Բանկային համակարգը պատրաստ է ֆինանսավորել կայուն ու հեռանկարային բիզնեսները, որոնք ուղղված կլինեն նաև արտահանմանը. Արտակ Հանեսյան

ՀՀ-ում գործում է 17 բանկ՝ 537 մասնաճյուղով, իսկ այդ համակարգում աշխատում է 11,773 աշխատակից։ Այսօր լրագրողների հետ հանդիպմանը նման ցուցանիշներ ներկայացրեց Հայաստանի բանկերի միության գործադիր տնօրեն Սեյրան Սարգսյանը՝ ամփոփելով ՀՀ բանկային համակարգի գործունեության հիմնական արդյունքները։

Նրա խոսքով՝ կապիտալը 2018 թ․-ի դրությամբ կազմել է 771 մլրդ դրամ, ակտիվները մոտեցել են ընդհուպ 5 տրիլիոն դրամի, վարկերը՝ 3,2 տրիլիոն դրամ, պարտավորությունները՝ 4,2 տրիլիոն դրամ։ «Բանկային համակարգն իր միջնորդական գործունեությունը՝ միջոցների ներգրավում ու տեղաբաշխում տնտեսության մեջ, տարեցտարի ավելի մեծացնում է։ Ասեմ, որ 2018-ին կապիտալն ավելացել է 11,3 տոկոսով՝ 78 մլրդ դրամով, իսկ ավելի երկար ժամանակահատված դիտարկելով՝ տեսնում ենք, որ յուրաքանչյուր տարի կապիտալի աճի միտումը պահպանվում է»,- ասաց նա։
Սարգսյանը, խոսելով ակտիվների մասին, հայտարարեց, որ 2017 թ․-ի համեմատ՝ 2018 թ․-ին դրանք աճել են մոտ 611 մլրդ դրամով՝ 14 տոկոսով։ Նա հավելեց՝ ակտիվների աճի դինամիկան պահպանվում է, և հույս հայտնեց, որ կպահպանվի։ Այս ցուցանիշներից ելնելով էլ՝ ՀԲՄ նախագահ Արտակ Հանեսյանը շեշտեց, որ տարեցտարի բանկերի նկատառմամբ վստահությունն ավելանում է։

«Միջազգային ֆինանսական կառույցների վստահությունը բանկերի նկատմամբ ավելացել է, և մենք՝ բանկերս, հնարավորություն ենք ունեցել ավելի շատ միջոցներ ներգրավել հետագա վարկավորումն իրականացնելու նպատակով»,- նշեց Հանեսյանը:

ՀԲՄ գործադիր տնօրենն էլ, համաձայնելով գործընկերոջ հետ, շարունակեց խոսել վարկային պորտֆելի մասին՝ նկատելով, որ այն 2018 թվականին, նախորդ տարվա համեմատ, աճել է 13,7 տոկոսով կամ 392 մլրդ դրամով։ Սարգսյանն ուշադրություն հրավիրեց այն հանգամանքի վրա, որ սա չի նշանակում, թե բանկերը 392 մլրդ դրամ նոր վարկ են տվել, իսկ վարկավորման ծավալներն ավելի մեծ են։

«Վարկային պորտֆելի բաշխումը՝ ըստ որոշ հիմնական ուղղությունների․ հիպոթեք՝ 263,3 մլրդ դրամ՝ 22 % աճ, գյուղատնտեսություն՝ 199,4 մլրդ դրամ՝ 5․7 % աճ, արդյունաբերություն՝ 540,3 դրամ՝ 9,4 % աճ, տրանսպորտ և կապ՝ 114,0 մլրդ դրամ՝ 4,2 % աճ, առևտուր՝ 565,1 մլրդ դրամ՝ 13 % աճ, ծառայությունները՝ 225,1 դրամ՝ 31,2 % աճ, սպառողական վարկեր՝ 789,1 մլրդ դրամ՝ 36 % աճ։ Ընդհանուր առմամբ 2018 թվականին նախորդ տարվա համեմատ ֆիզիկական անձանց տրված վարկերն աճել են 272 մլրդ դրամով՝ 33 % աճ, իսկ տնտեսության տրված վարկերն աճել են 115 մլրդ դրամով՝ 8,1 % աճ։ Նվազել են շինարարության ոլորտի տրված վարկերը՝ 1,8 % -ով»,- ներկայացրեց Սեյրան Սարգսյանը։

Ինչ վերաբերում է ավանդներին, Սարգսյանը նշեց, որ 2018 թ․-ին ընդհանուր ավանդները նախորդ տարվա համեմատ աճել են 273 մլրդ դրամով՝ 10,5 %, այն կազմել է 2 տրիլիոն 863 մլրդ դրամ։
«Ցպահանջ ավանդներն աճել են 183 մլրդ դրամով՝ 22 % -ով, իսկ ժամկետային ավանդերն աճել էն 90 մլրդով՝ 5․1 % -ով։ Իրավաբանական անձանց ավանդներն աճել են 133 մլրդ դրամով՝ 13% -ով, իսկ ֆիզիկական անձանց ավանդներն աճել են 50 մլրդ դրամով՝ 3 % -ով»,- նշեց Սարգսյանը։

Վերջինս խոսեց հեղափոխության օրերին տարածված լուրերի մասին, թե ավանդների արտահոսք է եղել։ «Ասեմ, որ եթե մենք նկատում ենք 2-րդ եռամսյակում ավանդների ծավալի նվազում՝ մոտ 38 մլրդ դրամի չափով, միևնույն ժամանակ տեսնում ենք, որ 3-րդ եռամսյակում բացի այն, որ 38 մլրդ դրամը վերադարձավ, նաև 136 մլրդ դրամով ավելացան մեր ավանդները։ Տարեկան կտրվածքով տեսնում են, որ քաղաքական իրադարձությունները որևէ կերպ ավանդների աճի վրա ազդեցություն չունեցան։ Սա մեզ համար շատ կարևոր է, քանի որ կարևոր է բանակցության ու տնտեսվարողների վստահությունը համակարգի հանդեպ»,- ընդգծեց Սեյրան Սարգսյանը։

ՀԲՄ նախագահ Արտակ Հանեսյանն էլ իր հերթին նկատեց, որ այսօր բանկային համակարգը բավականին մեծ պոտենցիալ ունի ու պատրաստ է ֆինանսավորել կայուն ու լավ բիզնեսին։ Նրա խոսքով՝ բիզնեսի կողմից նաև հետաքրքրություն կա։

«Մենք կանխատեսում ենք, որ այս տարի աճի ավելի բարձր տեմպեր ենք ունենալու բոլոր հիմնական ֆինանսական ցուցանիշներով, քան նախորդ տարի, իսկ նախորդ տարին շատ տպավորիչ ցուցանիշներ ենք ունեցել։ Բանկային համակարգը պատրաստ է ֆինանսավորել կայուն ու հեռանկարային բիզնեսները, որոնք նաև ուղղված կլինեն արտահանմանը»,- եզրափակեց Արտակ Հանեսյանը։