Այսօր կայանալիք Հայաստան-Սերբիա խաղից առաջ (տեսանյութ)

«Եվրո-2016», Ընտրական փուլ
Երեւան, «Հանրապետական» մարզադաշտ, ժ. 20:00 («Առաջին ալիք»)
Մրցավար՝ Տոմ Հագեն (Նորվեգիա)
Բուքմեյքերներ՝ 5.25-3.75-1.73

Այսօր «Եվրո-2016»-ի ընտրական փուլում Հայաստանի հավաքականը կանցկացնի իր երկրորդ հանդիպումը՝ հյուրընկալելով Սերբիայի հավաքականին: Ընտրական փուլի մեկնարկային խաղում հայ ֆուտբոլիստները հյուրընկալվելիս 1:2 հաշվով զիջել են Դանիային:

Պատմություն
Սերբերը ՀՀ հավաքականի այն անհարմար մրցակիցներից են, որի հետ անցկացրած 3 հանդիպումներում էլ մեր ֆուտբոլիստներին չի հաջողվել գրավել մրցակցի դարպասը: Հուսանք, որ Երևանում մեր ֆուտբոլիստներին վերջապես կհաջողվի գտնել սերբերի դարպասի բանալին:

Հայաստանի և Սերբիայի հավաքականները 2-րդ անգամ են հայտնվում Եվրոպայի առաջնության ընտրական մրցաշարի միևնույն խմբում: «Եվրո-2008»-ի ընտրական մրցաշարում նրանք ընդգրկված էին A խմբում: Առաջին հանդիպումը կայացավ ուղիղ 8 տարի առաջ՝ 2006թ.-ի հոկտեմբերի 11-ին Բելգրադում:

Մեր ֆուտբոլիստները խաղային բոլոր առումներով զիջեցին սերբերին՝ 0:3 խոշոր հաշվով պարտություն կրելով:

Այդ խաղում Հայաստանի հավաքականի կազմն այսպիսին էր. Գեւորգ Կասպարով, Եղիշե Մելիքյան, Կարեն Դոխոյան, Սարգիս Հովսեփյան (ա), Ռոբերտ  Արզումանյան, Ռաֆայել Նազարյան, Աղվան Մկրտչյան, Սամվել Մելքոնյան, Արամ Հակոբյան (Արթուր Մինասյան, 69), Էդգար Մանուչարյան (Արմեն Տիգրանյան, 79), Արմեն Շահգելդյան (Նշան Էրզրումյան, 65):

Մրցակիցների պատասխան հանդիպումը կայացավ մեկ տարի անց՝  2007թ. հոկտեմբերի 13-ին Երևանում: Անցած ժամանակահատվածում ՀՀ հավաքականի խաղը զգալիորեն բարելավվել էր: Սերբերի հետ խաղում հավաքականի ֆուտբոլիստների գործողությունները ղեկավարում էին Պորտերֆիլդի օգնականները՝ Թոմ Ջոնսն ու Վարդան Մինասյանը: Այդ խաղում դարպասները մնացին անառիկ:

ՀՀ հավաքականը հանդես եկավ հետևյալ կազմով. Ռոման Բերեզովսկի, Ալեքսանդր Թադեւոսյան, Սարգիս Հովսեփյան (ա), Ռոբերտ  Արզումանյան, Կարեն Դոխոյան, Արարատ Առաքելյան, Արթուր Ոսկանյան (Ռոմիկ Խաչատրյան, 70), Լևոն Պաչաջյան, Արտավազդ Քարամյան, Համլետ Մխիթարյան (Արա Հակոբյան, 82), Սամվել Մելքոնյան (Ռոբերտ Զեբելյան, 62):

Սերբերին չհաջողվեց եզրափակիչ փուլի ուղեգիր նվաճել: Նրանք խմբում զբաղեցրին 3-րդ տեղը: Իսկ ՀՀ հավաքականը հանգրվանեց 7-րդ տեղում՝  իրենից հետ թողնելով ադրբեջանցիներին, ում հետ նախատեսված հանդիպումներն այդպես էլ չկայացան:

Հայաստանի և Սերբիայի հավաքականների միջև 3-րդ հանդիպումն ընկերական բնույթ էր կրում: Այն կայացավ 2012թ. փետրվարի 28-ին Կիպրոսի Լիմասոլ քաղաքի «Ցիրիոն» մարզադաշտում: Հաջորդ օրը մեր հավաքականն ընկերական 2-րդ հանդիպումն էր անցկացնելու Կանադայի ընտրանու հետ, ուստի սերբերի հետ խաղում Վարդան Մինասյանն ասպարեզ էր դուրս բերել հիմնական կազմի ընդամենը մի քանի խաղացողների՝  խաղալու հնարավորություն ընձեռելով երիտասարդ ֆուտբոլիստներին, որոնցից 7-ն այդ օրը նորամուտը նշեց ազգային հավաքականում:

 Իսկ ամենափորձառուն ավագի թեւկապն առաջին անգամ կրող Ռոբերտ Արզումանյանն էր, ով սերբերի հետ խաղում ՀՀ ազգային հավաքականի մարզաշապիկով 50-րդ անգամ խաղադաշտ դուրս եկավ:

Այս անգամ էլ մեր ֆուտբոլիստներին չհաջողվեց գրավել սերբերի դարպասը: Իսկ Սերբիայի հավաքականը դեռևս առաջին խաղակեսում Զդրավկո Կուզմանովիչի և Բրանիսլավ Իվանովիչի խփած 2 անպատասխան գոլերի շնորհիվ հաղթանակ տոնեց:

ՀՀ հավաքականի կազմն այսպիսին էր. Գրիգոր Մելիքսեթյան, Ռոբերտ  Արզումանյան (ա), Վարազդատ Հարոյան (Անդրանիկ Ոսկանյան, 76), Հովհաննես Համբարձումյան (Ղուկաս Պողոսյան, 60), Գագիկ Դաղբաշյան, Կառլեն Մկրտչյան, Մասիս Ոսկանյան (Կամո Հովհաննիսյան, 46), Էդգար Մալաքյան (Վալտեր Պողոսյան, 68), Արթուր Յուզբաշյան, Գևորգ Ղազարյան, Արթուր Սարկիսով (Դավիթ Մանոյան, 46):

Կադրային խնդիրներ

Հայաստանի հավաքականի կադրային խնդիրների մասին շատ է խոսվել: Վնասվածքներ ունեն Հենրիխ Մխիթարյանը, Արաս Օզբիլիսը, Արտակ Եդիգարյանը, Վալերի Ալեքսանյանը, Հրայր Մկոյանը, Գեւորգ Ղազարյանը, իսկ Յուրա Մովսիսյանը դեռ պատրաստ չէ դուրս գալ ասպարեզ: Սերբերի մոտ վիճակն ավելի բարվոք է: Բացակայում են Նեւան Սուբոտիչը եւ Ադեմ Լյայիչը, ովքեր տարաձայնություններ ունեն իրենց երկրի ֆեդերացիայի հետ:

Վիճակագրություն
Հայաստանի հավաքականը վերջին յոթ խաղերում առնվազն երկու գնդակ է բաց թողել, ինչը վկայում է պաշտպանությունում առկա սարսափելի խնդիրների մասին:
Հայաստանի հավաքականը նախորդ 5 հանդիպումներում պարտվել է՝ կրկնելով 1995-96թթ. գրանցված հակառեկորդը:

Հայաստանի հավաքականի առջեւի գծի խաղացողներ Էդգար Մանուչարյանը եւ Մարկոս Պիզելին ազգային թիմի պատմության լավագույն ռմբարկուների տասնյակում են եւ այսօրվա խաղում կարող են բարելավել իրենց ցուցանիշները:

Սերբիայի հավաքականը հոլանդացի Դիկ Ադվոկատի գլխավորությամբ անցկացնելու է առաջին ընտրական հանդիպումը:

Հավանական կազմերը
Հայաստանի ընտրանին՝ ինչպես եւ Դանիայի հետ մրցավեճում, հանդես է գալու 5 պաշտպաններով: Նախախաղային մարզումից կարելի է ենթադրել, որ պաշտպանության կենտրոնում ելույթ կունենան փյունիկցիներ Վարազդատ Հարոյանը, Տարոն Ոսկանյանը եւ «Ակտոբեում» հանդես եկող փորձառու Ռոբերտ Արզումանյանը:

Հիմնական կազմ է վերադառնալու հենակետային կիսապաշտպան Կառլեն Մկրտչյանը:

Առջեւի գծում պետք է գործեն Արթուր Սարկիսովը եւ Էդգար Մանուչարյանը, ում ավելի խորքից պետք է օգնի Մարկոս Պիզելին:

Հայաստան. Ռոման Բերեզովսկի, Լեւոն Հայրապետյան, Վարազդատ Հարոյան, Ռոբերտ Արզումանյան, Տարոն Ոսկանյան, Կամո Հովհաննիսյան, Կառլեն Մկրտչյան, Արթուր Եդիգարյան, Մարկոս Պիզելի, Արթուր Սարկիսով, Էդգար Մանուչարյան:

Սերբիա. Վլադիմիր Ստոյկովիչ, Բրանսիլավ Իվանովիչ, Ալեքսանդր Կոլարով, Ստեֆան Միտրովիչ, Մատիյա Նաստասիչ, Նեմանիա Մատիչ, Զորան Տոշիչ, Նեմանիա Գուդել, Ֆիլիպ Ջորջեւիչ, Դուշան Տադիչ, Լազար Մարկովիչ: