Վարչապետը լսել է կուտակայինի մասով ՏՏ ներկայացուցիչների մատնանշած վտանգները. որոշվել է «2-րդ ռաունդով» լուծումներ գտնել

Վարչապետ Հովիկ Աբրահամյան-ՏՏ ներկայացուցիչներ հանդիպմանը ներկայացվել է տեղեկատվական տեխնոլոգիաների ոլորտի Ինֆորմացիոն տեխնոլոգիաների ձեռնարկությունների միության այն տեսակետը, որ «կուտակային»-ի վերաբերյալ ՍԴ որոշումից հետո հաստատված այս «երկչոտ» վիճակում, եթե հանկարծ պետությունը որոշի դիմել կոշտ մեթոդների, ապա դա կհանգեցնի մի շարք ձեռնարկությունների՝ Հայաստանից դուրս տեղափոխվելուն: Այս դիտարկմանն ի պատասխան Հովիկ Աբրահամյանը խոստացել է լուծումներ առաջարկել և որոշվել է «կուտակային»-ի հետ կապված հարցերը քննարկել «երկրորդ ռաունդով»:

Այս մասին Tert.am-ի հետ զրույցում նշեց Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը. «Նկարագրեցինք այս վիճակը, վարչապետն ասաց, որ ինքը դեռ մի շարք հանդիպումներ պետք է անցկացնի, ասաց, որ շուտով կառավարություն կձևավորվի, և ինքը կփորձի լուծումներ առաջարկել: Եվ պիտի երկրորդ «ռաունդը» քննարկենք»:

Հիշեցնենք, որ Հովիկ Աբրահամյանն իր վարչապետության երրորդ աշխատանքային օրը հանդիպել էր ոլորտի ներկայացուցիչների հետ, հայտարարել, որ իր մոտեցումը լինելու է գործնական և ավելացրել. «Ոչ միայն այս ոլորտի, այլև բոլոր ոլորտների հետ մեր բոլոր պայմանավորվածությունները լինելու են խոսք և պատասխանատվություն: Ակնկալում եմ ձեր ակտիվ մասնակցությունը և առաջարկությունները»

Ի պատասխան հարցի, թե ինչպիսին էր «կուտակային»-ի հարցով Հովիկ Աբրահամյանի տրամադրվածությանը, Կարեն Վարդանյանն ասաց. «Ես կարծում եմ՝ ավելի մոտ էր դրականի»։ Իսկ թե կոնկրետ «պարտադիր կուտակային»-ի ներդրման մասին հարց հնչե՞լ է և ի՞նչ է պատասխանել Հովիկ Աբրահամյանը, ՏՏ ոլորտի մասնագետը հայտարարեց, որ կոնկրետ հարցեր չեն տվել, ուղղակի ներկայացրել են իրենց դիրքորոշումը:

«Մեր հանդիպումն ավելի շատ ծանոթացման հանդիպում էր, մենք մեր դիրքորոշումն ենք ասել, ինքն էլ ասել է՝ կմտածեմ: Ինքը ինչ-որ շատ կտրուկ դիրքորոշումներ չի արտահայտել, մենք ասել ենք մեր դիրքորոշումը»,-մանրամասնեց Կարեն Վարդանյանը:

ՏՏ մասնագետը նշեց, որ իրենք պատրաստակամությունն են հայտնել կառավարությանը՝ «պարտադիր-մարտադիրի» կասեցման հարցում, ինչպես նաև՝ մասնակցել օրենքի նոր մշակմանը, որը, ըստ նրա, Սահմանադրական դատարանի որոշման իրավական հետևանքը պետք է լինի:

Հիշեցնենք, որ ՀՀ Նախագահ Սերժ Սարգսյանը հայտարարել էր, որ վարչապետը կշարունակի այն բարեփոխումները, որոնք ընթացքի մեջ են և ի լրումն այս ծրագրերի՝ առանձնացրել պարտադիր կուտակային համակարգը:

Այս հայտարարության առնչությամբ Կարեն Վարդանյանը հայտնեց. «Կարծում եմ՝ Նախագահը խորը թյուրիմացության մեջ է, և կարծում եմ, որ եթե նորմալ քննարկումներ լինեն, և Նախագահը պատկերացնի, թե ինչ պրոբլեմներ են ստեղծվում, ապա Նախագահը, մարդ է, կարծիք է արտահայտել, կարող է իր կարծիքը փոխել»:

Ավելին՝ Կարեն Վարդանյանը բառախաղով ընդգծեց. «Չեմ կարծում, որ Նախագահը «կուտակայինի»-ի վրա է երդվել, ինքը երդվել է Սահմանադրության վրա: Եվ միակ բանը, որ չպիտի խախտի՝ Սահմանադրությունն է: Իսկ «կուտակային»-ի վերաբերյալ կարծիքը, որ հայտնել է, կարող է փոխել»:

Ըստ նրա՝ քննարկված հաջորդ ուղղությունը եղել է ոլորտի զարգացման հարցը՝ տեխնոլոգիական ձեռներեցություն, կրթություն, ոլորտի կառավարման համակարգ:

Ձեռնարկությունների ինկուբատոր հիմնադրամի տնօրեն Բագրատ Ենգիբարյանը, ով նույնպես ներկա է եղել հանդիպմանը, մեզ հետ զրույցում ավելացրեց, որ վարչապետի հետ քննարկել են, որ պետք է տարբեր աշխատանքային խմբեր ստեղծել, որպեսի հասկանան, թե ինչ փոփոխություններ պետք է արվեն օրենքում:

«Նրա տրամադրվածությունը համագործակցության էր, այսինքն՝ փորձել այնպես անել, որպեսզի խնդիրներ չունենա, եթե կա որևէ խնդիր, պետք է քննարկվի ու լուծում տրվի, որպեսզի հասարակությունը թյուրիմացության մեջ չընկնի»,-ասաց նա:

Վերջինիս փոխանցմամբ՝ իրենք պարտադիրի մասով մանրամասներ չեն հարցրել Հովիկ Աբրահամյանից, բայց կարծում են, որ լուծում կգտնվի: «Կուտակայինին ոչ ոք դեմ չէ, բայց «պարտադիր»-ի մասով պետք է տարբեր մոտեցումներ լինեն, հարցն այն է, որ «պարտադիր»-ի հետ կապված խնդիրներ կան: Օրինակ՝ Սահմանադրական դատարանը վճիռ է կայացրել, օրենքի որոշ կետեր հակասահմանադրական է ճանաչել, այդ դեպքում ինչո՞ւ է օրենքն ուժի մեջ, մարդիկ չեն հասկանում, թե ինչ պետք է անեն»,-ասաց Բագրատ Ենգիբարյանը:

Նա նաև տեղեկացրեց, որ վարչապետի հետ պայմանավորվել են համատեղ աշխատել և կարծում են, որ երբ կառավարությունը նշանակվի, արդեն Հովիկ Աբրահամյանը հանձնարարականներ կտա կառավարության անդամներին և ավելի ակտիվ այդ հարցով կաշխատեն: