«Սիթիական» տեսքով Փակ շուկայում այսօր աշխույժ առևտրի իմիտացիա էր, անհասկանալի է, թե որտեղից էին ՀԴՄ-ները

Լուսանկարը՝  aravot.am-ի


Երևանի «Փակ շուկայի» («Ծածկած շուկա») ոչ պաշտոնական բացման առաջին օրը «Երևան սիթիի» և հիմնական՝ հատվածում, որը դեռ չի գործում, բոլոր բաժիններում տեղադրված են ՀԴՄ մեքենաներ, ինչը ֆիքսել է Tert.am–ի լրագրողը։


Բանն այն է, որ Նախախորհրդարանի քարտուղար Վարդան Հակոբյանը օրերս հայտարարել էր, թե քանի որ նախկին «Փակ շուկան» ամբողջովին ձևափոխվել է, ապա ՀՀ կառավարությանն առընթեր անշարժ գույքի կադաստրի պետական կոմիտեն Պետական եկամուտների կոմիտեին պետք է տար «նոր շենքի» սեփականության նոր վկայական, ինչի հիման վրա էլ ՊԵԿ–ը պետք է տար առևտրի թույլատվություն:


«Իսկ ինչ վերաբերում է, որ Կադաստրի կոմիտեն նման վկայական տար, ապա Կադաստրը մեզ պատասխանել է, որ ոչ մի դիմում չի ստացել՝ նման վկայական տալու, ոչ մի նման բան չի ներկայացվել, որ ինքը քննարկի՝ տա՞ նման վկայական, թե ոչ»,- այսօր Tert.am–ին հայտնեց Վարդան Հակոբյանը:


Նախախորհրդարանի անդամը, ով այդ նամակը ստացել է ընդամենը մեկ շաբաթ առաջ, չի կարողանում հասկանալ՝ այդ թույլտվությունը ՊԵԿ-ը տվե՞լ է, նաև չի բացառում, որ ՀԴՄ ապարատները շուկայի սեփականատեր համարվող ԱԺ Հանրապետական» Սամվել Ալեքսանյանին պատկանող ընկերությունը իր այլ մասնաճյուղերից է բերել և դրել այնտեղ:


Իրենք՝ «Երևան սիթիի» աշխատակիցները այդ հարցին որևէ կերպ չեն պատասխանում:


Ինչ վերաբերում է ՊԵԿ-ին, ապա Tert.am–ի գրավոր հարցման ՊԵԿ–ից ստացվե հետևյալ պատասխանը. «Ի պատասխան Ձեր հարցման տեղեկացնում ենք, որ տնտեսվարող սուբյեկտներին հսկիչ-դրամարկղային մեքենաներ տրամադրելու գործընթացում Անշարժ գույքի կադաստրի պետական կոմիտեի կողմից տրված տեղեկանքի առկայությունը վաղուց արդեն անհրաժեշտ չէ»:


«Փակ շուկայի» «սիթիական» տեսքը» արդարացրեց բոլոր վատագույն կանխատեսումները. Քաղաքապետարանը և Մշակույթի նախարարությունը իրենց մեղավոր չեն համարում


Այսօր ոչ պաշտոնապես բացված «Երևան Սիթի»-ի վերածված նախկին Փակ շուկայի ներսի տեսքը (նախկին շուկային բնորոշ կամարաձև կոնստրուկցիաները վերացված են, ներսի ճակատային մասում գործում է էսկալատոր) արդարացրեց բոլոր վատագույն սպասումները, որոնք անում էին «Ազատե՛նք հուշարձանն օլիգարխից» նախաձեռնության անդամները:


Ի պատասխան Tert.am–ի հարցի, թե Երևանի քաղաքապետարանը ինչպե՞ս է վերաբերվում այն հարցադրումներին, թե շուկայի այս տեսքով գործելը վկայում է, որ դե ֆակտո պետական մեխանիզմները անզոր են իրենց, իսկ որոշումները մինչև վերջ ի կատար ածելու հարցում, Երևանի քաղաքապետարանի հասարակայնության հետ կապերի վարչության պետ Արթուր Գևորգյանն առաջարկեց հարցն ուղղել ոչ թե իրենց, այլ Մշակույթի նախարարությանը:


«Մենք ժամանակին, երբ լինում էին խախտումներ, կիրառել ենք, օրենքով սահմանված բոլոր քայլերը: Այն բոլոր խախտումները, որոնք եղել են ապօրինի գործունեության հետ կապված, մենք բոլոր քայլերը ձեռնարկել ենք, և բոլորդ այդ մասին տեղյակ եք»,- ասաց Արթուր Գևորգյանը։


Ի պատասխան հարցադրման, թե ակնհայտ է, որ կամարաձև կոնստրուկցիաները չկան, ասաց, Արթուր Գևորգյանն ասաց.«Դե, այդ արդեն Մշակույթի ու Քաղաքաշինության նախարարությունները թող փորձեն պարզել՝ ինչ է քանդվել: Իսկ մենք այն մասով, որ իրենց թույլատրված չէր, ժամանակին կիրառել ենք օրենքով սահմանված 200 հազար դրամ տուգանքը, երկրորդ անգամ ՝ 2, 5 միլիոնի չափով, մի հատ էլ ապամոնտաժում ենք իրականացրել»։


Մշակույթի նախարարության լրատվության հետ բաժնից ի պատասխան նույն հարցի, առաջարկեցին դիմել քաղաքապետարան:


«Շատ սխալ բան են արել, մենք վերահսկող կառույց չենք, որ էդ ամենը վերահսկենք, Մշակույթի նախարարությունը եզրակացություն է տվել և բազմիցս ահազանգել է»,-հայտնեցին լրատվական վարչությունից:


Հիշեցնենք, որ 2012-ի հունվարին, «Փակ շուկայի» ստորգետնյա հատվածի կառուցապատումը պետք է իրականացվեր Մշակույթի նախարարության եզրակացության հիման վրա՝ Երևանի քաղաքապետարանի կողմից համաձայնեցված աշխատանքային նախագծով, սակայն հետագայում պարզվեց, որ քանդված են շուկայի հետնամասի ներքին հատվածի երկաթբետոնե կամարաձև կոնստրուկցիաները:


Սրանից հետո մշակույթի նախարարությունը սեփականատիրոջից պահանջեց վերամշակել կամարների վերականգնման նախագիծ, ինչը սեփականատերը այդպես էլ չներկայացրեց: Արդյունքում, Մշակույթի նախարարությունը հայտարարեց, որ շուկայի տարածքում ընթացող շինարարությունը չի համապատասխանում նախարարության կողմից տրված նախագծային փաստաթղթերի պահանջներին:


Ինչ վերաբերում է հարցին, թե «Փակ շուկայի» բացման պաշտոնական արարողությանը, որը նշանակված է հոկտեմբերի 9-ին, Երևանի քաղաքապետ Տարոն Մարգարյանը կմասնակցի՞ հրավեր ստանալու դեպքում, Երևանի քաղաքապետարանի հասարակայնության հետ կապերի վարչության պետ Արթուր Գևորգյանը դժվարացավ պատասխանել, սակայն նշեց, որ այդ օրը քաղաքապետարանում ավագանու նիստ կա:


Լավ էլ սիրուն սարքել են. «Փակ շուկայի» տարածքում գործող առևտրի կենտրոնում աշխուժության պատրանք են ստեղծում


Այսօր նախկին Փակ շուկայի տարածքում ոչ պաշտոնապես բացված առևտրի կենտրոնում իմիտացիոն աշխուժություն էր տիրում: Այսպես, շուկայի մոտ էին հայտնվում իբր պատահական անցորդներ, ովքեր հատուկ բարձրաձայն բացականչում էին՝ «վայ շուկան բացվե՞լ է», ապա հենց մուտքի մոտ, դեռ շուկա չմտած բացականչում էին՝ «վայ, ինչ էլ սիրուն են սարքել»: Սրան, ինչպես նաև շուկայի տարածք մտնող լրագրողներին ուշադիր հետևում էին տարբեր երիտասարդներ:


Tert.am-ը ֆիքսել է մի կադր, երբ անցորդը շուկա է մտնում գյուղմթերքով լի տոպրակներով, ըստ ամենայնի, որպեսզի այնտեղից քիչ հետո դուրս գա այնտեղից «գնումներ» արած։


Այդուհանդերձ, մի տատիկ, ով երևի կարծել էր, թե շուկա է մտնում, դատարկ պայուսակով դուրս գալով՝ փնթնթաց.« Ինչ խաբար է՝ պոմիդորը 600 դրամ»: