«ՏաԹևեր» ճոպանուղին 3 տարվա ընթացքում փոխադրել է 200 000-ից ավելի մարդ. ծրագրի եռամյա գործունեության ամփոփում

Աշխարհի ամենաերկար ճոպանուղին՝ «ՏաԹևերը», իր եռամյա գործունեության ընթացքում փոխադրել է 200 000-ից ավելի մարդ. այս մասին այսօր «Տաթևի վերածնունդ» ծրագրի և «ՏաԹևեր» ճոպանուղու շահագործման 3-ամյակին նվիրված ասուլիսին ասաց «Տաթևի վերածնունդ» ծրագրի տնօրեն Արեն Ափիկյանը:

«Այս տարվա սեպտեմբերին նշեցին այդ թիվը, մեծ նվաճում է, քանի որ եթե համեմատենք զբոսաշրջության հոսքը դեպի Տաթև, միջինում 10 անգամ ավելի շատ զբոսաշրջիկ է այժմ գալիս Տաթև, ի շնորհիվ մեր ճոպանուղու»,- ասաց նա և հիշեցրեց, որ ընդամենը երեք տարի առաջ ինչ դժվարություններ կային Տաթև վանական համալիր հասնելու համար։ Ըստ նրա, մեքենայով տևում էր մոտ մեկ ժամ, մինչդեռ այսօր ճոպանուղով ընդամենը 12 րոպեում կարելի է հասնել վանք։

Արեն Ափիկյանը նաև նշեց, որ իրենց պատկանող տարածքում էլ կկառուցեն հյուրանոց, մոտ տարիներին նախատեսված է խաղահրապարակ, որի նպատակն է հնարավորություն տալ զբոսաշրջիկներին ավելի երկար ժամանակ անցկացնել Տաթևում, և լինել ոչ միայն վանական համալիրում, այլ նաև կողքի համայնքներում, որտեղ քիչ չեն հետաքրքիր վայրերը։ «Հիանալի բնություն կա, հին գյուղեր ու եկեղեցիներ, որոնք պետք է ցույց տալ»,- ասաց նա։

Խոսելով Տաթևի շրջակա համայնքների զարգացման ծրագրերից` Արեն Ափիկյանը նշեց, թե «Տաթևի վերածնունդ» ծրագրի և Հայաստանի սոցիալական ներդրումներ հիմնադրամի ջանքերով մեկնարկել են Հալիձոր գյուղի միջնակարգ դպրոցի վերանորոգման աշխատանքները, որի ընդհանուր բյուջեն կազմում է 115 միլիոն դրամ, և որի 50%-ը կտրամադրի «Տաթևի վերածնունդ» ծրագիրը:

Իսկ հիմնական ծրագիրն ըստ նրա՝ Տաթևի վանքի վերածնունդը կլինի, որը կբացվի 2017 թ-ին վերանորոգված ու վերածնված վանքը։ «Մեր խնդիրն է ոչ միայն վանքի պատերը վերանորոգել, ամրացնել, այլ վանական կյանքը վերածնել, ինչ դեր ունեցել է նախկինում»,- ասաց նա։

RVVZ և IDeA հիմնադրամների գործադիր տնօրեն Արտակ Մելքոնյանը ներկայացրեց ներդրումների քանակը՝ շուրջ 21 մլն դոլար։ «Մինչև ճոպանուղու գործարկումը Գորիսում գործում էր 2 հյուրանոց, այժմ դրանց թիվը հասնում է 14-ի: Գորիսում հյուրանոցային ոլորտում աշխատող մարդկանց թիվը կազմում է շուրջ 200, զարգանում են վանքի շրջակա համայնքների ենթակառուցվածքները, 8 գյուղերում գործում են շուրջ 20 հյուրատներ»,- ասաց Արտակ Մելքոնյանը:

Ազգային մրցունակության հիմնադրամի գործադիր տնօրեն Արման Խաչատուրյանի խոսքով՝ հիմնադրամի աշխատանքի հիմնական ուղղությունները երեքն են` վանական համալիրի վերանորոգում, Տաթևի և շրջակա համայնքների համալիր զարգացման ծրագիր, Տաթևի բրենդի ճանաչողության բարձրացում և ներկայացում միջազգային զբոսաշրջային ցուցահանդեսներում:

Ինչ վերաբերվում է ծրագրի շահութաբերությանը, ապա Արեն Ապիկյանը նշեց, որ պետք է դիտարկել այն տեսակետից, որ ծրագիրը բարեգործական է և շահույթ չի հետապնդում։

«Բայց միևնույն ժամանակ հասկանում ենք, որ այդ ծրագրերը պետք է որոշակի չափով շահութաբեր լինեն, որպեսզի մյուս ծրագրերը շարունակվեն։ Այս տարի արդեն մոտեցել ենք շեմին, որ ճոպանուղին դառնա շահութաբեր, հուսով ենք, որ մյուս տարի արդեն կանցնի, և դա ուղղված կլինի հիմնադրամին»,- ասաց նա ու հիշեցրեց, որ 21 մլն դոլար ներդրել են և պլանավորել են ևս այդքան ներդնել։