Պատերազմի շարունակվելու մասին հայտարարելով՝ Ալիևը փորձել է ներշնչել, որ Փաշինյանի հետ բանակցություններում դիրքորոշումը չի զիջել. Վահրամ Աթանեսյան

Ամենայն հավանականությամբ, Ադրբեջանի նախագահ Իլհամ Ալիևը երկրի ՊՆ հատուկ նշանակության ուժերի զորամաս կատարած այցելության ժամանակ փորձել է զինվորականներին ներշնչել, որ ՀՀ վարչապետի հետ բանակցություններին ինքը դիրքորոշում չի զիջել:

Tert.am-ի հետ զրույցում նման տեսակետ հայտնեց ԱԺ արտաքին հարաբերությունների հանձնաժողովի նախկին նախագահ Վահրամ Աթանեսյանը՝ անդրադառնալով Ալիևի այսօրվա հայտարարությանը, որ Հայաստանի հետ պատերազմը դեռևս չի ավարտվել, ավարտվել է միայն առաջին փուլը: «Այսօր Ապրիլյան պատերազմի երրորդ տարելիցն է, և Ադրբեջանի նախագահ Իլհամ Ալիևն այդ համատեքստում է հայտարարություն արել, այսինքն՝ Ադրբեջանը համարում է, որ Ապրիլյան քառօրյա պատերազմն իր համար ռազմական տեսակետից հաջողություն է եղել, և, ըստ երևույթին, նա փորձել է հատուկ նշանակության զորամասի զինվորներին կանխատրամադրել հետագա ռազմական գործողությունների:

Եկեք չբացառենք, որ Ադրբեջանում կարող էին  ներքաղաքական խմորումներ լինել, և Ադրբեջանի զինվորականությունը կարող է դժգոհություններ ունենալ նախագահից, և կարծում եմ՝ Ալիևը փորձել է ցրել այդ տպավորությունը»,-ասաց նա:   

Հիշեցնենք, որ Ադրբեջանի նախագահ Իլհամ Ալիևը երկրի պաշտպանության նախարարության հատուկ նշանակության ուժերի զորամաս կատարած այցելության ժամանակ անդրադարձել է մարտի 29-ին Վիեննայում ԵԱՀԿ Մինսկի խմբի համանախագահների հովանու ներքո ՀՀ վարչապետ Նիկոլ Փաշինյանի հետ ունեցած հանդիպմանը՝ ընդգծելով, որ ԼՂ հակամարտության խաղաղ կարգավորման բանակցային գործընթացի ձևաչափը «չի փոխվելու»:

Հարցին, թե արդյոք դա պատերազմի նախապատրաստման զգուշացո՞ւմ է, Աթանեսյանը պատասխանեց, որ Ադրբեջանը միշտ էլ պատրաստվում է պատերազմի, և ոչ ոք չի ասել, թե Ադրբեջանը հրաժարվում է ԼՂ խնդիրը ուժի միջոցով լուծելու մտադրությունից: «Բնականաբար, Վիեննայի հանդիպմանը կողմերի դիրքորոշումների սկզբունքային փոփոխություն չի արձանագրվել, ինչը, ի դեպ, փաստել է նաև վարչապետ Նիկոլ Փաշինյանը՝ ասելով, որ եղել է քննարկում, բայց դիրքորոշումների մերձեցում չի արձանագրվել այդ հանդիպումների ժամանակ»,-ասաց նա:     

ԱԺ արտաքին հարաբերությունների հանձնաժողովի նախկին նախագահը նշեց՝ չի էլ կարող ասել, որ հռետորաբանությունը սկզբունքային փոփոխության է ենթարկվել. «Իհարկե, մի կողմից՝ Ադրբեջանը գնում է բանակցությունների, բայց զուգահեռ դրան Ադրբեջանն ունի իր պատկերացումները, և երբ դրանք հայկական կողմից հակադարձվում են ինչպես վարչապետի, այնպես էլ պաշտպանության նախարարի մակարդակով, հատկապես այստեղ պետք է ընդգծել նախարարի հայտարարությունը, որ հայկական կողմը «նոր տարածքներ» թեզն է առաջ բերում, դա պատասխանն է Ադրբեջանի ռազմատենչ հռետորաբանությանը, և որի մասին Ալիևը նաև այսօր էլ է ասել»:

Պաշտպանության նախարար Դավիթ Տոնոյանի հայտարարությանն անդրադառնալով՝ նա ասաց, որ ավելի քան պարզ է, որ եթե Ադրբեջանը գնա էսկալացիայի, և մարտական գործողությունները վերսկսվեն, ապա հայկական կողմը չի բավարարվելու հակառակորդի հարձակումը կասեցնելու գործողություններով, այլ ընտրելու է ռազմական  գործողությունները հակառակորդի տարածք տեղափոխելու մարտավարությունը, ինչը միանգամայն ադեկվատ է այսօր ստեղծված ռազմաքաղաքական իրավիճակին:

Նշենք, որ Տոնոյանը Նյու Յորքում նշել էր, որ թե «տարածքներ խաղաղության դիմաց» ձևաչափը վերաձևակերպվում է՝ փոխվելով «նոր պատերազմ՝ նոր տարածքների դիմաց» թեզի:

Իսկ թե հաջորդ բանակցությունների թեման նման հռետորաբանությունից հետո ո՞րն է լինելու, երբ խոսում էին խաղաղության պայմաններում բանակցությունները շարունակելու մասին, Աթանեսյանը նշեց, որ նախ չեն կարող գուշակություններ լինել, թե հաջորդ բանակցությունները կլինեն, թե ոչ, բայց կարծում է, որ այդ հայտարարությունները եղել են Վիեննայի հանդիպումից առաջ, ինչը չի խանգարել, որ կողմերը նստեն բանակցությունների սեղանի շուրջ: «Վերջին հայտարարությունն էլ չի խանգարելու, որպեսզի հաջորդ հանդիպումը տեղի ունենա»,-ասաց նա:

Վերջին շրջանում Արցախի ՊԲ զինվորական վերադասի փոփոխությունների մասին խոսելով՝ Վահրամ Աթանեսյանը նշեց, որ բանակի փոփոխություններն օրինաչափ գործընթացներ են: «Բանակը պետք է մշտապես կատարելագործվի, մշտապես համալրվի երիտասարդ պրոֆեսիոնալ զինվորականներով, և կարծում եմ, որ կամավորական շարժումից բանակ եկած և իրենց մեծ ավանդը ներդրած զինվորականների ժամանակը, այսպես ասած, սպառվում է, և նրանք պետք է անցնեն թոշակի՝ իրենց տեղը զիջելով նոր ու ավելի երիտասարդ զինվորականների, այստեղ  որևէ արտառոց երևույթ չկա, և պետք չէ ցավալի ընդունել այդ փոփոխությունները»,-ասաց նա:

Վահրամ Աթանեսյանը չի կանխատեսում ռազմական էսկալացիա առաջիկայում՝ գոնե մեկ տարվա կտրվածքով: «Բայց ամեն դեպքում գործ ունենք մի հակառակորդի հետ, որն անկանխատեսելի է իր քայլերում, և պետք է ամեն ինչի պատրաստ լինել, և այստեղ օրինաչափություն են և՛ մարտավարության փոփոխությունը, և՛ նոր զինատեսակների ընդգրկումը, և՛ նոր ստորաբաժանումների տեղափոխումը շփման գիծ, ինչպես ՀՀ ՊՆ նախարարն ասաց, ամեն ինչ պետք է արվի, որպեսզի հակառակորդը գայթակղություն չունենա, թե կարող է երեք տարի առաջվա ապրիլյան իրավիճակը կրկնվել»,-ասաց նա: