Գնահատականներս բայղուշություն մի ընդունեք, բայց պետության վիճակն այս ձևով չեք փոխի. Ռուբեն Հակոբյան

ԱԺ «Ժառանգություն» խմբակցության ղեկավար Ռուբեն Հակոբյանը կառավարության ծրագրի եզրափակիչ ելույթի ժամանակ նախ հարցրեց, թե նախորդ կառավարությունը չէ՞ր կարող իր ծրագրերն իրականացնել և ինքն էլ պատասխանեց, թե՝ իհարկե կարող էր, ուղղակի քաղաքական կամք չդրսևորեց։ Ըստ նրա, նախորդն էլ ասում էր, որ ստվերը պետք է տանել տնտեսական դաշտ, կոռուպցիան վերցնել, մենաշնորհների հաղթարշավի դեմ պայքարել, բայց չարեց, քանի որ համակարգին դա ձեռնտու չէր։

«Ժառանգություն» խմբակցության ղեկավարը հարցրեց, թե ինչ-որ մեկը կասկածո՞ւմ է, որ նոր կառավարության հարցում ինչ-որ բան է փոխվելու, չնայած նրան, որ Հովիկ Աբրահամյանը ցանկանում է կրկնել սինգապուրյան հրաշքը։

«Հիմա ի՞նչ է փոխվել, ըստ էության ոչ մի բան չի փոխվել»,-ասաց նա և նշեց, թե հնչող տեսակետները, թե նոր կառավարության կազմն իր վստահությամբ, գրագիտությամբ ու փորձով առավել է, ընդամենը քծնելու փորձ է և ոչ ավելին։

Դիմելով դահլիճում նստած վարչապետին՝ պատգամավորը նշեց, թե երբ վերջինս եկել էր մասնակցելու քառյակի նիստին և ասում էր, թե եկեք նորմալ աշխատենք, դրա համար պետք է բերեր բովանդակային երկու հարց։ «Ասեիք՝ ընդդիմության մասին օրենքը, լծակները տալիս ենք ձեզ՝ կլինի Վերահսկիչ պալատ, վերահսկիչ հանձնաժողով, և այլն։ Հիմա խեղճ բյուջեին մտցնում եք մի փակ սենյակ, որտեղից միայն իշխանությունն է ներս մտնում, բնականաբար հարձակվում եք այդ բյուջեի վրա։ Մեր իշխանություններն ապացուցել են, որ իմունիտետ չունեն փողի նկատմամբ, փող են տեսնում՝ սկսում են դողալ»,-նշեց նա և ավելացրեց, որ եթե ծրագրի իրականացման համար շեշտը դնում են առանձին անձի մարդկային որակների վրա, որը պետք է փրկի պետությունը, դա հեքիաթ է։

Ռուբեն Հակոբյանը ներկայացրեց գործարարների հետ վարչապետի հանդիպման իր տպավորությունը։ «Ասացիք՝ ճիշտ է, համակարգը թույլ է տալիս կոռուպցիայով զբաղվել, բայց եկեք ընկերական վերացնենք ու պետությունը փրկենք։ Դա փոքր ռեսուրս է և արագ կսպառվի»,-նշեց նա։

Նա հիշեցրեց, թե երբ ՎՊ-ն չարաշահումների մասին էր խոսում՝ Հովիկ Աբրահամյանը կոնկրետ պատասխան էր պահանջում և դիմելով վարչապետին՝ հարցրեց. «Դուք գրել էիք, որ կոնկրետ պատասխան պետք է ստանաք, ստացա՞ք»։

Ռուբեն Հակոբյանը նկատեց, թե վարչապետը կողմնորոշվելու հնարավորություն ունի. «Կամ կարճ ժամանակում ինքներդ հրաժարական եք տալու, կամ՝ հեռացնելու են ու դուք էլ ասելու եք, թե որոշեցի հեռանալ։ Իսկապես կողմնորոշվելու հարց ունեք»,-ասաց նա։

Նա ծրագրի քվեարկության վերաբերյալ էլ տեղեկացրեց, թե ԱԺ չորս ուժերը որոշում են կայացրել ամբողջությամբ մերժել ծրագիրը և չմասնակցել քվեարկությանը։ Ռուբեն Հակոբյանը նաև նկատեց, թե այդ քայլը Հովիկ Աբրահամյանի անձի դեմ չէ։ Իսկ եթե ամեն դեպքում վարչապետին հաջողվի, պատգամավորը նշեց. «Իրականացրեք, իմ մեջ ուժ ու կամք կա ներողություն խնդրելու»։

Պատգամավորը նշեց, թե երբեմնի հզոր Հայաստանից մնացել է այն, ինչ կա, միմիայն ղեկավարության պատճառով, ովքեր մեկ Ռուսաստան են գնում, մեկ Միացյալ Նահանգներ ու Ռուսաստան միաժամանակ, մեկ Եվրոպա. «Մյուս մասը Օբամա Կոնչիտաներ է բերում, բայց բոլորս էլ գիտենք՝ խանգարողները մեր կողքը նստած են»։

«Գնահատականներս բայղուշություն մի ընդունեք, ուզում ենք՝ քաղաքագիտական հարթություն մտեք և գիտակցեք, որ պետության վիճակն այս ձևով չեք փոխի»,-եզրափակեց նա։