բաղրամյան պողոտայով խաղաղ, լուռ քայլերթ կանենք»,- ասաց նա:

Ներսիկ Նազարյանը բարձրախոսով դիմեց ժողովրդին և ասաց, որ ՀՀ ոստիկանությունը պահանջում է դադարեցնել անօրինական երթը և շարունակելու դեպքում ՀՀ ոստիկանությունը օրենքով նախատեսված հատուկ միջոցներ կկիրառի:

Ի պատասխան` Րաֆֆի Հովհաննիսյանն ասաց, որ իրենք գնալու են Բաղրամյան պողոտայով, որից հետո «Բարեկամություն» մետրոյից ձախ են թեքվելու ու գնալու են Ծիծեռնակաբերդ՝ ծաղիկ դնելու Հայոց ցեղասպանության զոհերի համար:

«Սա մեր սահմանադրական իրավունքն է: Խնդրում եմ մեզ ուղեկցեք հանդարտ ոստիկաններ, եթե ոչ՝ ապրիլի 9-ը թող լինի ձեր ձեռքով քաղաքական բանտարկյալների, ձերբակալումների ու բախումների օր: Մենք գնում ենք սուս, առանց սուլելու: Ես գնում եմ առաջ և եթե Նազարյանը ինձ ձերբակալում է, ենթարկվում եմ անգամ այդ անօրինական հրահանգին»,- ասաց նա:

Մի պահ ոստիկանությունը և երթի մասնակիցները հրմշտեցին իրար: Երթի մասնակիցների մի մասին հաջողվեց ճեղքել ոստիկաններից կազմված պատը: Ոստիկանների ու ժողովրդի միջև բախում տեղի ունեցավ:

 

19։15

Բաղրամյան պողոտա է եկել ՀՀ ոստիկանապետ Վլադիմիր Գասպարյանը: Այս պահին Րաֆֆի Հովհաննիսյանը նրա հետ է բանակցում: 

 

19։22
ԱԺ «Ժառանգություն» խմբակցության պատգամավոր Ռուբեն Հակոբյանը հանդես եկավ բարձրախոսով և հորդորեց չենթարկվել սադրանքների և ոստիկաններից հեռավորություն պահպանել: Նա բոլորին տեղեկացրեց, որ Րաֆֆի Հովհաննիսյանը շրջակայքում է և զրուցում է: 

19։26
Ականատեսները Tert.am-ի թղթակցին պատմել են, որ «Ժառանգության» փոխնախագահ Արմեն Մարտիրոսյանը ոստիկանների կողմից ծեծի է ենթարկվել և տեղափոխվել է ոստիկանություն: Ինքը՝ Արմեն Մարտիրոսյանը, հեռախոսազանգերին չի պատասխանում:
Իսկ «Ժառանգությունից» Ստյոպա Սաֆարյանն էլ հայտնեց, որ իրենք ևս լսել են այդ մասին ու փորձում են պարզել, ու որ նա իրենց հեռախոսազանգերին էլ չի պատասխանում։

19.33
Այս պահին Բաղրամյան պողոտայում երթի մասնակիցների տարբեր հատվածներ շարժվում են տարբեր ուղղություններով: Նրանց մի մասը շարունակում է մնալ Բաղրամյան պողոտայում, մյուս մասը՝ Մոսկովյան-Բաղրամյան խաչմերուկից շարժվում է Մոսկովյան փողոցով՝ ոստիկանների, մասնավորապես ՀՀ ոստիկանապետ Վլադիմիր Գասպարյանի ուղեկցությամբ: Tert.am-ի թղթակիցը դեպքի վայրից հայտնում է, որ ստեղծվել է խառնաշփոթ և շատերը չեն հասկանում, թե որ ուղղությամբ շարժվեն:

19.56
«Ազատություն ռադիոկայանի տնօրեն Հյայր Թամրազյանը Արմեն Մարտիրոսյանի դեպքի հետ կապված պարզաբանում խնդրեց ակտիվիստ, պրոդյուսեր Ալեն Սիմոնյանից, ով պատմեց, որ Արմեն Մարտիրոսյանը բաժանմունք է տեղափոխվել առավոտյան Ազատության հրապարակում տեղի ունեցած միջադեպի առնչությամբ, երբ հարվածել են Մարտիրոսյանի մորը, ինչից հետո էլ Արմեն Մարտիրոսյանը հրել է նրան: Նա տեղեկացրեց, որ ոստիկանությունն անհամաչափ ուժ է կիրառել «Ժառանգության» անդամ Դավիթ Սանասարյանի նկատմամբ :

20.03

ԱԺ «Հայ ազգային կոնգրես» խմբակցության պատգամավոր Նիկոլ Փաշինյանը «Ազատություն» ռադիոկայանի հետ զրույցում պատմեց, որ ցուցարարները ցանկանում են բարձրանալ Ծիծեռնակաբերդ, սակայն ոստիկանները վահաններով չեն թողնում: «Եթե Բաղրամյան պողոտան քաղաքացիների համար անձեռնմխելի տեղ է, ապա բնական հարց է առաջանում, իսկ ո՞ւմ կողմից է ընտրվել Սերժ Սարգսյանը»,- ասաց Նիկոլ Փաշինյանը, ով այսօրվա հանրահավաքին ու երթին մասնակցում էր իր երեխաների ու կնոջ հետ:

«Ինքը պետք է հեռանա, քաղաքական վերնախավը, այս հարցը պետք է շատ հստակ հասկանա, որ իրեն ժողովուրդը չի ճանաչում որպես ՀՀ նախագահ»,- ավելացրեց Նիկոլ Փաշինյանը՝ ավելացնելով, որ թե՛ Սերժ Սարգսյանը և թե՛ մյուսները շատ լավ գիտեն այն մասին, որ հայ ժողովուրդն իրեն իշխանություն չի վստահել:

Ներսիկ Նազարյանը լրագրողների հետ զրույցում տեղեկացրեց, որ ժողովուրդը պետք է շարժվի Սարյան փողոցով, Հաղթանակի կամուրջով և գնա դեպի Ծիծեռնակաբերդ:
Երթի մասնակիցներից մեկը հարցրեց, թե ինչու իրենց թույլ չեն տալիս մնալ Բաղրամյան փողոցում, ինչին ի պատասխան Ներսիկ Նազարյանը ասաց՝ «Դուք արյու՞ն եք ուզում թափվի»: Իսկ երթի մասնակիցն ընդգծեց, որ իրենք պարզապես ժողովրդավարական պետություն են ուզում:

Ավելի ուշ պարզ դարձավ, որ Րաֆֆի Հովհաննիսյանը մի քանի հարյուր քաղաքացիների հետ երթով շարժվում է դեպի Ծիծեռնակաբերդ՝ Ներսիկ Նազարյանի մատնանշած երթուղով։

20.18

Երևան քաղաքի վարչության հասարակական կարգի ապահովման բաժնի պետ, գնդապետ Կարեն Մովսիսյանը քիչ առաջ հայտարարեց, որ չնայած մի շարք նախազգուշացումներին, փորձ է արվում խախտել լիազոր մարմնի որոշումը, այսինքն՝ երթը կազմակերպել Բաղրամյան պողոտայում: «Նման հավաքը այլևս չի կարող համարվել խաղաղ՝ դրանից բխող բոլոր իրավական հետևանքներով: ՀՀ ոստիկանությունը պահանջում է սթափվել, և թույլ չտալ բախումներ, որոնք անխուսափելի են լինելու հակաիրավական վարքագծի շարունակման պարագայում»,- հայտարարեց Կարեն Մովսիսյանը՝ նշելով, որ ոստիկանությունն առանց որևէ հապաղման կիրառելու է օրենքներով ոստիկանությանը վերապահված իր բոլոր հնարավորությունները՝ կանխելու հակաիրավական վարքագիծը, և իր լիազորությունների շրջանակում պատասխանատվության է ենթարկելու օրենքի պահանջներն ու հասարակական կարգուկանոնը խախտող բոլոր անձանց:

Այնուհետև բարձրախոսով ելույթ ունեցավ ՀՀ նախագահի նախկին թեկնածու Անդրիաս Ղուկասյանը: Նա հայտարարեց, որ այս պահին Րաֆֆի Հովհաննիսյանը մի խումբ քաղաքացիների հետ շարժվում է դեպի Ծիծեռնակաբերդ (Մաշտոցի պողոտա – Հաղթանակի կամուրջ – Հրազդան մարզադաշտ երթուղով – Tert.am): Նա հորդորեց բոլոր ցանկացողներին գնալ Սարյան փողոցով ու միանալ նրան:

Միաժամանակ Անդրիաս Ղուկասյանը նշեց, որ ով որ մնում է Բաղրամյան պողոտայում,իսկ այս առանց իրազեկման, ինքնաբուխ միջոցառումն իրենց համար կարևոր է, պետք է կազմակերպված՝ առանց բռնության, ենթարկվեն մի քանի կանոնների: «Առաջինը՝ մենք սկսում ենք նստացույց, երկրորդը՝ ոչ մեկ ոչ մի ոստիկանի նկատմամբ որևէ բռնություն թույլ չի տալիս»,- ասաց նա:

Անդրիաս Ղուկասյանը նշեց, որ եթե ոստիկանությունը սկսի գործողություններ, ապա բոլորը կարող են դիմադրել, բայց առանց ուժ գործադրելու: «Ով որ կարող է՝ մնում է, ով չի կարող՝ գնում է: Այստեղ մնում են միայն այն մարդիկ, ովքեր կարող են առանց ուժ գործադրելու»,- ասաց նա:

20.37
ԱԺ «Ժառանգություն» խմբակցության պատգամավոր Զարուհի Փոստանջյանը Բաղրամյան պողոտայում բարձրախոսով հորդորեց թույլ տալ ժողովրդին մնալ այստեղ այնքան ժամանակ, մինչև Րաֆֆի Հովհաննիսյանի հետ Ծիծեռնակաբերդի ուղղությամբ շարժվողները հետ վերադառնան ու միանան իրենց: Նա նշեց, որ իրենք բոլորը պետք է գնան Ազատության հրապարակ: «Երեկ և այսօր առավոտվանից ոստիկանները զբաղեցրել են Բաղրամյան պողոտան: Հիմա մեր ժողովուրդը ուզում է մի քանի ժամ ինքը զբաղեցնի պողոտան»,- ասաց նա:

20.44
ՀՀ ոստիկանությունը որպես ողջամիտ ժամկետ 15 րոպե ժամանակ տվեց Բաղրամյան պողոտայում գտնվողներին հեռանալու համար: Այս մասին բարձրախոսով հայտարարեց ՀՀ ոստիկանության գնդապետ Կարեն Մովսիսյանը: Ինչին ի պատասխան հնչեցին վանկարկումներ՝ «ոչ»: Այս պահին Բաղրամյան պողոտայում անմիջապես գետնին նստած են մի խումբ մարդիկ:

20.48
Րաֆֆի Հովհաննիսյանի Facebook-յան էջից տեղեկանում ենք, որ կոտրել են Արմեն Մարտիրոսյանի քիթը։

21.00
Այս պահին Րաֆֆի Հովհաննիսյանը Ծիծեռնակաբերդում է, որտեղ հասել է մի շարք քաղաքացիների և ոստիկանապետ Վլադիմիր Գասպարյանի ուղեկցությամբ, և ծաղիկներ է դրել անմար կրակի մոտ ու մոմավառություն է կատարում։

 21.37
Րաֆֆի Հովհաննիսյանը Ծիծեռնակաբերդում հավաքվածներին տեղեկացրեց, որ Բաղրամյանում նստած են իրենց եղբայրները և ասաց, որ վաղն առավոտ «մեր հայրենիքի համար մի լուծում» կգտնեն, իրար հանդեպ ճիշտ որոշում կկայացնեն։

Նա և Վլադիմիր Գասպարյանը իրար հետ աղոթք արեցին, ապա մեքենայով շարժվեցին դեպի Բաղրամյան պողոտա, ուր նրան ողջունեցին բուռ ծափահարություններով:

Նա տեղեկացրեց, որ ոստիկանական բաժանմունքում է գտնվում Անդրիասի Ղուկասյանը, ով Րաֆֆի Հովհաննիսյանի բացակայության ժամանակ փորձում էր ստանձնել ոստիկանության հետ բանակցելու պատասխանատվությունը:

22.01
Բաղրամյան պողոտա եկած Րաֆֆի Հովհաննիսյանը Բաղրամյան պողոտան բացելու համար բանակցեց Երևանի փոխոստիկանապետ Վալերի Օսիպյանի հետ՝ հորդորելով բացել այն, իսկ վերջինս նրան հորդորում էր մարդկանց հետ վերադառնալ Ազատության հրապարակ:

Նա նշեց, որ այսօր ազգային միասնության օր է ու կոչ արեց, որ ոչ մեկը ինքնագործ որևէ քայլ չկատարի՝ լինի սադրիչ կամ մարդ: «Քանի դեռ ես կամ: Մենք տանում ենք մեր հաղթանակը, խաղաղ, հարգանքով ու սիրով»,- ասաց Րաֆֆի Հովհաննիսյանը՝ հավելելով որ որևէ մեկը չպիտի կռիվ ու արյուն սարքի: «Մեզ ասում են՝ գործ արեք մինչև վերջ: Այդ մինչև վերջը մեր ընտրության հաղթանակի գրանցում է, բայց ոչ երբեք՝ արյան դատը: Ով իր փառքի համար ձեռք բարձրացրեց հայ մարդու նկատմամբ, աններելի է , թույլ չեմ տալու»,- ասաց նա՝ վստահություն հայտնելով, որ Բաղրամյանը կբացվի: «Ձախ մայթով պիտի գնանք, մեր փողոցն է, մեր պողոտան»,- ասաց Րաֆֆի Հովհաննիսյանը:

Նրա ելույթի ընթացքում Բաղրամյան պողոտա եկավ Վլադիմիր Գասպարյանը, ում համար փողոցը ոստիկանները բացեցին՝ մարդկանց բազմությունը ճեղքելով:

Այս պահին Բաղրամյան պողոտա գտնվող մարդիկ սպասում են պողոտայի բացվելուն, սակայն այն դեռ փակ է:

22.41
Քիչ առաջ ՀՀ Ոստիկանապետ Վլադիմիր Գասպարյանն ու Րաֆֆի Հովհաննիսյանն առանձնացել էին Գրողների միության շենքի տարածքում: Հանդիպումից հետո Րաֆֆի Հովհաննիսյանը հայտարարեց, որ բանակցությունների արդյունքում թույլատրվել է Բաղրամյան պողոտայով շարվել դեպի վեր։ Նա հայարարեց, որ կարող են անցնել ԱԺ շենքի, Ակադեմիայի, Սիրահարների այգու, ապա Բաղրամյան 26-ի՝ նախագահական նստավայրի մոտով։ Վերջինս Րաֆֆի Հովհաննիսյանը որակեց որպես «ժողովրդին պատկանող գրասենյակ» և հորդորեց այդ շենքի կողքով անցնելիս երգել Հայաստանի օրհներգը, ապա Դեմիրճյանի փողոցով հետ գալ Ազատության հրապարակ։

Րաֆֆի Հովհաննիսյանը շնորհակալություն արեց ոստիկանապետին՝ թույլտվության համար։

22.53
Բաղրամյան պողոտայի մուտքը բացելուն պես «Ազատ, անկախ, Հա-յաս-տան» վանկարկումներ հնչեցին, ինչը անմիջապես Վլադիմիր Գասպարյանի կողմից նկատողություն անելու առիթ հանդիսացավ։ Նա անմիջապես հրահանգեց իր ենթականերին երթի մասնակիցներին հորդորել՝ զերծ մնան կոչեր հնչեցնելուց և աղմուկ բարձրացնելուց, քանի որ մարդկանց քունը խանգարում են։ Դրանից հետո կոչերը դադարեցին։

Նշենք, որ քիչ առաջ նախագահական նստավայրում ավարտվել է պաշտոնական ընթրիքը և երթևեկությունը Բաղրամյան պողոտայում վերականգնվել է։

23.15
Րաֆֆի Հովհաննիսյանը Բաղրամյան 26-ի մոտ Հայաստանի օրհներգը երգելուց հետո բարի գիշեր ասեց հավաքվածներին։ Իսկ երբ լրագրողներից մեկը վերջում նրան հարցրեց, թե ի՞նչ ծրագրեր կան կոնկրետ վաղվա հետ կապված, Րաֆֆի Հովհաննիսյանն ասաց, որ ծրագրեր միշտ կան։