Պորտուգալիա-Հայաստան՝ 1:0. Տարին ավարտվում ենք վերջին հորիզոնականում

Վերջ՝ 1։0։ Հայաստանի հավաքականը պարտվում է եւ մեկ միավորով մնում I խմբի վերջին տեղում։

90+1 Սարկիսովի դեմ խախտեցին կանոնները խաղադաշտի կենտրոնում: Վիլյամը Կարվալյոն դեղին ստացավ:

90՝ Մրցավարը 4 րոպե ավելացրեց հիմնական ժամանակին:
88՝ Ուիլիամ Կարվալյուն փոխարինեց Նանիին:
87՝ Սարկսովն էր հայտնվել նպաստավոր դիրքում, սակայն հարվածեց դարպասապահի վրա:

86՝ Ռոնալդուի փոխանցումից հետո Էդերը մոտ տարածությունից վրիպեց:
85՝ Նանիի հարվածը շեղ ստացվեց:
82՝ Կառլեն Մկրտչյանին փոխարինեց Մարկոս Պիզելին:

76՝ Վնասվածք է ստացել Արթուր Եդիգարյանը: Նրան փոխարինեց Արթուր Սարկիսովը:
74՝ Մովսիսյանի նկատմամբ կանոնները խախտեց Կարվալյուն: Հայաստանը տուգանային հարվածի իրավունք ստացավ. Մանուչարյանի փոխանցումից հետո պաշտպանները հեռացրին գնդակը:

72՝ ԳՈԼ: 1:0: Կրիշտիանու Ռոնալդու: Կուարեժմայի մոտ տարածությունից կատարած հարվածից հետո Բերեզովսկին ետ մղեց գնդակը, իսկ պաշտպանները չկարողացան հեռացնել այն: Վրա հասած Ռոնալդուն մոտ տարածությունից բացեց հաշիվը:
70՝ Կուարեժման փոխարինեց Դանիին:
69՝ Մխիթարյանի նկատմամբ կոպիտ խաղալու համար դեղին քարտ ստացավ Դանին:
68՝ Ռոնալդուի հեռահար հարվածից հետո Բերեզովսկին տիրեց գնդակին:
67՝ Ռոնալդուն երրորդ անգամ այս խաղում տուգանային հարվածից փորձեց հասնել հաջողության եւ կրկին «պատն» իր վրա ընդունեց հարվածը:
65՝ Պորտուգալիան անկյունային իրավունք էր ստացել, որից իրացումից հետո Լեւոն Հայրապետյանը հեռացրեց գնդակը:
63՝ Հայաստանի իրացրած անկյունայինից հետո Ռոբերտ Արզումանյանը գլխով հարվածեց, սակայն դարպասապահը տեղում էր:

62՝ Հայաստանի կազմում էլ տեղի ունեցավ փոփոխություն. Էդգար Մանուչարյանը փոխարինեց Գեւորգ Ղազարյանին:
59՝ Մեծ ճնշում գործադրեցին տանտերերը Հայաստանի դարպասին, սակայն Բերեզովսկուն հաջողվեց տիրել գնդակին Դանիի հարվածից հետո:
56՝ Առաջին փոփոխությունը. Էդերը փոխարինեց Էլդեր Պոշտիգային:
54՝ Նանին հեռվից անհաջող հարված կատարեց:
51՝ Ռոնալդուն հայտնվեց խաղից դուրս իրավիճակում:
50՝ Տանտերերի իրացրած տուգանային հարվածից հետո Բերեզովսկին տիրեց գնդակին:
48՝ Բավական ակտիվ են հայ ֆուտբոլասերները, ովքեր անդադար աջակցում են Հայաստանի ընտրանուն...

46` Մեկնարկեց երկրորդ խաղակեսը:

Առաջին խաղակեսն ավարտված է: Ընդմիջում:
45՝ Մովսիսյանն էր հայտնվել տուգանայինում, սակայն սուր անկյան տակ շեղ հարվածեց:
43՝ Տուգանային հարվածը Հայաստանն անհաջող իրացրեց եւ կարող էր վտանգավոր հակագրոհ բաց թողնել...
42՝ Պեպեն Մովսիսյանի առաջխաղացումը խախտումով կանգնեցնելու համար դեղին քարտ ստացավ:
40՝ Պոշտիգան տուգանայինում ստացավ գնդակը եւ հարվածեց, սակայն շեղ էր:
36՝ Տիագոն կենտրոնում կոպիտ խաղաց Մխիթարյանի նկատմամբ եւ դեղին քարտ ստացավ:
35՝ Յուրա Մովսիսյանը հեռվից անհաջող հարված կատարեց:
35՝ Արթուր Եդիգարյանը դեղին քարտ ստացավ:
34՝ Ռոնալդուի փոխանցումից հետո Մոուտինյոն գլխով անհաջող հարված կատարեց:
30՝ Պորտուգալացիների խաղարկած անկյունայինից հետո բավական վտանգավոր իրավիճակ էր Հայաստանի դարպասի մոտ, սակայն տանտերերը կարողացան միայն նոր անկյունային վաստակել, որի իրացումն արդեն վտանգավոր չէր:
28՝ Ռոնալդուն կրկին փորձեց հաջողության հասնել տուգանայինից, սակայն դարձյալ հարվածեց «պատի» վրա:

26՝ Մխիթարյանը Կամո Հովհաննիսյանին դուրս բերեց հիանալի դիրք, սակայն «Փյունիկի» խաղացողի հարվածից հետո Պատրիսիոն փրկեց Պորտուգալիային...
23՝ Ռոնալդուն ապակողմնորոշեց Հարոյանին եւ հարվածեց նպաստավոր դիրքից, սակայն Բերեզովսկին ետ մղեց գնդակը: Հետեւեց Կրիշտիանուի երկրորդ հարվածը, որը բարձր ստացվեց:

21՝ Գեւորգ Ղազարյանը հեռվից հարվածեց, սակայն շեղ էր:
20՝ Դանին տուգանայինի մատույցներից հարվածեց, սակայն Բերեզովսկին տեղում էր:
18՝ Հենրիխ Մխիթարյանն աջ եզրում փոխանցում կատարեց եւ վաստակեց անկյունային, որի իրացումից հետո գնդակն անցավ տանտերերին:

15՝ Մխիթարյանը տուգանային հարվածից փորձեց գրավել դարպասը, սակայն Պատրիսիոն փրկեց պորտուգալացիներին:
14՝ Մխիթարյանը հոյակապ անցում ձեռնարկեց, իսկ տուգանայինի մատույցներում նրան գցեց Կարվալյուն եւ արժանիորեն դեղին քարտ ստացավ: Հենրիխը դուրս էր գալիս բավական նպաստավոր դիրք...
11՝ Երրորդ անկյունայինն իրացրին տանտերերը. մերոնք դժվարությամբ հեռացրին գնդակը:
10՝ Տարոն Ոսկանյանի խախտումից հետո Պորտուգալիան կրկին տուգանային հարվածի իրավունք ստացավ. Ռոնալդուի հարվածն իր վրա ընդունեց «պատը»:
6՝ Տուգանայինի իրավունք էին ստացել տանտերերը, որի իրացումից հետո Տիագոն գլխով բարձր հարվածեց:

4` Մխիթարյանը տուգանային հարվածից փոխանցում կատարեց, իսկ Ռոնալդուն հեռացրեց գնդակը:
2՝ Ռոնալդուն վաստակեց անկյունային, որի իրացումից հետո գնդակն անցավ Հայաստանին:
1՝ Հանդիպումը մեկնարկեց:

23:17 Մարզադաշտում հիանալի մթնոլորտ է տիրում: Մեկնաբանն անընդհատ «տաքացնում է» ֆուտբոլասերներին, ապա գործի են անցնում պարուհիները...


23:10 Երկու թիմերն էլ սկսել են նախավարժանքը: Հիշեցնենք, որ այսօրվա խաղին ներկա է լինելու 21 հազար հանդիսական:

22։58 «Ալգարվե» մարզադաշտը եւ «հայկական» տրիբունան խաղի մեկնարկից 45 րոպե առաջ։

22։47 Արդեն հայտնի է Պորտուգալիայի հավաքականի մեկնարկային կազմը։

22:33 Հայաստանի հավաքականը ժամանեց «Ալգարվե» մարզադաշտ:



22:26 Արդեն հրապարակվել է Հայաստանի հավաքականի հայտացուցակը: Հրայր Մկոյանը, ով երեկ վնասվածք էր ստացել մարզման ժամանակ, չի ընդգրկվել մեկնարկային կազմում (տես՝ ամենաներքեւի հատվածում):

22:18 Պորտուգալիայի հավաքականը ժամանեց մարզադաշտ: Սպասում ենք Հայաստանի հավաքականին:

22:03 Մադրիդի «Ատլետիկոյի» կիսապաշտպան Տիագոն խաղի մասին ասել է հետեւյալը. «Շատ տեսագրություն ենք դիտել մրցակցի հանդիպումների: Կարող եմ նշել Մխիթարյանին, ով լավ է գործում թե՛ հարձակման գծում, թե՛ պաշտպանությունում: Նա կարողանում է արագ շարժվել գնդակով եւ ցանկացած պահի կարող է հայտնվել մեր դարպասների առջեւ: Սակայն լավ ենք ուսումնասիրել մրցակցին եւ հույս ունենք հաղթելու»:

21:46 Առաջիկա խաղի մասին այպիսի կարծիք է հայտնել Հայաստանի հավաքականի մեկ այլ նախկին կիսապաշտպան Արթուր Ոսկանյանը. «Հարկավոր է հաղթանակ տոնելու մտքով մտնել խաղադաշտ, քանզի ինչպես ցույց տվեց Ֆրանսիայի դեմ հանդիպումը, նման մակարդակի թիմերի դեմ խաղերում միայն պաշտպանվելով դրական արդյունքի չես հասնի։ Պետք է ավելի շատ հարձակվել՝ հաշվի առնելով, որ մեր ներկայիս թիմում խաղում են առջևի գծի հիանալի կատարողներ։ Մեր սերնդի թիմը կերազեր նման հարձակվողական ոճի ֆուտբոլիստներ ունենալ։ Այն ժամանակ հենց նման խաղացողներն էին պակասում, որպեսզի ավելի լավ արդյունքներ գրանցեինք, քանի որ մյուս դիրքերի խաղացողները շատ լավն էին»։

21:40 Հայ ֆուտբոլասերներն այս պահին «Ալգարվե» մարզադաշտի մերձակայքում:


21:32 Հայաստանի հավաքականի նախկին կիսապաշտպան Լեւոն Պաչաջյանը ժամանակին մրցել է Պորտուգալիայի դեմ. «Կարծում եմ՝ ինչպես 2007 թվականին այնպես էլ հիմա, Ռոնալդուին անհատապես հսկելու առաջադրանք չի լինի: Պետք է նրա դեմ խաղալիս փոխօգնությամբ գործել: Ինչ խոսք, նա այժմ իր մարզավիճակի գագաթնակետում է գտնվում, սակայն ճիշտ մարտավարության դեպքում հնարավոր կլինի չեզոքացնել նրան:

21:22 Պորտուգալացիները պատրաստել են հանդիպման բավական ինքնատիպ ծրագիր:





21:15 «Եթե մեր նախորդ տարիների հավաքականին թույլ ու վատ օրերին հավատացել եմ, ապա ներկայիս ընտրանուց 10 անգամ ավելին եմ սպասում։ Համոզված եմ՝ հիանալի ենք խաղալու և մեր ելույթը դրական ավարտ է ունենալու»,- այսպիսի կարծիք է հայտնել «Պրոֆֆուտբոլի» հեղինակ եւ վարող Սենիկ Կարա-Պողոսյանը։

21:12 «Ալգարվե» մարզադաշտը պատրաստ է Պորտուգալիա-Հայաստան խաղին: Արդեն մարզադաշտ են ժամանել հարյուրից ավել հայ ֆուտբոլասերներ:

____________________________________________________________
Պորտուգալիա-Հայաստան, 4 խաղ, +2=2-0, գնդակները՝ 5:2
Ֆարու, «Ալգարվե» մարզադաշտ, ժամը՝ 23:45
«Եվրո-2016», ընտրական փուլ