Հովիկ Աբրահամյանը մտադիր է կրկնել Սինգապուրի փորձը և հաջողության հասնել՝ սկսելով իր մերձավորներից

Ազգային ժողովում լրագրողների հետ ճեպազրույցի ժամանակ ՀՀ վարչապետ Հովիկ Աբրահամյանն անդրադարձավ երկրում առկա ստվերին ու նշեց, թե բոլոր երկրներում էլ ստվեր կա, և իրենք նպատակ են դրել այն հարկային դաշտ բերել։ «Մենք տեսնում ենք, որ կա հնարավորություն հարկային դաշտը դուրս բերել ստվերից, և հիմա օգտագործելու ենք մեր այդ լծակները»,- ասաց նա։ Իսկ թ ինչու է հաճախ նա հայտարարում, թե սկսելու է հենց իր մերձավորներից, պատասխանեց. «Սինգապուրի վարչապետին, երբ հարցրել են, թե ինչպես է հաջողության հասել, նա պատասխանել է, որ սկսել է իր մերձավորներից»։ Հովիկ Աբրահամյանը նաև խոսեց Գագիկ Ծառուկյանի և Լևոն Տեր-Պետրոսյանի հանդիպումից՝ նշելով, որ ողջունում է, քանի որ կարծում է, որ յուրաքանչյուր հանդիպում ունի իր դրական և բացասական կողմերը: Նա նշեց, թե իրեն չի հետաքրքրում, թե դա կարող է իր դեմ լինել կամ կողմ։ «Ես իմ գործն եմ անելու, աշխատելու եմ, հիմա ով ուզում է դեմ լինի, կողմ լինի: Ի՞նչ է տալու ինձ, եթե ես իմանամ, որ ինձ դեմ են, գնամ ասեմ ինձ դեմ մի խոսե՞ք»,- հարցրեց նա։

-Պարո՛ն Աբրահամյան, ինչպես եք պայքարելու ստվերի դեմ, եթե չգիտեք, թե ինչքան է ստվերը մեր երկրում։

-Բոլոր երկրներում էլ ստվեր կա, բայց մեզ մոտ ավելի շատ է, չգիտեմ որքան է, բայց կա: Մենք տեսնում ենք, որ կա հնարավորություն հարկային դաշտը դուրս բերել ստվերից, և հիմա օգտագործելու ենք մեր այդ լծակները։

-Ինչո՞ւ եք անընդհատ հայտարարում, որ սկսելու եք Ձեր մերձավորներից։

-Պա՞րզ չէ, թե ինչի համար եմ ասում։ Սինգապուրի վարչապետին, երբ հարցրել են, թե ինչպես է հաջողության հասել, նա պատասխանել է, որ սկսել է իր մերձավորներից: Ես նկատի ունեմ, որ մեր բոլոր մերձավորներն ու ընկերները պետք է հասկանան, որ առաջինը իրենք են պարտավոր որևէ խախտում թույլ չտալ իրենց աշխատանքի մեջ, հարկային դաշտ գան բոլորը: Մեր բոլորի նպատակը դա է, և կարծում եմ՝ ես շատ պարզ եմ ասել: Որևէ տողատակ փնտրել չարժե: Ես մարդկանց հորդորում եմ, որ իմ մերձավորներից սկսած բոլորի նկատմամբ պետք է հավասար վերաբերմունք ցուցաբերել։

-Իսկ մոնիթորինգ արվե՞լ է, թե ովքեր են ստվերում գործում։

-Ո՛չ, դա կանեն պատկան մարմինները: Մենք մի շատ լավ գործ ենք նախաձեռնել և ունենալու ենք հաջողություն: Եթե դուք էլ կլսեք, որ կան նման դեպքեր, մենք կարձագանքենք յուրաքանչյուրին, կստուգենք, եթե իրականությանը կհամապատասխանի, մենք կարգի կհրավիրենք։

-Հավատո՞ւմ եք, երբ պաշտոնյան ասում է, որ ինքը բիզնես չունի։

-Եթե նա ասում է ունի, ուրեմն պաշտոնից կհրաժարվի, որովհետև օրենքով իրավունք չունի զբաղվել բիզնեսով: Յուրաքանչյուր մարդ կհասկանա, որ պաշտոնն ու բիզնեսով զբաղվելն անհամատեղելի են։

-Այսինքն կստուգե՞ք բոլոր պաշտոնյաներին։

-Այո՛։

-Նաև Ֆինանսների նախարար Գագիկ Խաչատրյանի՞ն:

-Այո՛։

-Իսկ դուք տեղեկություն ունեք, թե որքա՞ն է կազմում ստվերը։

-Տարբեր թվեր են հնչեցնում` 25-30%։

-Հավասար խաղի կանոններ ստեղծելը ինչպե՞ս եք հաշվարկել, ե՞րբ կազդի բյուջեի մուտքի վրա։

-Դեռ չի ավարտվել, կավարտվի կասենք։ Ապրանքաշրջանառության փաստաթղթավորումը, մինչև չիրականացնենք, չենք կարող ասել։

-Պարո՛ն Աբրահամյան, Կառավարությունը հինգ տոկոս տնտեսական աճի մասին է հայտարարել, արդյոք սա նշանակո՞ւմ է, որ հրաժարականի համար արդեն հիմք կա։

-Ես ինչո՞ւ պիտի հրաժարական ներկայացնեմ: Մենք նոր ենք սկսել աշխատել, մեր նպատակն է գալ ու երկար աշխատել ու պետության համար խնդիրներ լուծել: Մենք փորձելու ենք ապահովել տնտեսական աճ ու այս տարի մեր գործը լինելու է կայունության ապահովումը ։

-Պարո՛ն Աբրահամյան, արդյոք Ձեզ կհաջողվի՞ բավարարել ԲՀԿ-ի պահանջները։

-Ինչ է պահանջում, ես տեղյակ չեմ, ասում են, որ կտեսնենք, եթե ծրագրերը կիրականացվի, նորմալ կաշխատի, չենք պահանջի, չի աշխատի՝ կպահանջենք։ Շատ նորմալ գնահատական է, ես գոհ եմ։

-Իսկ Տիգրան Սարգսյանը չէր աշխատում, դրա համար պահանջեցի՞ն նրա հրաժարականը։

-Ձեզ ինչո՞ւ է թվում, որ ես Տիգրան Սարգսյանի աշխատանքին պետք է գնահատական տամ։

-Պարո՛ն վարչապետ, ասացիք, որ մտադիր եք «Վարչապետների ակումբ» ստեղծել, կմանրամասնե՞ք։

-Երեկ եմ հնչեցրել այդ մասին, բայց հետամուտ կլինեմ, կմտածենք ձևաչափի մասին, իմ կարծիքով ճիշտ գաղափար է և եթե արդյունավետ լինի կօգտագործենք իրենց փորձը, իրենց գիտելիքները։ Նախկին վարչապետներ ունենք, որոնք լավ են աշխատել և ունեն մեծ փորձ ու գիտելիքներ։

-Պարո՛ն Աբրահամյան, կարո՞ղ ենք ասել, որ Դուք խափանել եք քառյակի գործունեությունը։

-Ես որևէ գործ խափանելու տրամադրություն և մտադրություն չունեմ, իմ բոլոր տրամադրությունները լավ գործեր անելն է, ոչ թե որևէ գործ խափանելը։

-Պարո՛ն վարչապետ, դուք ամբիոնից դեսպանների աշխատանքից դժգոհություն հայտնեցիք, ինչո՞ւ։

- Ո՛չ, ես ասացի, որ իրենց պարտավորությունների, աշխատանքի գնահատականի բաղադրիչը պետք է լինի նաև այն, թե իրենք ինչպես են աշխատում։ Այո՛, ներդրումների առումով պետք է իրենք փորձեն Հայաստանը օտար ներդրողների համար գրավիչ ներկայացնել։ Ես ասում եմ, որ դեսպանների աշխատանքում պետք է ներառվի նաև ներդրումներ անելը։ Դա մեղադրա՞նք է։

-«Նաիրիտի» վերագործարկման հարցում ի՞նչ եք նախատեսում անել։

-Բարդ խնդիր եք ասում, հիմա մենք ուզում ենք հանձնաժողով ստեղծել, որպեսզի որոշում կայացվի՝ «Նաիրիտը» հնարավո՞ր է վերագործարկել, թե՝ ոչ։

-«Ռոսնեֆտը» հրաժարվե՞լ է։

-Ո՛չ, նման որոշում չկա։

-Իսկ աշխատավարձերի խնդիրը ինչպե՞ս եք լուծելու։

-Աշխատավարձի պարտք ունենք, դեռ 12 մլն դոլարից ավել, և հիմա Էներգետիկայի նոր նախարարը քննարկում է բոլոր ճանապարհները, և պետք է հստակեցնի, ինձ զեկուցի, տեսնեք ոնց ենք լուծումներ տալու։

-Պարո՛ն Աբրահամյան, ընդդիմությունը իշխանափոխության կհասնի՞։

-Ինչի՞, նպատակ ունե՞ն։

-Կարծես թե այո։

-Ես չգիտեի։

-Պարո՛ն Աբրահամյան, Ձեր անունը մամուլում շրջանառվում է, որ կոնկրետ Դուք միջամտել եք Գորիսի քաղաքապետի ընտրություններում և այդ իսկ պատճառով երկու թեկնածուները հանել են իրենց թեկնածությունը։ Ինչպե՞ս կմեկնաբանեք։

-Որևէ միջամտություն չի եղել և ինձ համար միևնույնն է, թե մեր բնակչությունը որ թեկնածուին կընտրի։

-Բացառո՞ւմ եք, որ Սուրիկ Խաչատրյանը կարող է միջամտած լինի։

-Ինչպե՞ս կարող եմ բացառել, եթե նման տեղեկություն չունեմ։

- Իսկ կբացատրե՞ք, թե ինչ է նշանակում պարտադիր, բայց ոչ պարտադրված։

-Դա օրենքի փաթեթում կլինի, բացատրությունն էլ, ամեն ինչն էլ։

-Պարո՛ն Աբրահամյան, ինչպե՞ս կմեկնաբանեք Գագիկ Ծառուկյանի և Լևոն Տեր-Պետրոսյանի հանդիպումը:

-Ողջունում եմ, յուրաքանչյուր հանդիպում ունի իր դրական և բացասական կողմերը:

-Չի՞ մտահոգում Ձեզ նրանց համագործակցությունը, որ կարող է, ի վերջո, դեմ դուրս գալ։

-Ոչ մի բան չեմ բացառում, հիմա դրա համար ինչ է պետք, որ ես լավ աշխատեմ, ազնիվ աշխատեմ, թափանցիկ աշխատեմ, ինչքան ուզում են դեմ լինեն, կարևորը փաստ չլինի, որ ինձ մեղադրեն, և որևէ սխալ որոշում չկայացնենք, աշխատենք, իհարկե, հնարավոր է, որ սխալ որոշումներ լինեն, և ես համոզված եմ, որ նոր թիմի մեջ կա եռանդ, և բոլորը համերաշխ ձևով փորձում են գործը տանել առաջ, դա շատ կարևոր հանգամանք է ինձ համար, իսկ ով չի աշխատի կամ վատ կաշխատի, մենք կբաժանվենք իրենից, ես էլ համոզված եմ, որ ինձ մոտ հաջողվելու է։

-Եթե վեց ուժերից հինգը չպաշտպանի Ձեր ծրագիրը կարծում եք համագործակցություն կստացվի՞։

-Այո՛, փորձելու եմ համագործակցել։

-Իսկ դա ինչի՞ մասին կհուշի։

-Ոչ մի բանի։