Իրարամերժ կարծիքներ Որոտանի ՀԷԿՀ–ի վաճառքի մասին

«Հայ ազգային կոնգրես» կուսակցության անդամ, տնտեսագետ Վահագն Խաչատրյանը և ՀՀ կենտրոնական բանկի նախկին նախագահ, տնտեսագետ Բագրատ Ասատրյանը Tert.am-ի հետ զրույցում «Որոտան հիդրոէլեկտրակայանների համալիր» ՓԲ ընկերության վաճառքի մասին իրարամերժ տեսակետներ հայտնեցին:

ՀՀ կենտրոնական բանկի նախկին նախագահ, տնտեսագետ Բագրատ Ասատրյանն այն ողջունելի համարեց, ու նշեց, որ նոր սեփականատեր է գալիս, որը նորմալ մասնագիտացված գործունեություն է այդ ոլորտում ծավալելու, ֆինանսական հնարավորություններ ունի, այսինքն՝ հետագայում ներդրումներ կանի, ինչպես նաև փորձառություն ունի:

«Էներգետիկ ոլորտում ռուսական ներդրումների այլընտրանք է փաստորեն, որը, անկեղծ ասած, դրական եմ համարում»,- ասաց նա:

Վերջինս նաև դրական երևույթ համարեց այն, որ ՀԷԿ-ը գնել է ամերիկյան կազմակերպություն: «Հուսով եմ, որ նորմալ
մրցույթ է եղել, և ամերիկացիներն են ցանկություն հայտնել գնելու»,- ասաց Բագրատ Ասատրյանը:

Իսկ էներգետիկ ոլորտում երկրի անվտանգության առումով նա շեշտեց, որ խնդիր չի տեսնում. «Եթե ռուս ներդրող կա Հայաստանում, մյուս կողմից գալիս է ամերիկացի ներդրողը»:


Նշենք, որ ՀՀ կառավարության, «Որոտան hիդրոէլեկտրակայանների hամալիր» փակ բաժնետիրական ընկերության, ամերիկյան «Քոնթուր գլոբալ հիդրոկասկադ» և «Սի-Ջի սոլյուշնս գլոբալ hոլդինգ քամփընի» ընկերությունների միջև ստորագրվել է գույքի առքուվաճառքի պայմանագիր, որով 180 մլն դոլարով «Որոտան հիդրոէլեկտրակայանների համալիրը» վաճառվել է:

Տնտեսագետ Վահագն Խաչատրյանն ասաց, որ Որոտանի ՀԷկ–ի վաճառքը Հայաստանի տնտեսության, ինչպես նաև ազգային անվտանգությանը սպառնացող գործարք է համարում։

«Որոտանը կառուցվել է ոչ թե որպես սովորական ՀԷԿ, այլ կառուցվել է, որպեսզի էներգետիկ համակարգը կառավարի: Երկրորդ՝ Որոտանի ՀԷԿ-ը ապահովել է նաև Հայաստանի էներգետիկ համակարգի անվտանգությունը, և այդ առումով պետության ձեռքում Որոտանի ՀԷԿ ունենալը շատ կարևոր է, այն ստրատեգիական նշանակություն ունի»,- ասաց Վահագն Խաչատրյանը՝ ընդգծելով, որ վաճառելու անհրաժեշտությունը ո՛չ տնտեսական, ո՛չ երկրի անվտանգության առումով չկար:

Ինչ վերաբերում է հիմնավորմանը, թե ՀԷԿ-ում ներդրումների կարիք կար, նա հակադարձեց՝ ասելով, որ այդպիսի խնդիր չկա, առավել ևս, որ վերջին տարիների ներդրումները հիմնականում արվել են դրսից և բավական մատչելի էին ՀՀ-ի համար. «Եվ ՀԷԿ-ն այն վիճակում չէր, որը փորձում են ներկայացնել, իբր տարիներ շարունակ անմխիթար վիճակում էր: Այդ ամեն ինչը իրականությանը չի համապատասխանում»:

Վահագն Խաչատրյանի համոզմամբ՝ այդպիսով Հայաստանը էներգետիկ ոլորտում իր անկախությունն ամբողջովին կորցրեց, գազի հետ կապված վերջին պայմանագրերն էլ դրա վառ ապացույցն են: «Իրականում այստեղ կոռուպցիոն ռիսկեր կան և հաստատ կլինեն, և պատահական չէ, որ հենց հիմա այդ գործարքը կատարվեց»,- ասաց նա և նշեց, որ Հայաստանում նման գործարքներ կնքելիս միշտ անձնական շահագրգռվածություն կա։

Իսկ հարցին, թե ինչու Ամերիկային վաճառվեց և ոչ Ռուսաստանին,Վահագն Խաչատրյանը պատասխանեց. «Պետք է նախ հարց տալ, թե ինչու հենց այդ կազմակերպությանը։ Կամ ինչո՞ւ հրապարակային աճուրդ չի եղել, ի՞նչ չափորոշիչներից ելնելով են այդ ընկերությանը վաճառել»:

Բայց չկա այդ հարցերի պատասխանը, և ըստ նրա, երևի աճուրդ չի էլ եղել, պարզապես ներքին բանակցությունների արդյունքում է արվել գործարքը: «Մեզ բոլորիս մոտ կասկած է առաջացնում այդ գործարքը: Եվ այդ ամենից կարելի է ենթադրել, որ այդ գործարքի տակ ուրիշ բան կա»,- ասաց Վահագն Խաչատրյանը՝ ավելացնելով, որ զուտ տնտեսական առումով ՀՀ-ի շահն այդտեղ չի ներկայացվում: