Նոր բարեփոխու՞մ ՏՏ ոլորտում, թե՞ «Դ!ԵՄ ԵՄ»-ին լռեցնելու քայլ. կարծիքներ

Կառավարության՝ Տեղեկատվական տեխնոլոգիաների ոլորտին վերաբերող նոր որոշումը, որով նորաստեղծ փոքր ձեռնարկություններն ազատվում են հարկային բեռից, իրարամերժ կարծիքներ է առաջացրել ոլորտի ներկայացուցիչների շրջանում: Այն, որ օրենքը շատ լուրջ բարեփոխում է ՏՏ ոլորտում, փաստում են շատերը, սակայն մի մասի մոտ էլ մտավախություն կա, որ ոլորտին առնչվող բարեփոխումը, հատկապես՝ այս պահին, հնարավոր է՝ միտված լինի «կուտակայինի» դեմ պայքարող «Դ!ԵՄ ԵՄ» շարժմանը լռեցնելուն:

Ձեռնարկությունների ինկուբատոր հիմնադրամի տնօրեն Բագրատ Ենգիբարյանը Tert.am-ի հետ զրույցում ասաց, որ Հայաստանում արդեն լուրջ փոփոխություն է կատարվում ՏՏ ոլորտում, որտեղ շատ լուրջ և կարևոր հանգամանք է նորաստեղծ կազմակերպությունների քանակը, քանի որ իրականում հիմնական արտադրանքը փոքր ընկերությունների կողմից են: «Նմանատիպ նախաձեռնությունը լուրջ հնարավորություն կտա մոտ երեք տարիների ընթացքում ուղղակիորեն շեշտը դնել ո´չ միայն սեփական արտադրանքի, այլ նաև՝ պատվերների կատարման վրա»,-ասաց նա:

Ինչ վերաբերում է հարցին, թե արդյո՞ք օրենքն ընդունվում է միտումնավոր՝ «Դ!ԵՄ ԵՄ» շարժմանը հակազդելու նպատակով, Բագրատ Ենգիբարյանը պատասխանեց. «Այս հարցը քննարկում էինք մինչ «Կուտակային կենսաթոշակների մասին» օրենքը, սա բացարձակապես կապ չունի «Դ!ԵՄ ԵՄ» շարժման հետ, սա երկար քննարկվող հարց է: 2003-2004 թվականներից այս հարցը բարձրացվում է, և ես առաջին օրից մասնակցել եմ քննարկումներին, սա երկար քննարկվել է, և մենք շատ ուրախ ենք, որ Կառավարության կողմից վերջապես կյանքի է կոչվել»:

Տեղեկատվական տեխնոլոգիաների ձեռնարկությունների միավորման գործադիր տնօրեն Կարեն Վարդանյանը նույնպես կարծում է, որ ՏՏ ոլորտի զարգացման կարևորագույն հատվածներից մեկը տեխնոլոգիական ձեռներեցությունն է, այսինքն՝ այնպես անել, որ երիտասարդներն ստեղծեն բիզնես՝ օգտվելով տեխնոլոգիական բիզնեսի առավելություններից, ու այդ առումով որոշումը շատ կարևոր է: «Այդ որոշման կիրառման ընթացքում գուցե կարիք կլինի ինչ-որ ճշգրտումների, բայց սա կարևոր քայլ է այս ուղղությամբ, որովհետև բոլոր մրցակից երկրներում նմանատիպ խրախուսող օրենսդրություն կա, ու եթե մենք այդ ճանապարհով չենք գնում, ուրեմն՝ ետ ենք մնում մրցակցությունից»,-ասաց նա:

Վերջինիս կարծիքով՝ Կառավարության այդ որոշումը «Դ!ԵՄ ԵՄ»-ի շարժման վրա ազդեցություն չի ունենա, այդ շարժման մասնակիցները հիմնականում բարձր որակավորման մասնագետներ են. ճիշտ է, այն ներառում է բոլոր խավերը, բայց նախաձեռնող հիմնական շարժիչ ուժը բարձր որակավորման մասնագետներ են: Պարտադիր կուտակային կենսաթոշակների օրենքն անձերին է վերաբերում, իսկ այս նոր օրենքն ավելի շատ՝ ձեռներեցներին, խրախուսում է ձեռներեցությունը: «Եվ եթե կենսաթոշակայինի թիրախը 200-300 հազար հոգի են, որոնք դեմ են, ապա այս օրենքի թիրախը տարեկան 100-200 հոգի են, այդ թիրախները չեն համեմատվում»,-ասաց նա՝ վստահեցնելով, որ օրենքը «կուտակայինի» դեմ պայքարի վրա ազդեցություն չի ունենա, բայց ոլորտի զարգացման վրա կունենա:

«Դ!ԵՄ ԵՄ» թիմի իրավաբան Գևորգ Հայրապետյանն էլ ասաց, որ վերջապես Հայաստանում հարկային արտոնություններ են տալիս որևէ ոլորտի, ինչը վատ չէ, որովհետև ՏՏ ոլորտի համար մի կողմից՝ առաջընթաց կապահովվի, մյուս կողմից՝ ոլորտի ներկայացուցիչներին կքաջալերի՝ գործ սկսել՝ առանց իրենց վրա հարկային բեռ վերցնելու:

Որոշման մասին՝ որպես «Դ!ԵՄ ԵՄ» շարժումը լռեցնելուն միտված քայլ, նա մտածել է. «Այս իշխանություններից դա սպասելի է, ինչքան էլ քայլը դրական լինի, բայց այն հանգամանքը, որ Կառավարության այս որոշումն ու «Դ!ԵՄ ԵՄ»-ի շարժման ամենաակտիվ փուլը համընկել են, և որ «Դ!ԵՄ ԵՄ»-ի նախաձեռնողները հիմնականում ՏՏ ոլորտի ներկայացուցիչներ են, իրականում շատ խիստ կասկած է առաջացնում, որ սա հենց որոշակի ձևով խորամանկություն է իշխանությունների կողմից գոնե՝ որոշ հատվածի վրա բարոյահոգեբանական ազդեցություն գործելու, որպեսզի չկարողանան ամբողջ թափով մասնակցել պայքարին, ասեն՝ լավ, Կառավարությունը մեզ համար մի լավ բան է անում, եկեք չպայքարենք»:

Գևորգ Հայրապետյանի խոսքով՝ 2000թ.-ից ՏՏ ոլորտը դարձել է Հայաստանի համար կարևոր ոլորտներից մեկը, և այդ ուղղությամբ պետությունը պետք է բազմաթիվ քայլեր անի: Մի կողմից էլ՝ նշեց, որ պետությունը կարող էր ավելի շուտ նման որոշում կայացնել: