ԱԺ տնտեսական հարցերի մշտական հանձնաժողովը քննարկում է նորաստեղծ ՏՏ ոլորտի տնտեսվարողներին հարկային արտոնություններ տալու նախագիծը (ուղիղ)

ԱԺ տնտեսական հանձնաժողովում քննարկվում է ««Տեղեկատվական տեխնոլոգիաների ոլորտի պետական աջակցության մասին» Հայաստանի Հանրապետության օրենքում փոփոխություններ և լրացումներ կատարելու մասին» հարցը:

Հիմնական զեկույցով հանդես եկավ ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Գեղամ Վարդանյանը, ով նշեց, որ գործող օրենքն ուժի մեջ է մտել 2015 թվականից:

Նրա խոսքով` օրենքում փոփոխություններ կատարելու անհրաժեշտությունը պայմանավորված է ՏՏ ոլորտի զարգացման ուղղությամբ ոլորտի նոր ստեղծվող տնտեսավարող սուբյեկտներին հարկային արտոնությունների տրամադրելու համար: «Օրենքում փոփոխություններ կատարելու անհրաժեշտությունը  պայմանավորված է նաև արտասահմանյան ընկերությունների կողմից ՀՀ-ում ստեղծված դուստր ընկերությունների նկատմամբ օրենքով սահմանված հարկային արտոնությունների տրամադրման միասնական մոտեցում ցուցաբերելու և կազմակերպությունների կողմից հարկերի վճարումից խուսափելու ռիսկերի կառավարման նպատակով, հաշվի առնելով վերջին տարիներին գրանցված սկսնակ կազմակերպությունների աճի տեմպերով, աշխատատեղերի աճով և հարկային մուտքերի ավելացմամբ, մասնավորապես, եթե մինչև օրենքի ընդունումը՝ 2014 թվականին ստեղծվել է ՏՏ 16 ընկերություն, ապա օրենքի ընդունումից հետո այդ թիվը նկատելիորեն աճել է, 2015 թվականին ստեղծվել և հարկային արտոնություններից օգտվելու հավաստագիր են ստացել ՏՏ 59 ընկերություն, 2016 թվականին՝ 98, 2017 թվականին՝ 272: Ստեղծված նոր ընկերություններում ստեղծվել է մոտ 2400 նոր աշխատատեղ՝ 3.0-3.4 մլն դրամ միջին տարեկան աշխատավարձով»,- ներկայացրեց Գեղամ Վարդանյանը:

Նա նշեց, որ հավաստագրման համար կարող են դիմել Հայաստանի Հանրապետությունում պետական գրանցում ստացած առևտրային կազմակերպությունները, Հայաստանի Հանրապետությունում հաշվառված անհատ ձեռնարկատերերը: «Հավաստագրման համար դիմող կազմակերպությունների աշխատողների թիվը չպետք է գերազանցի 30-ը»,- ասաց նախարարի տեղակալը:

Վերջինս հավելեց, որ  մինչև 2018 թվականի փետրվարի 1-ը սույն օրենքով տրամադրված հավաստագրերը գործում են 5 տարի ժամկետով, իսկ 2018 թվականի փետրվարի 1-ից հետո տրամադրվող հավաստագրերը գործում են մինչև 2022 թվականի դեկտեմբերի 31-ը ներառյալ:

ՀՀ ԱԺ աշխատակազմի տնտեսագիտական փորձաքննության վարչության պետ Թամազյանը հետաքրքրվեց, թե ինչու է սահամանփակվում աշխատողների թիմը, եթե հարցը ներդրումների մասին է, ապա պետք է աշխատատեղերը շատ ավելի լինեն: Բացի այդ, նա հետաքրքրվեց, թե ինչու է հավաստագիրը տրամադրվում սահամանփակ ժամկետով` մինչև 2022 թվականը:

Վարդանյանը նշեց, որ կան կազմակերպություններ, որոնք պատրաստ են Հայաստանում աշխատել, երկար ժամանակ է օրենքի վրա ծախսվել ու ամեն բան մշակվել ու շատ կարևոր է, որ այս օրենքը շուտ ընդունվի, որպեսզի այդ կազմակերպությունները գան:

Իսկ թե ինչու է աշխատողների թիվը 30 հոգի սահմանված, Վարդանյանը նշեց, որ  խնդիրն այն է, որ փորձում են փոքր և միջին կազմակերպություններին օգնել: «Ճիշտ կլինի հենց 30 հոգի թողնել, որովհետև եթե 30 հոգու շեմն անցնելուց հետո դա նշանակում է, որ կազմակերպությունը բավականին մեծ պատվերների է անցել և կարող է աշխատել հարկային դաշտում: Բավականին երկար ենք քննարկել, դրա համար է այս թիվը»,- նշեց փոխնախարարը:

Ինչ վերաբերում է 2022 թվականին, նա ասաց, որ չկան հստակ մեխանիզմներ՝ գնահատելու, թե օրենքն ինչքանով է արդյունավետ: «Սահամանփակում ենք 2022 թվով, որ տեսնենք ինչքանով է արդյունավետ եղել օրենքը և եթե տեսնենք ստեղծվում և աճում են կազմակերպությունները, կարող ենք երկարացնել ժամկետները»,- ասաց նա և ևս մեկ անգամ հավելեց, որ լավ կլինի թողնել, որ օրենքը շուտ ընդունվի, կան կազմակերպություններ, որ շատ են ուզում մուտք գործել հայկական շուկա:

Հանձնաժողովի նիստին կարող եք հետևյալ այստեղ։ 

Ամալյա Առաքելյան