Չնայած բացասական եզրակացությանը՝ «Զվարթնոց» օդանավակայանի հին շենքը քանդելու հարցը կրկին օրակարգում է

Լուսանկարը՝ Armenpress.am-ի



Կրկին օրակարգում է «Զվարթնոց» օդանավակայանի հին կլոր շենքը քանդելու հարցը, որը որպես ծրագիր Հանրային խորհրդի քաղաքաշինական խորհրդին ներկայացրել է Քաղավիացիայի գլխավոր վարչությունը, այս մասին Tert.am-ին հայտնեց Հանրային խորհրդի նախագահ Վազգեն Մանուկյանը։

 

Ի պատասխան հարցի, թե իրեն հայտնի՞ է, որ Երևանի քաղաքապետարանին կից Քաղաքաշինական խորհուրդը ժամանակին բացասական եզրակացություն է տվել արգենտինահայ գործարար Էդուարդո Էռնեկյանին պատկանող «Արմենիա միջազգային օդանավակայաններ» ընկերության՝ շենքը քանդելու դիմումին, Վազգեն Մանուկյանն ասաց. «Մենք հիմա պետք է քննարկենք մոտ ժամանակներս և հրավիրում ենք բոլոր կողմերին, որոնց կարծիքները հաշվի կառնվեն»:

Հանրային խորհրդի նախագահը նշեց, որ ՀՀ քաղավիացիան շատ մանրամասն հիմնավորում չի ներկայացրել շենքը քանդելու վերաբերյալ՝ այն նկատառմամբ, որ այդ «պատճառաբանությունները կներկայացվեն բուն քննարկումների ժամանակ»: «Կրկնում եմ՝ մեզ ներկայացվել է, որ կա այսպիսի ծրագիր, խնդրում ենք քննարկել»,– ընդգծեց նա:

Հիշեցնենք, որ դեռևս ապրիլին «Սև ամպեր՝ «Զվարթնոցի» հին շենքի գլխին. սեփականատերը այն քանդելու նպատակով դիմում է ներկայացրել» վերտառությամբ հոդվածում Tert.am-ը տեղեկացրել էր, որ Երևանի քաղաքապետարանին կից քաղաքաշինական խորհուրդը միաձայն մերժել է «Զվարթնոց» օդանավակայանի հայտը՝ «հին շենքը քանդելու թույլտվություն՝ տեղը «հարթ տարածք ունենալու» համար:


Սրանից հետո , այն ժամանակ՝ գարնանը «Արմենիա միջազգային «Արմենիա միջազգային օդանավակայաններ» ընկերությունից հայտնեցին, թե նման մտադրություն այլևս չկա:


Ինչպես Tert.am-ի հետ զրույցում այսօր ասացին «Արմենիա միջազգային օդանավակայաններ» ընկերությունից՝ «Զվարթնոց» օդանավակայանի հին կլոր շենքը Հայաստանի Հանրապետության սեփականությունն է, քանի որ պատկանում է « Զվարթնոց» օդանավակայանին, որի կառավարումն ընդամենը հանձնված է իրենց՝ «Արմենիա միջազգային օդանավակայաններ» ընկերությանը, որն էլ որպես կառավարիչ գտնում էր, որ հին շենքը խոչընդոտում է ընկերության զարգացման ծրագրերին:

Ամեն դեպքում, ակնհայտ է, որ շենքը քանդելու հարցը կրկին օրակարգում է:

Երևանի քաղաքապետարանին կից Քաղաքաշինական խորհրդի նախագահ, Երևանի քաղաքապետարանի «Հանրապետական» խմբակցության նախկին ավագանի, ճարտարապետ Հրաչ Պողոսյանը կրկին հաստատեց, որ «այո, միանգամայն» իրենց խորհուրդը բացասական եզրակացություն է տվել, ավելին՝ Երևանի քաղաքապետարանը գրավոր է մերժել Էդուարդո Էռնեկյանի հայտը:

«Ես հույս ունեմ, որ Հանրային խորհուրդը նույն որոշումը կընդունի, որովհետև եթե քաղաքապետը մերժել է, Հանրային խորհուրդը պետք է ասի՝ «ոչինչ, քանդե՞նք»: Չեմ կարծում, որ Հանրային խորհուրդը նման իրավասություններ ունի: Եվ ասեմ, որ գլխավոր ճարտարապետը նույնպես մերժել է, էն ժամանակ Նարեկ Սարգսյանն էր, համենայնդեպս, նա էլ, քաղաքապետն էլ ինձ ասացին, որ մերժում ենք»,- ասաց Հրաչ Պողոսյանը:

Ինչպես Tert.am-ի հետ զրույցում ասաց ՀՀ վաստակավոր ճարտարապետ Սաշուր Քալաշյանը «բոլոր դեպքերում, մերժվելու է»: Ի պատասխան հարցի, թե որտեղի՞ց նման վստահություն, Սաշուր Քալաշյանն ասաց.«Մենք մասնագիտական կազմ ենք հավաքելու, և մենք բոլոր ուղիները կգտնենք»:

Նշենք, որ 1961 թվականին բացված «Զվարթնոց» միջազգային օդանավակայանի մոդեռնիստական ոճի շենքը շահագործման է հանձնվել 1980 թվականին ճարտարապետներ` Արթուր Թարխանյանի, Սպարտակ Խաչիկյանի, Լևոն Չերքեզյանի, Ժ. Շեխլյանի և կոնստրուկտոր` Ս. Բաղդասարյանի նախագծով և համարվում էր ԽՍՀՄ մոդեռնիստական ճարտարապետության նմուշներից մեկը:

Ի պատասխան հարցի, թե իր կարծիքով «Զվարթնոցի» հին շենքն իրենից պատմամշակութային արժեք ներկայացնում է, Սաշուր Քալաշյանը կարճ պատասխան տվեց՝ ասելով.«Պատմամշակութային արժեքը ո՞րն է, պատմամշակութային հուշարձան է»:

Ճարտարապետական այս ուղղությունը աշխարհի բոլոր երկրներում առնված է պաշտպանության տակ:

ՀՀ ճարտարապետների միության նախագահ Մկրտիչ Մինասյանը այն ժամանակ հայտնել էր, որ անցյալ տարի Վիեննայում կայացած Ճարտարապետական կոնգրեսում բացառիկ կարևորություն է տրվել ճարտարապետական այս դպրոցին ու ուղղությանը: Եվ որ «Զվարթնոցի» հին շենքի մակետը պետք է ցուցադրվի Ստամբուլում կայանալիք ճարտարապետների Կոնգրեսի նիստին»։