«Դ!ԵՄ ԵՄ»-ը կդիմի քաղաքացիական անհնազանդության՝ հարցը չլուծվելու դեպքում. հանրահավաքին հաջորդեց երթ (տեսանյութեր)

«Կուտակային կենսաթոշակների մասին» օրենքի որոշ դրույթների դեմ հանդես եկող «Դ!ԵՄ ԵՄ» նախաձեռնության անդամներն այսօր հանրահավաք անցկացրին Երևանի Ազատության հրապարակում։ 

17.09

«Դ!ԵՄ ԵՄ» նախաձառնության անդամ Գևորգ Գորգիսյանը հայտարարեց, որ եթե Սահմանադրական դատարանը հակասահմանադրական չճանաչի օրենքը, ապա նախաձեռնության անդամները կդիմեն բոլոր օրենքով չարգելված գործողությունների, այդ թվում՝ քաղաքացիական անհնազանդության:

Դա կարող է լինել, ճանապարհների ու փողոցների փակում, քարոզչական թերթիկների փակում, իշխանությունների հետ համագործակցութունից հրաժարում, խոշոր և մեծազանգված գործադուլներ, ինչպես նաև նախաձեռնության անդամների՝ բանկերում ունեցած գումարների կանխիկացում:

Թե կոնկրետ ինչ քայլեր են լինելու, ակտիվիստը չմանրամասնեց, բայց նկատեց, որ մինչև հիմա շարժման հաղթանակը եղել է անկանխատեսելիությունը:

«Շատ հնարավոր է, որ օրինակ՝ հրաժարվենք կոմունալ վճարումներց կամ առհասարակ, չվճարենք։ Եվ չեմ կարծում, որ կլինի մի գազի տեսուչ կամ հոսանքի, որ ամբողջ շենքի կամ թաղամասի լույսը կամ գազը կանջատի, քանի որ նրանք ՀՀ քաղաքացի են և, ոչ ոք չի համարձակվի մտնել մեղվի փեթակը»,-ասաց ակտիվիստը:

ՍԴ-ն, ըստ Գևորգ Գորգիսյանի, պարտավոր է «կուտակային»-ի մասին օրենքը հակասահմանադրական ճանաչել:

Հայկ Ավետիսյանն էլ իր ելույթը շարունակեց հետևյալ նախաբանով՝ «ոտքի՛ Հայաստան, ոտքի՛ պայքարող և պահանջատեր քաղաքացի», քանի որ ինչը մեզ չի սպանում, դարձնում է ավելի ուժեղ: Ետ դարձի ճանապարհ չկա»:
Կուտակայինի թեմայով ռեփ՝ Վանաձորից»։

Նախքան կմեկնարկեր երթը, հանրահավաքի կազմակերպիչները ներկայացրին իրենց անակնկալը Վանաձորից եկած Դավիթի 3 րոպեանոց ռեփ կատարմամբ. «Ես չգիտեմ՝ ով ինչ ա կուտակում, բայց ես արդեն չեմ կատակում»:

15.29

«Դ!ԵՄ ԵՄ » նախաձեռնության անդամ Դավիթ Խաժակյանն Ազատության հրապարակից մեկ առ մեկ, անուն առ անուն հիշատակեց և հրապարակի «անունից» ողջույններ հղեց բոլոր այն հիմնարկներին, որոնք «այս ընթացքում ցույց են տվել, որ ինքնակազմակերպվող, իրենց իրավունքների համար պայքարող են»։

Դրանք են՝ Գիտությունների ազգային ակադեմիա, «Հարավկովկասյան երկաթուղիներ», «Մետրոպոլիտեն», թատրոնի դերասաններ, «Արմավիրի մարզի քաջ գյուղացիներ»:


Դավիթ Խաժակյանը հավելեց, որ բառիս բուն իմաստով «Դ!ԵՄ ԵՄ»-ը հայտնագործության շեմին է:


«Մենք ճանապարհ ենք բացահայտել, մի կայուն իրավիճակ, որտեղ կբացառվի ցանկացած ոտնձգություն քաղաքացիների իրավունքների նկատմամբ»,-հայտարարեց նա՝ ներկայացնելով իր մեկ կետանոց տեսլականը: 
Այն է, որ ցանկացած հարց լուծվելու է ոչ թե հասարակական ցնցումների, այլ ժողովրդի հավաքական ուժի միջոցով, որն էլ տանելու է դեպի այդ ցանկալի հաղթանակը:

Իսկ համախմբումը, ըստ նրա, պետք գլխավորապես և բառացապես ուղղված լինի դեպի հայոց պետականության վերակերտում:

15.15

Նախաձեռնության անդամ Լևոն Հարությունյանն անդրադարձավ «Դ!ԵՄ ԵՄ» նախաձեռնության պատմությանը, քանի որ ըստ նրա, վերջին շրջանում «ինչ հայհոյանք ասես չեն անում»։

«Մի քանի քաղաքացի անցած տարի ծանոթանալով օրենքին՝ դժգոհության ձայն բարձրացրեցին, իսկ պետական պաշտոնյաները մեզ անվանեցին արկածախնդիր երիտասարդներ: Հիմա մենք մի քանի տասնյակ հազար մարդ ենք և մեզ հետ հաշվի չնստելն է արկածախնդրություն»,-ասաց նա և հայտարարեց, թե իրենք թույլ չեն տա խլել իրենց սեփականությունը։

«Ո՛չ թալանին»,-գոչեց նա։

15.03

«Դ!ԵՄ ԵՄ» նախաձեռնության անդամ Արսեն Մանուկյանը հարց հնչեցրեց՝ «Մի՞թե մենք ազգովին կանգնել ենք, ու չի ստացվելու: Ստացվելու՛ է, և միասին դեռ շատ հարցեր կան լուծելու»:

Իսկ ստացվելու համար, ըստ նրա, պետք է դրսևորել կամք, միասնություն, գործել և մտածել՝ ելնելով միմիայն ազգային շահից, իսկ ամեն մեկն իր վրա դնի հույսը: Իսկ յուրաքանչյուր ընտանիքում պետք է քաղաքացի կրթվի:

«Կեցցե՛ պայքարող քաղաքացին, կեցցե՛ պայքարող հայը»,-ասաց Արսեն Մանուկյանը: 

Նա, դիմելով հավաքվածներին, նշեց, որ շնորհակալություն չի հայտնում ներկա գտնվելու համար, քանզի համոզված է, որ յուրաքանչյուրը եկել է գիտակցաբար և միասնաբար, ուս ուսի տված կպաշտպանի իր իրավունքը և ավելացրեց. «Մեզ այստեղ հավաքել է մի նպատակ՝ թույլ չտալ քաղաքացուն զրկել իր հանապազօրյա հացից, իր արդար քրտինքով աշխատած աշխատավարձից: Եվ ձեր միջից պետք է դուրս գա այն միտքը, որ ոչինչ չի կարելի փոխել: Եթե նստում ենք տանը և ոչինչ չենք անում, շատ բան է փոխվում, բայց, ցավոք սրտի, դեպի վատը»:

Ակտիվիստը հավելեց, որ 25 տարի առաջ անկախությունը և պատմական հայկական հողը նրան համար չէին վերանվաճվել արյան գնով, որ լիներ ոչ թե իրավական, այլ այն պետությունը, որը հիմա կոչվում է Հայաստան:

Ըստ Արսեն Մանուկյանի՝ մութ ու ցուրտ տարիներ, պատերազմ, տեսած այն մարդիկ, որոնք չեն արտագաղթել, այն հույսով են մնացել, որ մի օր լավ է լինելու:

«Մենք սրա՞ն էինք արժանի, որ անցել ենք այդքան դժվարությունների միջոցով, որ այսպիսի կյանքի արժանանանք»,-հարցրեց Արսեն Մանուկյանը:  Նա հավելեց՝ չի լինում լավ իշխանություն, լինում է պահանջատեր հասարակություն:

14.48

Նախաձեռնության անդամ Կարեն Հովհաննիսյանը «պահանջատեր» քաղաքացիներին ողջունելուց հետո հայտարարեց, թե 1988թ-ից հետո Ազատության հրապարակը չէր տեսել այսքան միասնություն ու համախմբվածություն։


«Ուրախ եմ, որ «Դ!ԵՄ ԵՄ»-ը միայն ես չեմ, մի քանի արկածախնդիր երիտասարդներ չեն, այլ մի ողջ ժողովուրդ։ Ուրախ եմ, որ անցած աշնանից սկսած պայքարը մի ամբողջ հայ ժողովրդի ու հայ մարդու պայքար է՝ անկախ կուսակցական պատկանելությունից»,-ասաց նա։


Կարեն Հովհաննիսյանը նշեց, թե «Դ!ԵՄ ԵՄ»-ը նաև կողմ է։ «Կողմ ենք բարեկեցիկ կյանքին, կողմ ենք ազատ ու ժողովրդավար պետությանը, կողմ ենք, որ համայն աշխարհի հայությունը տուն դառնա, որ հայն ապրի իր տանն ու շենացնի իր երկիրը, որ հայը հայ մնա, պահպանի իր տեսակը, և դա է պատճառը, որ մենք ի սկզբանե դեմ կանգնեցինք հակահայկական օրենքին»,-ասաց նա և ևս մեկ անգամ հարկ համարեց պետական այրերին հիշեցնել, որ պահանջատերը ոչ թե միայն «Դ!ԵՄ ԵՄ»-ն է, այլ՝ մի ողջ ժողովուրդ։

«Տեր կանգնենք մեր երկրին ու մեր իրավունքներին, քանզի մենք ենք տերը մեր երկրի»,–հայտարարեց նա։

14.39

Քաղաքացու շահը վեր է ամեն ինչից, և մենք մի կողմ ենք դրել ամեն ինչ և կանգնած ենք Ազատության հրապարակում: Այս խոսքերով սկսեց «Դ!ԵՄ ԵՄ» նախաձեռնության անդամ Դավիթ Մանուկյանը՝ ձայն տալով նույն նախաձեռնության անդամ Հայկ Ավետիսյանին, ով իր ելույթը սկսեց՝ դիմելով հրապարակում հավաքված մարդկանց՝ «Կեցցեք»:


Նա ընթերցեց «Հայկական վերածնունդ» կազմակերպության Ֆրանսիայի, Գերմանայի, Իտալիայի, Չեխիայի, Կանադայի, Լիբանանի և Ռուսաստանի մասնաճյուղերի աջակցություն-ուղերձը Ազատության հրապարակին:

«Սթափվել և հաշվի նստել երկրի երիտասարդների արդար պահանջների և Սահմանադրության հետ»,-կոչ է արվում Կառավարությանը:


Ուղերձում նաև ասվում է, որ Կառավարությունն իր տնտեսական սնանկ քաղաքականության պատճառով կանգնած է պետական գանձարանի դատարկության առջև, որն էլ ցանկանում է լցնել ժողորդին կեղեքելու տարբեր ձևերով, այդ թվում՝ միջին խավի երիտասարդների աշխատավարձից պարտադիր կուտակային գանձումով:


Հրապարակը մեկ րոպե լռությամբ հարգեց ականավոր հայ քանդակագործ Արա Շիրազի հիշատակը։

14.10

«Կուտակային կենսաթոշակների մասին» օրենքի որոշ դրույթների դեմ հանդես եկող «Դ!ԵՄ ԵՄ» նախաձեռնության անդամներն այսօր հանրահավաք են անցկացնում Երևանի Ազատության հրապարակում։ Հավաքի ավարտից հետո կմեկնարկի երթ Երևանի կենտրոնական փողոցներով:

Նախաձեռնության անդամները հնչեցրել են հավաքի նպատակները՝ ցույց տալ համախմբվածությունն ու հանրությանը ներկայացնել այն ամենը, ինչ տեղի է ունեցել հունվարի 18-ի հավաք-երթից հետո և տալ տեղի ունեցած իրադարձությունների գնահատականը:


Ավելի վաղ հայտնի էր դարձել էր, որ հավաք-երթին մասնակցում են և ի լրումն նախաձեռնության անդամների՝ առանձին ելույթներով հանդես կգան 4 ոչ իշխանական ուժերի՝ Հայ ազգային կոնգրեսի, «Բարգավաճ Հայաստան», «Ժառանգություն» և «Հայ Յեղափոխական Դաշնակցություն» կուսակցությունների մեկական ներկայացուցիչներ, ԱԺ «Հայ ազգային կոնգրես» խմբակցության պատգամավոր Նիկոլ Փաշինյանը, Նախախորհրդարանի անդամ, Շուշիի առանձնակի գումարտակի հրամանատար Ժիրայր Սեֆիլյանը, ինչպես նաև դերասան Աշոտ Ադամյանը։

Հիշեցնենք, որ «Դ!ԵՄ ԵՄ» նախաձեռնության անդամները Սահմանադրական դատարանից պահանջում են հակասահմանադրական ճանաչել օրենքի որոշ դրույթներ, մասնավորապես` պարտադիր բաղադրիչը։ ԱԺ վերոնշյալ 4 խմբակցություններն այս հարցով դիմել են Սահմանադրական դատարան, որն իր որոշման մասին պետք է հայտնի ս. թ. մարտի 28-ին։