Տրանսպորտի սակագնի թանկացումն անխուսափելի է. Փոխադրողների միության նախագահ (տեսանյութ)

Քաղաքային տրանսպորտի գնի բարձրացումն անխուսափելի է, չի կարող շուրջն ամեն ինչ թանկանա, բայց տրանսպորտի գինը 1996թ-ից հետո մնա նույն 100 դրամը. այս մասին Tert.am-ի հետ զրույցում ուղևորափոխադրող ընկերությունների տեսակետը ներկայացրեց Հայաստանի փոխադրողների միության նախագահ Հրանտ Եղիազարյանը։

«1996թ-ից մինչև այսօր ուղեվարձը չի թանկացել, չնայած համատարած թանկացումներին։ Այնպես որ, 150 դրամը դեռ ուշացված էր և այսօր 100 դրամի հետ քայլն ընդամենը մեր քաղաքապետի որոշումն էր, որին մենք ընդառաջեցինք»,– ասաց նա։

Հրանտ Եղիազարյանը նշեց, որ Երևանի քաղաքապետ Տարոն Մարգարյանը ոչ թե չեղյալ է համարել մայրաքաղաքում հասարակական տրանսպորտի սակագնի բարձրացման մասին իր որոշումը, այլ կասեցրել դրա գործողությունը, որպեսզի ստեղծվելիք հանձնաժողովը ուսումնասիրի խնդիրը և վերջնական որոշում կայացվի։ Նրա խոսքով՝ թանկացման հիմնավորման մեջ արված հաշվարկները, որոնք ներկայացվել են հանրությանը, նույնիսկ ավելի մեղմն են, ինչն արվել է ելնելով ազգաբնակչության սոցիալական վիճակից։

Հայաստանի փոխադրողների միության նախագահն նշեց, որ չկա որևէ ապրանքատեսակ, որը չի թանկացել և հակադարձեց հնչող պնդումներին, թե ներկայացված թանկացման հիմնավորման մեջ տեղ գտած հաշվարկները հիմնավոր չեն։

«Այդ մարդիկ, ովքեր ներկայացնում են, նրանք չեն տիրապետում առարկային։ Մենք ինքնարժեք ենք հաշվել՝ հաշվի առնելով ամեն ինչը, բոլոր գնագոյացումները, իսկ մարդիկ ասում են իրենց կարծիքով այդպես չի»,- ասաց նա և ավելացրեց, որ օրինակ՝ 2000 թ-ին քսայուղերը արժեցել են 200-300 դրամ, այժմ դրանց գինը կազմում է 1500 դրամ, անվադողերի գինը նախկինում եղել է 14 000-16000 դրամ է, իսկ 2013թ-ին դրանց գինը հասել է 35 000-ի։ «Իսկ ի՞նչը չի թանկացրել, կարո՞ղ եք ասել, և ո՞ւմ են ասել, որ ինչո՞ւ եք տվյալ ապրանքը թանկացնում»,- հարցրեց նա։

Դիտարկմանը, թե նույն ցուցակում ներկայացված է, որ վարորդները ստանում են 150 000 դրամ աշխատավարձ, ըստ պնդումների չի համապատասխանում իրականությանը, փոխադրողը հակադարձեց, որ դա ճիշտ չէ։

«Ոչ, պլանով աշխատում են, բայց աշխատավարձ ստանում են, ուղղակի նա հասույթից պլան է մուծում, այսինքն՝ ձեռնարկությանն է վճարում ստացած հասույթը, որը մուտքագրվում է, հետո արդեն ամսվա վերջին աշխատավարձ է ստանում»,-ասաց նա։
Հրանտ Եղիազարյանին դուր չի գալիս, որ փոխադրող ընկերությունների տնօրեններին «գծատեր» են ներկայացնում։ «Եթե շարունակենք այդպիսի տերմիններ օգտագործել, մեր վիճակը չի լավանա։ Խանութի տնօրենին չեն ասում խանութպան, խանութ նայող, իսկ երթուղի սպասարկող սեփականատիրոջն ասում ենք գծատեր, դե եթե ասում ենք գծատեր, գծատերերն էլ այդ վիճակի կլինի»,- ասաց նա։

Հայաստանի փոխադրողների միության նախագահը հարցնում է, թե եթե սա գերշահույթ հետապնդող բիզնես է, ապա ինչու 12 ավտոբուսային երթուղու մրցույթին մասնակցելու հայտ չեն ներկայացնում։

«Այսօր 12 ավտոբուսայի երթուղու համար հայտ ներկայացնող չկա, ինչն էլ վիճակի վառ ապացույցն է։ Այն, որ մեքենաները կանգնած են առանց վարորդի, խարխուլ վիճակում դրա վառ ապացույցն է, չենք կարողանում վերանորոգել։ Սա արդեն այն բիզնեսներից է, որոնք օգուտ չեն բերում, չասեմ, որ մեր ընկերներից մի մասը շատ վատ վիճակում են, կորցրել են ամեն ինչ, տուն, տեղ ամեն ինչ, որովհետև այդ գներով սպասարկել են, իսկ այդպես բոլորն են դատապարտված»,- նշեց նա։

Հրանտ Եղիազարյանը զարմանում է, թե ինչպես են մարդիկ պահանջում քիչ վճարել և բարձր որակ ապահովել։ «Մենք ցածր ենք վճարում և պահանջում ենք լավ սպասարկում, այդպես պարզապես չի լինում։ Լավ սպասարկում ունենալու համար, պետք է լավ վճարել։ Ժողովրդի ճնշող մեծամասնությունը համաձայն է 150 դրամին, ուղղակի մարդիկ կան, որ պղտոր ջրում ուզում են ձուկ որսալ»,-նշեց նա։

Դիտարկմանը, թե, այսինքն` ճնշող մեծամասնությունը կո՞ղմ է 50%-ով ավելին վճարելուն, բայց ունենա ուղևորափոխադրման նույն որակը, նա ուղղեց. «Ո՛չ, նրանք պատրաստ են վճարել, որ տրանսպորտի վիճակը էապես լավանա։ Քանի դեռ մենք վճարում ենք 100 դրամ, չի լավանալու այդ վիճակը, ավելի է վատանալու»։

Հարցին, որ գուցե ավելի ճիշտ է ծառայությունների որակը բարձրացնել և ապա նոր սակագնին սահմանել, Հրանտ Եղիազարյանը հակադարձեց, որ դա շատ ռիսկային է։ «Այդպես լինել չի կարող, ես ներդրում կատարեմ, ես պետք է համոզված լինեմ, որ իմ ներդրված գումարները չեն գնա կորչեն, հետևաբար, ներդրումներ չեմ կատարում։ Եթե փոխադրողն այդ բեռի տակ մնա, հետո ուղեվարձը չբարձրացավ ես ուրեմն բանկռոտ կլինեմ»,- ասաց նա և խոստացավ, որ հակառակ դեպքում իրենք արդեն կփորձեն վարկ վերցնել, որակ ապահովելու համար, քանի որ հույս ունեն, որ ավել գումարներով կարող են վարկ փակել։